Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Aengaende den bestande van.xi.maenden.

¶ Item es te wetene als bestant van.xi.maenden huyt was, ende dye voorseyde Monsuer de craen metten sijnen gheen vry accoort maken en consten, so gheboot die hertoghe kaerle alle sine edele mannen ende alle die van sijnder ordonnancie ware ghewapent ende ghestoct by hem te wesene in thuytgaen van Meye. Anno.lxxij.ontrent Atrecht, daer eene grote menichte van volcke versaemde Ooc mede aenghesien dat die coninc Lodewijc van Vranckerijcke wonderlicke groote wapeninghe vp stelde, yegens den voorseyde hertoghe Kaerle. Ende men seyde dat Hertoghe kaerle ende die hertoghe van Berry, sconincx broere van Vranckerijcke, ende dye hertoghe van Bretaengien malcanderen broederschap beloeft hadden. Ende hadde Hertoghe Kaerle sijn belofte ter neder willen legghen, het soude paeys gheworden hebben tusschen den coninck ende hem, maer alst bleec die hertoge karel die wilde ghetrauwe blijuen, ende sijn woort niet of gaen.

[Vp den vierden dach van Wedemaent. Anno.lxxij]

¶ Vp den vierden dach van Wedemaent. Anno.lxxij.so slouch die hertoghe Karel te velde ontrent bapames aen dese side van der Riuiere. Ende men seyde dat die coninck hadde wel thien mannen yegens een.

¶ Item die hertoge Kaerle niet verschietende, hy track in theynde voor dye stede van Beauuais, ende hi lacher lange, maer die coninc en dorste hem niet beuechten, maer Salasar ende andere capiteynen deden tbeste dat si mochten, maer hertoghe kaerle behilt eerlicken het velt also langhe als hi daer lach maer ommere die coninck en quam niet.

¶ Item het en betaemde nyet dat hertoghe kaerle paeys ghemaect soude hebben alsoot voorseyde es, ende soude buyten ghesloten hebben den hertoge van Berry sconincx broedere, ende den edelen hertoghe van Bretaengien want hy souder groter cleenicheyt of ghehadt hebben, twelc hi niet ghedaen en soude hebben coste wat hem costen mochte.

¶ Item wat die coninck segghen mochte, het was al bedroch, want altoos pijnde hi om hertoge karels steden in te nemen daer hi mochte of conste. Ende dat noch meer es, hi hadde ommer huyt gheweist om sijns selfs broedere den hertoge van Guyenne te doen vergheuene, ende was noch huyte om den hertoghe van Bretaengien ooc te doen doodene, die welcke.ij.heren ghesloten waren in hertoghe Karels begheerte, te wetene soudt paeys gheworden hebben tusschen hem ende den coninck, die twee Princhen voornoemt souden ooc paeys hebben sonder fraulde of malengien, maer neen het was te varre commen, want die Hertoghe van Guyenne hadde alsulck venijn inne dat hi daer of steruen moeste, ende bi crachte van dien venijne so vielen hem sijn tanden huyt sijnen hoofde. Ende sijn vingheren dye innewaert crommen souden, die cromden achterwaerts ouere yegens natuere, ende vele beenen vielen huyt sijnen hoofde ende huyt sijnen anderen leden lijdende onuerdraghelicke pijne. Ende ten eynde moeste hijt besteruen. Ende inder ghelijcke was oock vergheuen eene edele ioncfrauwe, die vriendinne was vanden edelen Hertoghe van Guyenne voorseyde. Ende dese quade doot aldus gheschiet sijnde, dye moghende Hertoghe van Bretaengien sandt een eerlick Ambassade aen den Hertoghe kaerle daer hy lach int veldt voor Beauuais, byden welcken dye Hertoghe Kaerle seere bedruckt was. Ende hi sandt sijne openbare clachte in alle sijne landen, in vorme van mandemente, als hier naer volcht.