[Den.xviij.sten dach in Ougst]
VP den.xviij.sten dach in Ougst quam die edele hertoghe Maximiliaen binnen die schone stede van Ghendt. Anno.lxxvij.met seere rijclekelicken ende triumphantelicken, ende seer schonen state. Ende hy quam van die stede van Bruessele tot der stede van Denremonde, ende also voort tot der voorseyde stede van Ghendt. Ende eerst so quammer inne.CC ende.L.cranekijniers ende coleuueriers, ende eeneghe met glauyen. Ende dese waren alle te voet in seer schoonder ordonancien gaende, twee en twee te samen. Ende daer naer quamen.xxxij.carrijnen gheladen al met artijlgerye van orloghen, ende alaem ter kuekene dienende, ende daer naer quamen noch.ijc.ende.L.cranekijniers, ghelijc als voren, dye welcke ghinghen bewarende huer carrijnen. Ende daer naer quamen wel.vic.mannen te peerde, al int swarte ghecleet, ende al int harnasch, ende hadden al meest swarte pinioenkins aen hare lanchien. Ende voort voor den edelen hertoghe waren gheuoert.viij.grote swarte bannieren die viercant waren, ende die scachten waren oock swart gheuarwet, dwelc gheselschip seer schone ende ghenouchlic om sien was.
¶ Item voor den edelen prinche Maximiliaen reden.v.heraulten, alle verwapent metter wapene van Oostenrijcke. Ende ooc so reden daer alle die heraulten vanden edelen Hergtoghe Kaerle, salegher ghedachten metten wapenen van sijnen lantschepen, ende hem wijlent toegehorende. Ende voor den prinche was gheuoert een sweert, met trompetten voor hem trompende hooghelic, ende groot ende schoon gheluyt makende, dwelc ooc seere ghenouchlic om horen was, ende ooc om sien.
¶ Item dit ghepasseert sijnde, so quamen daer noch in seere schoonder ordonnancien ende seere rijckelic toe ghemaect, op schone costelicke peerden, noch wel.vic.mannen van wapenen. Ende daer was menich edelman int gheselschip. Te wetene bisschoppen, hertoghen, ende grauen, welc gheselscip seere schone ende triumphelic omsien was.
¶ Item die van Ghendt, metsgaders haer lieder casselrye reden yeghens hem, alle in witten habijten, met rooden capproenkins, ende met swarten hoeden, ontrecht.vc. personen, seer costelick ende rijckelick toeghemaect in schoonder ende triumphelicker ordonnancie, gheseten op costelicke peerden, welcke processye gheduerde wel.iiij.hueren lanck.
¶ Item dye van Ghendt hadden ooc gheordonneirt vele schoone slomme personagien ende propheten ten blijden wellecomme vanden edelen prinche Maximiliaen. Ende hy quam ter poorten inne van sinte Baefs waert, ende lancx den huysen was groote chierhiede ghedaen. Ende daer stont ghescreuen. Tu es dux noster pugna prelium nostrum, et
omnia que dixeris nobis faciemus. Ooc stonter noch gheschreuen. Amor fecit amaritudinen Ende bouen een ander parc stont gheschreuen Clamor factus est ecce sponsus venit.
¶ Dese eerweerdighe prinche alle dese saken ghesien hebbende, hi reet te logijste int huys vanden prothonotare, ende het was vp eenen maendach. Ende sijn bancket ghedaen sijnde tsauents, hi reet als brudegomme tot sijnder bruyt, int hof ten walle, met.vi.of.viij.heren bi hem. Ende dit was ontrent den.xi.hueren inder nacht, daer alle dye edele bereet stonden omme den brudegomme tontfanghene. Ende die bruyt den brudegomme siende so knielde si neder ter eerden, ende hi van ghelijcken, malcanderen inden aerme nemende, ende veranderden beede so seere, ende wierden la so wit, al hadden si die doot varwe aen ghehadt, dwelc was een teeken van hertelicker liefden. Ende me vrauwe de duwagiereghe nam ooc den brudegomme inden aerme, hem cussende ende seggende. Naer hu heeft ons hertelic verlanct. Ende aldaer waren si beede ondertrauwe ghedaen van eenen legaet van Roome. Ende doe was daer gheordonneirt een rijckelic bancket. Ende dat ghedaen sijnde, so nam die bruydegomme vriendelicken oorlof aen sijn bruyt, ende trac weder naer sijn logijts.
¶ Item daer so was alle dien nacht grote triumphe ghedaen van vieren, alle dye stede duere, ende alle manieren van ghenouchten.
Auteursrechtvrij
