Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volcht die maeltijt.

[fol. C.lxix.v]

DEse mogende keyser sadt inden middele vander tafele, ende die hertoghe van Borgoengien ter luchter sijde, ende neffens hem sadtdes keysers sone Maximiliaen, daer naer die hertoghe Steuin van Beyeren. Ende aen des keysers rechter sijde daer saten drie mogende heren, te wetene die bisscop van mens, die bisscop van Triere, ende die bisschop van luydicke. Ende dat was om dat hi was ghedescendeirt vanden coninclicken bloede vanden helegen.co.sinte Lodewijc.co.vanVranckerijcke. Ende dese selue here van Luydicke hadde een gulden habijt aene, gheuoert met ermijnen. Dese voorghenoemde heren die saten aen skeysers tafele. Ende beneden aen een ander tafele daer sadt die bisscop van Mets, ende die bisscop van Eystendom, ende voort andere heeren.

¶ Item die heren vanden prinche die dienden al ter tafele, daer en was nyement diere sadt Eerst die ionchere van Cleuen, hi hadde een habijt van selueren lakene, ende inder ghelijcke hadde Phelippe monseur, sone van mijn here van Rauesteyn. Ende die hofmeester meester Guillame byse die hadde gulden laken aen, ende so dede ooc mijn here die Cancelier. Aen deerste tafele dienden dye ghene die gulden laken droughen, ende aen dandere vier grauen, te weten mijn here van maerle, mijn here Hubrecht van nassauwen, mijn here Lowijs de chatheau gwyon, ende sijn broeder die Marcgraue van Rucelendon, die.G.van zalmen, de graue van ponthieu, dye here van egmont, die here van carenson, mer Iacob vander Ameye, mijn here van Rabays, mijn here Anthonis die bastaert, van welcker maeltijt die gherechten seer costelic waren.

¶ Item naer dat die maeltijt ghedaen was, so brochtmen daer.xvi.gulden nappen so costelicken ende vul ghesteenten, dat si hem verwonderden diet saghen. Ende men diende daer van crude ende van tregie oueruloedelick. Ende daer naer so ghingen dese heren ter eeren van gode ter kercken, horende vespere ende complie. Ende dat ghedaen sijnde, ghingen weder te peerde. Ende die Hertoghe brochte den keyser weder te sinen pallaeyse met groter menichte van waslichte ende van toortsen, ende namen van malcander vriendelic oorlof, ende elc trac in sijn ruste.