Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[fol. C.lxxv.v]

[ITem int selue Iaer van.lxxv.]

ITem int selue Iaer van.lxxv.was die Hertoghe Kaerle int lant van Loreynen, daer hier voren wat of verhaelt staet. Ende hi beleyde die stede van Nanchy, die welcke stede haer seluen vp gheuen moeste, den xxviij.sten dach van Nouembre, bi assaulte ende ooc bi honghere. Ende Hertoghe Kaerle ghecreech doe tlant van Loreynen in sijnder onderdanichede, ende hy screef hem seluen here van Nanchy, van Bar, ende van vaudemont.

¶ Item men mochte vraghen wat dede Hertoghe Kaerle in Loreynen, of wat hi daer te doene hadde. Daer vp salmen verstaen dat die hertoghe van Loreynen den hertoghe Kaerle ontseyde in dien tijden als hy voor Nuchen lach. Ende huyt dyen onsegghene resen alle die orloghen, want die Zwitsen quamen totten hertoghe van Loreynen, ende sy trocken int lant van Sauoyen ende van Bourgoengien, stichtende brant ende roof.

¶ Ooc es te wetene dat die hertoghe Lodewijc van Oostenrijcke vercochte den hertoghe Kaerle een graefschip, ligghende aen der Zwitsen lant, ende aen Elzaten, gheheeten tgraefschip van Foretten, daer dat die Zwitsen seer gram om waren, want si onthoofden daer omme eenen Ruddere, hofmeestere ende dienare vanden hertoghe Kaerle voorseyde, ende ne wilden niet dat sulc een prinche kennesse hebben soude in tlant van Zwitsen. Ende hier omme rees eenen grooten twist tusschen Zwitsen ende den hertoghe Kaerle.

¶ Item corts hier naer soe versaemde die hertoge Kaerle weder een grote heyrcracht midts dat hi daer te voren eenen slach ghehadt hadde yegens den zwitsen. Ende hi trac voor een stede gheheeten Fryburch, daer vele zwitsen hem quamen beuechten, maer daer worder grote menichte van hem lieden versleghen, het welcke was den eersten strijt yeghens die zwitsen. Ende die Zwitsen siende tgrote verlies van haren volcke, so ontboden sy den hertoge Kaerle te leueren eenen staenden strijt, ende noemden tijt ende dach van commene.

¶ Item die hertoghe kaerle maecte hier yeghens grote ghereescepe, sinen dach verwachtende. Ende hi stont met sinen edelen.iij.daghen lanc in battaelgien, clouckelic verbeydende sijn vianden die zwitsen, maer si en quamen niet

[fol. C.lxxvi.r]

¶ Item die edelen vermoeyt sijnde van dyen langhen verwachtene, ten eynde bi consente vanden prinche, si staecten hare battaelgie, ende elc trac te sijnen logijste, hem lieden ontwapenende, etende ende drinckende, ende slapende van groter vermoeytheden. Dit was den Zwitsen ghewroucht vanden vitaelgiers van dien lande. Ooc mede die Zwitsen saghen al van hooghen berghen die daer int lant staen, dies quamen si onuoorsien van eender sijde, ende die Hertoghe van Loreynen, met Salazar die Capiteyn, dye huyt Vranckerijcke quansuys ghebannen was ende si brochten den standaert van Melanen mede als vrienden, ende sloughen in vander andere sijde, ende si ghecreghen also dye auangaerde, ende versloughen meneghen man. Ende daer was versleghen dye graue van Merle, die hadde eenen wapen rock van Bourgoengien aen, dies meenden si den Hertoge kaerle selue te hebbene, want si en hadden gheen ontfaermenesse, noch sy en spaerden nyement. Ende si wonnen Hertoge Karels parc ende alle dengienen, ende groten swaren schat. Ende dit was int iaer.M.iiij^c.ende.lxxvi.in Wedemaent, vp den dach vanden.x^m. martelaren, ende dit was den tweesten strijt. Het velt daer dit gheschiede, hiet mozack. Ende Hertoghe.K.vertrac huyten velde, ende moeste die vlucht nemen al tot salines in Borgoengien

¶ Item als die Zwitsen vernamen dat si den graue van Maerle verslegen hadden, ende niet den hertoghe Kaerle, si waren seer ontstelt maer doch si begrouuen den voorseyde heere met groter weerdicheyt naer sijne edelhede in een van haerlieder kercken.