Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[ITem ontrent desen seluen tijt in die maent van Lauwe]

ITem ontrent desen seluen tijt in die maent van Lauwe doe was die vreeselicste comete ghesien met eenen langen breeden steerte, die welcke beteekende groot verdriet vanden landen, ende bloetsturtinghe van princhen, also men hier naer wel horen sal. Ende dese commete draeyde altijt naer tcours vander mane.

¶ Item in tselue iaer sandt hertoge Kaerle eenege ghedeputeirde int lant van Gheldre, omme dat sy tlant regieren souden huyter name van hem. Te wetene twee ghebroeders van Egmont, ende noch andere met hem lieden, maer dye van Nymmeghen tracteirdense rudelicke, ende seyden dat sijse souden dootslaen. Ende seyden si en hadden met hertoghe kaerle niet te doene, maer dat Hertoghe Kaerle haren heere gheuanghen hilt dat wilden si wreken vp hertoge karels landen, ende si ghinghen stichten roof ende brand vp die van tshertoghenbossche,, ende si sloten den Rijn toe datter gheenen rijnschen wijn te Dordrecht commen en mochte, noch ooc te Vlaender waert in dien tijden.

¶ Item hertoge kaerle dit hebbende in goeder memorie, hi swoer hy soude hem lieden speils so vele maken, si soudens aen die helft ghenouch hebben in tijden ende in wijlen.

[Den vijfsten dach van Meye]

¶ Item die hertoghe kaerle vertrack huyt sijnder stede van Brugge, den vijfsten dach van Meye, ten twee hueren naer die noene, ende sijn aertchiers al ghewapent, in schoonder ordonnancie ende dye knapen al twee en twee alle int harnasch. Ende dan alle die edele van sijnen huysghesinne int vulle harnasch. Ende doe die Hertoghe kaerle vertrack daer die Hertoghe Aernout van Gheldere mede reedt, ende reedt also buyten vp een velt byden Iacopijnessen, daer een liste ghemaect stont, ende een Pauwelioen daer een heraut vp was verwapent in eenen thorre van seluere, hebbende drie vaeskin van kelen, daer een banniere huyt stac vander ghelijcker wapene voorseyde. Ende waren aldaer drie edele heeren blanc int harnasch, quansuys commende huyt den bussche, elc met een pingoen verwapent als bouen.

[fol. C.lxiiij.r]

¶ Item dese drie heren voorseyde quamen verantwoorden metter glauye alle die andere edelinghen dye daer tfaeyt van wapenen beghinnen wilden, het welcke seer chierlic om sien was, want daer was meneghen loop ghelopen. Ende dit faeyt van wapenen gheeyndt wesende ontrent den.vi.vren vanden auende, vertrac Hertoge Kaerle met meneghen edelen man, ende met sine gheselnede te Eeclo, daer hi des nachts bleef rustende. Ende tsander daechs track hi binnen sijnder stede van Ghendt, daer hi eerlic ontfanghen was.