Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Een feyt van wapenen.

DAer naer was gheordonneirt bi den hertoge kaerle een feyt van wapenen, inder manier van een der battaelgie. Ende waren.xiij.yeghens.xiij.buten der stede van Triere, in Marcius velt, te wetene dese naeruolgende heeren aen deen sijde. Eerst mijn heere Hubrecht van Nassauwe, als capiteyn.

Monseur dorbe

Mer curaet pot

Chaerle de vysant

Anthonis dauchy

Phelips van berghen

Pieter de longheuael

Thomaes callabrois

Lancelot de callabrois

¶ Ende heur peerden hadden baerdgien van wapenen seer costelic, ende daer ouer een verdeck van sijde, half swart, half peersch seer abelicken ghestoffeirt.

¶ Dit sijn dander.xiij.persoonen.

Mijn here van berghen al voren, als capiteyn.

Mijn heere van Walem

Monseur destiers

Monseur de myukes

Frederick de Flassen

Een ander ghenaemt Flamaret.

[fol. C.lxx.r]

Mijn heere kaerle van Crieuecuer

Mijn heere Anthonis van Halewijn

Guyot dauchy

Een ghenaemt Gooskin

Iehan de vy

Iehan le seure

¶ Ende elc peert hadde een baerdgie ende een verdeck daer ouere, half ghelu, half sangwijn, seer rijckelic om sien. Ende daer stonden die.xxvi.persoonen in vormen van battaelgien, in die presencie vanden moghenden Keyser ende vanden edelen hertoghe van Bourgoengien, ende ghinghen schermutsen met groter cracht vp malcanderen, niet eygenstaende elc hilt hem in ordene van sinen ghetale Doe waren daer laten vliegen.vi.serpentijnen dye metdallen groot gheschal maeckten. Daer naer hebben si gheloopen vp malcanderen met scerpen glauyen. Ende wie daer pijne of vreese ghecreech, dye en behaelde daer gheen eere, want het was omme te tooghene tfeyt vanden rudderschepe, ende om eere te behalene. Ende men sach daer ten strijde ligghen peerden doot ende lieden ghewont.

¶ Item noch om eere te ghewinnene, soe ghinghen si malcander met sweerden hauwen seer rudelick. Ende ten laetsten twee en twee apart yegens malcanderen, ende sloughen so langhe vp malcanderen dat deen of dandere sijn sweert of sijn harnasch verloos Mijn here van Nassauwen slouch sijn sweert inden middel in sticken. Ende dit aldus ghedaen sijnde, quamen dese edele campioenen voor den keyser ende voor den hertoghe, ende namen malcanderen byder hant, ende toochden obediencie ende weerdicheyt den voorseyde heren, ende reden also te haren logijste.

¶ Aldus ghescheeden sijnde, die hertoghe brochte den keyser weder te sijnen pallaeyse. Ende daer schieden si met vriendelicken oorloue ende met groter minnen.