Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volcht de hooghe ende Edele versaminghe vanden Keyser Frederic, ende van den Hertoghe Kaerle.

¶ Dat.lxiij.Capittel.

[fol. C.lxvij.v]

OMme eewelick in allen houen te louene ende te eerene twee dye alder kerstelicste princhen dye meest arbeyden om tweluaren van haren landen, ende ooc van haren vianden meest ontsien sijnde, hoe dat dese.ij.groote heeren ende hooghe princhen langhe tijt begheert hadden malcanderen te siene ende eere te bewijsene. Ende wie van desen twee oock mede den rijckelictsten staet ende tijtelen vertooghen sal van haren landen, als hier naer in tcorte volghen sal van elcken alleene.

[Vp Sinte Michiels auendt]

¶ Item int iaer.M.iiij^c.ende.lxxiij.vp Sinte Michiels auendt, so quam in die heleghe stede van Triere, des auents spade Frederic die derde van dier name byder gods ghenaden als Roomsch coninc ende Keyser, coninc in Hongherien, ende in dalmacien ende Correwaghen, Hertoghe in Oostenrijcke ende van Stier van Carinten ende van Trent, ende heere vp den Wijnschermaerct, Landtgraue in Elsaten Graue van Henensberch, van Portenay Simborch, ende van Tyrool. Ende als hi bi deser stede nakende was, so quam mijn here den Eerdtsbisscop van Triere ghereden met.iiij^c.peerden yeghens den voorseyde Keyser om hem eerlic te ontfanghen alle int harnasch, ende haer habijten waren al root ende huer lanchen waren alle gheuerwet, ende dit sijn de heren die metten bisschop van Triere ghereden quamen.

¶ Eerst die graue Kerstoffels oudtste sone Kaerle graue van kaetsenelleboghe

Die graue van Bernenburch

Die graue van Wijnenburch

Karel marcgraue van Baden

Die graue van Swolmen      ♣

Die heere van Ronckel

Alle Baenraetsen.

¶ Die welcke heeren reden rijckelic yegens den keyser, ende brochten hem inden heerendom voor den hooghen outaer, daer die keyser ootmoedelic sprac sijn ghebet. Ende die Suffragaen las ouer hem een collecte, ende doe sancmen met luyder stemmen ende met orghelen. Te deum laudamus.

¶ Hier naer volcht wat heren dat waren byden keyser te sijnder incomste, binnen der voorseyde stadt van Trieren.

¶ Eerst die bisschop van Mens met seere schoonen state.

Daer naer des Keysers sone maximilianus een scoon iongelinc ende es hertoge in oostenrijc

Daer naer die Bisschop van Mets

Daer naer Hertoghe Lodewijc van beyeren

daer naer de hertoge aelbrecht van mouchen met een verguld huyke met perlen doorwrocht

Daer naer paset begge coninc in turkyen

Daer naer die Patriarcke van Anthiocien

Daer naer die Bisschop van eysteden

Ende mijn here den Graue van wittenburch

Daer naer Hughe Graue van Wendenburch, de was daer in die stede, maer in tincommen sadt hi byden keyser in eenen waghene, midts dat een out heere was.

¶ Item ooc warer.ij.sonen, des grauen van Nassauwen ende van Wijnsbaden, die graue van Holboch, ende die graue Hughe van Monfoort raet vanden keyser voorseyde, ende die graue hulric, ende sijn broeder beede grauen van Sols, ende graue Otte van Hanenburch, ende.ij.Grauen van Tfooren, die graue van bets, ende die graue van Salewaert, die graue van Caprijn, ende graue van syma, die graue Willem van parrasijn, ende die.ij.grauen van Sonnenberch, ende ij.grauen van Vostenburch, ende die graue van Wijnsburch, ende.ij.baenraetsen van schoonen berch, ende.ij.heren van Boleem, ende die rewaert van Esbac. Ende heer Adolf van bappren die voerde een bloot sweert voor den keyser daer meneghen costelicken steen in stont vp dien voorseyde tijt.