ghe, welcken mantele sleipte vp deerde, want men moesten vphouden als hi ghinc wandelende, ende aen sinen hals hinc een maniere van eenen capkinne, aen beeden sijden opene vp sijn schouderen, ghevoert met ermijnen, ende aen elcke sijde van sinen mantele daer waren.iij.gulden ende selueren strepen elck een elle lanc, ghewrocht met orpheuerye. Ende neffens hem stont sijnen Cancelier, hebbende aen tselue soluer, maer het was van wullen laken Ende die Prinche voorseyde hadde vp sijn hooft eenen hoet van goude, gheheeten een Coronael, ende was seer costelic van peerlen ende van ghesteenten. Ende alle die andere grauen die stonden bi hem met ghelijcke mantels, ende ooc elc hebbende een Coronael vp thooft, maer niet so costelick als die prinche voorseyt. Ende oock ne hadde die Cancelier ne gheen Coronael vp sijn hooft, dye welcke Cancelier stont neffens den Prinche, als sijn taelman, daer naer stont die graue van Maerle, daer naer Anthonis die bastaert graue de la Roodche, in Ardanen, daer nae stont mijn heere Heyndrick vander Vere Graue van Grantprye, daer naer mijn here van Lymbercourt graue van Meeghe, daer naer stont Wulfaert van Borsele graue van Bouchain in Schotlant.
¶ Item voort so sadt voor den prinche een heere die sijn sweert hilt, twelck seer costelick was. Ende neffens aen beede die siden vanden hooghen ende moghenden prinche stonden.viij.heraulten wel costelic toe ghemaect, oock stonden aen beeden sijden noch andere van sijnen dienaers, ende officieren, ende paedgen, ende trompetten, twelc seer eerlic om sien was.
¶ Item daer ghinc die Cancelier doen een schoon relaes byden beuele vanden moghenden Prinche, twelcke wel een halue huere gheduerde, aengaende den here van Kieuerijn voorseyde. Corts daer naer so knielde dye heere van Kieuerijn ende sijn taelman waer of dat die moghende prinche een teeken gaf dat si vp stonden, daer ghinck dye voorseyde taelman verantwoorden, ende gheduerde wel tvierendeel van eender huere, Daer vp dat dye Cancelier sprack.xx.of.xxx.woorden, ende daer mede vertrac dye voorseyde heere met sinen taelman ter sijden of in een camere, ende hem volchden twee Heraulten, ende mijn heere Anthonis die bastaert van Bourgoengien ende mijn heere van Hymbercourt met hem. Ende binnen gheweist hebbende gheen halue huere, soe quamen die Heraulten vooren huyt, waer of dat dye eene sijnen mantel brochte, ende dandere sijn capkin, in ghelijcke alsoe dye ander heeren aen hadden. Ende die here van Himbercourt die brochte sijn Coronael, ende heere Anthonis die bastaert van Bourgoengien dye brochte sijn sweert. Aldus commende voor den edelen ende moghenden prinche, so knielden si alle nedere. Ende die heere van Kieuerijn die quam in een peersch rocxkin van fluweele totter eerden toe, also dandere heren aen hadden, te wetene die Grauen. Ende dye Prinche gaf een teeken dat sy alle vp stonden. Terstont ghinck mijn heere Anthonis dye bastaert van Bourgoengien ende die heere van Himbercourt, ende deden hem aen den mantel ende sijn capkin midts der hulpe vanden heraulten. Ende al daer gorde mijn heere Anthonis die bastaert hem selue sijn sweert commende ouer sijn schoudere met eender rieme, hanghende neffens sijn sijde, in teekene van eenen graue, want eenen Hertoghe die gordtmen tsweert aen sijn sijde, inden middele alsmen hem hertoghe maect. Daer naer nam mijn heere Anthonis dye bastaert van Bourgoengien dat selue Coronael ende presenteirdet den Hertoghe Kaerle van Bourgoengien, dye welcke den heere van Kieuerijn tot hem commen dede, daer hi voor den edelen ende moghende Prinche ghinc knielen, also die edelhede van dien inhoudende es. Ende daer naer stelde die prinche tvoorseyde Coronael vp thooft vanden heere van Kieuerijn met eenen blijden lachenden monde. Ende daer wort hi ontfaen als een graue van Synay.
Item dit aldus gheschiet sijnde, vertrocken van daer, te sinte Donaes messe hoorende, rijdende in schoonder ordonnancie, twee en twee te gadere, ende vercleet alsoot voorseyde es, ende met haren Coronalen vp thooft, ende die Hertoghe Kaerle quam achter alleene, seer rijckelick ende vreimt om
Auteursrechtvrij
