Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volcht hoe dat die hertoghe Phelips van Bourgoengien veruoert was van sinte Donaes te Brugge te Dygioen in Bourgoengien, den.xxx.sten dach in December. Anno.lxxiij.

[fol. C.lxvi.v]

HErtoghe Kaerle besich wesende inde duytsche landen int selue iaer van.lxxiij.doe sandt hi sinen lieuen neue mijn heere van Rauesteyn binnen der stede van Brugghe, omme den voorseyde dooden hertoghe Phelips te veruoerene in Bourgoengien bi sinen vorders.ende hi hadde ontrent.vi.iaren begrauen gheweist te sinte donaes, mer hertoge Phelips had de begeert binnen sinen leuende lijue datmen hem naer sijn ouerlijden voeren soude te Digoen in bourgoengien dwelc hem hertoge.K.beloofde te vulcommen, alsdus vp den.xxx.sten dach in december, in di selue iaer was dit doode lichaem huyter eerden gedaen, ende vp scraghen ghestelt inden choor, ende des achternoens vighelie ouere hem ghesonghen, met een nyeu ghetemmert huys ouer hem staende met meneghe wassene keerse, Ende die choor was rondt omme vul barnender keersen ghestelt ende tsanderdaechs was gedaen een solempnelick huytuaert, ende een rijckelicke hoochmesse, Ende doen so was hi ten een hueren naer noene gheleyt vp eenen nyeuwen waghene die propijs daer toe ghemaect was, welcken waghen bouen verdect was met eenen gulden lakene, Ende vp swarte scachten van glauyen droeghen.vi.Rudders een swart gulden laken bouen den lijcke ghespannen als een verdeck van eenen bedde, Ende neffens den seluen waghene ghinck een Ruddere bloots hoofts ende leede een Ros dat verdect was metter wapen van bourgoengien totter eerde toe, datmen niet en sach dan die ooghen, ende hadde vp hem een schoone gulden sadele, Als seggende ende bewijsende, hier plach hi int leuen vp te Rijdene, nv licht hi daer doot inden waghene, Ende in desen waghene ghinghen.vi.schoone peerden deen voor den anderen, alle verdect met swarten fluweele tot den voeten toe datmer niet aen en sach dan die ooghen, ende die naghelen vanden strijnghen vanden peerden waren alle gulden ende was een hanghenden waghene, Ende dye den waghen meynden hadden Raucleederen aene, ende saten metten blooten hoofde, Ende aen deen syde vanden waghen vooren ghinc een Rudder draghende eenen gouden helm ghetemmert met gouden lelyen. Ende aen dander sijde so drouch een ruddere, eenen rijckelicken schilt met der wapene van Bourgoengien ghewrocht van bordueren, Ende es te wetene dat alle die rudders dye te Brugghe woonden ende daer ontrent, ende alle dye officien bedienden vanden Prinche die waren alle ghecleedt in swarten habijten.

¶ Item neffens teerste peert vanden.vi.ghinghen vier conijnghen van wapenen vercleedt metter wapene van Bourgoengien met Raucapproenen al verslooft, ende daer vp draghende elc een gulden croon, Ende elc hadde in die hant eene edele banniere, als Brabant Vlaendren, Henegauwe, ende Artoys. Ende voor die vier coninghen ghingen.ij.heraulten met ghelijcke tornijckelen sonder croonen of bannieren, maer hadden aene raucapproenen.

¶ Item alhier voren so ghinghen alle die Ambochten van Brugghe in ordonnancien in swarten habijten, elc naer sinen state, ende ooc alle die collegien van Brugge, ende die vier oordenen, ende die monicken vanden Eechoute.

¶ Item van sprinchen weghe waren vele lieden in swarte ghecleet, ende drougen elc een barnende toortse in dye hand metter wapene van Bourgoengien, ende in sghelijcx ooc eenege dienaers van brugge, ende van den vryen drougen ooc tortsen in swarten habijten alst voorseyde es.

¶ Item achter tlijc so reedt inden rauwe mijn here van Rauesteyn, met vele andere edele heren alle in langhe raucleederen tot der eerden toe. Ende voort die wethouders van Brugghe ende vanden vryen, ende meer andere van diueersche steden, ende gheleedden tlijc ter cruyspoorten huyt, ende rusten tsauens te Eeclo.

¶ Item vp den seluen tijt was ooc veruoert die edele vrauwe, Ysabeele van Poortegale tsvoorseyde hertoghen phelips laetste gheselnede, ende si was ghehaelt huyten cloostere van Gosnay, het welcke es een Sartruesinnen cloostere bi monstruel, daer si vele aelmoesenen in ghegheuen hadde. Ende was al daer huyten graue ghedaen, ende met grooter eerlicheyt gheuoert te Dygioen, in Borgoengien, byden hertoge Phelips haren man.

[Inne den laetsten dach van maerte voor paesschen]

¶ Item naer die doot van den Bisschop van Doornicke die guilhelmus hiet, die ooc was abt van sinte Bertins te sint Omaers doe was byden versoucke vanden Hertoghe Kaerle Bisschop gemaect een weerdich prelaet, die welcke hiet Ferricus gheboren huyt Bour

[fol. C.lxvij.r]

goengien, ende dese dede te Brugge sijn incomste, ende quam ter cruyspoorten inne den laetsten dach van maerte voor paesschen.anno.M.iiij^c.en.lxxiij. Ende men hielt te Brugghe mesdach.

 

Ferricus hadde te Brugghe ontfanck

 

Als Bisschop in maerten huytganck

¶ Item in dit selue iaer was een bestant ghemaect tusschen den coninc Lodewijc van vranckerijcke, ende den hertoghe Kaerle van bourgoengien een iaer lanc gheduerende, maer men mochte nyeuwers varen noch keeren sonder saufconduyt, want nyement en dorste hem wel daer in betrauwen.

¶ Item in dit selue iaer was mijn heere Anthonis dye Bastaert van Bourgoengien ghesonden in Ambassade vanden Hertoghe Kaerle sinen broedere in diueersche conincrijcken, maer fortune en liet hem niet varder trecken dan byden coninc Edewaert van Inghelant, maer sijn schepen inde Zee sijnde met groten coestelicken goede, die waren van den Fransoysen ghenomen.

¶ Item in dit selue iaer mijn here Ancelmus adoorne heer van coortwijc in scotlant was ooc gesonden in ambassade van hertoge kaerl omme te trecken int landt van perssen maer hi moeste wederkeeren omme die groote wapeninghe vanden turcken die in sinen wech waren.

¶ Item men sal weten dat vp den seluen tijt als Hertoghe Kaerle, al tlandt van Gheldre in sijn bewelt hadde, dat hi altoos inde wapene bleef bi hem houdende al sijn edele, ende al dat groot garnysoen ende volc van wapenen. Ende dat was ter meninghe ende waeromme dat hi waende te treckene bi den Keyser van Rome die welcke hem dach ghemaect hadde binnen der stede van Tryere, dus wilde hem hertoge Kaerle vertooghen als een Prinche, wanneer dat hi byden Keyser quame, want die keyser ende Hertoghe kaerle hadden sonderlinghe sticken te handelene, dat si in secrete houden wilden, Ende dat huyt rechter vrientschepe.