ALs hertoghe Kaerle vernomen hadde dat die hertoge Aernout van Gheldre ouerleden was, so sandt hi Edele mannen omme aldaer ontfanghen te wesene als recht Hertoghe van gheldre, ende Graue van Zutphen, het welcke sommeghe steden consenteerden.ende sommeghe niet, als Venloo, Nymmeghen, Zutphen, ende Aernem, ende andere, ende daer omme track dye Hertoghe Kaerle met groter mogentheyt in tlandt van Gheldre in die weke voor sinxen, ende hi beleyde alder eerst die stede van Venloo. Ende was so grote foortse vp hem lieden doende dat sy hem vp gauen, aldus wan hijse metten sweerde. Ende als die stede van Venloo also ghewonnen was so ghinghen sommeghe steden, ende gauen hem vp inden handen vanden Prinche, ende ontfinghen Hertoghe Kaerle, voor haren here ende Prinche, ende daer naer ghinck hy liggen voor die stede van Nymmeghen met groten volcke van wapenen, ende beuachtse seere scerpelic, ende die van binnen weeren hem seer clouckelic met bussen, ende met engijnen, Maer Hertoghe Kaerle dede so grote schade aen die poorten ende aen die mueren met sinen engienen, so dat si bi bedwanghe hem seluen moesten vpgheuen Ende hi trac binnen Nymmeghe, daer hi ontfanghen was ende ghestelt als Hertoghe van Gheldre, daer naer vertrac hy tot aen den berch van Elten met groten volcke, ende daer quamen bi hem die van Zutphen, ende van Aernem. Ende daer was ghesloten dat si ende alle die andere casteelen ende sloten den Hertoghe Kaerle ontfanghen souden, voor haren rechten here ende prinche, het welcke also gheschiede Aldus es Hertoghe kaerle gheworden hertoghe van Gheldre ende Graue van Zutphen twelck hi in corter tijdt al ghewonnen heeft metten sweerde.
Die geldersche blomme seer fier int spreken
Es io voor Karels cracht gheweken.
Auteursrechtvrij