Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volcht vanden Hertoghe van Gheldre, ghenaemt Aernoudt.

¶ Dat.lx.Capittel.

[fol. C.lxij.r]

GHelijc dat hier voren verhaelt es, dat die oude Hertoghe van Gheldre gheheeten Aernoudt, ghecomen was met sinen sone Hertoghe Adolf van Gheldre, by den Hertoghe Kaerle, daer hi doe lach in tvelt van Eeren, buten Atrecht, ende hem den voorseyde Adolf vluchtich maecte ende ontvloodt secretelic vander plecke sonder tweten van sijnen vader, ofte vanden Hertoge Kaerle voorseyde, maer reed sonder vp houden totter stede van Namen, daer hi gheuanghen was, also hier voren eens deels verhaelt es, so es waer dat die hertoge Aernoudt altoos bleef in tvelt by den Hertoghe Kaerle, daer hi hem verhaelde al die iniurie ende cleenicheyt die hem sinen sone ghedaen hadde Adolf voorseyde, hoe wel dat dit aldus gheschiet was van saken van iniurien die hi hem aensegghen wilde, twelcke hy niet vulbrijnghen en conste ter warachtigheden, alle die steden van Gheldre ende van Zutphen themwaert treckende, ghelijc of sijn vader doodt gheweist hadde mer die steden en vielen hem niet ghehuldich.

¶ Item Hertoghe Kaerle van allen saken, wel ende duechdelic gheinformeirt sijnde, Hy badt den Hertoghe Aernoudt, dat hy patientich sijn soude, aengesien dat Adolf sijn sone gheuanghen was onder sine moghentheyt ende iurisdictie, ende daer'in blijuen soude, ende dat hy thuys trecken soude in sijn landt van Gheldre, ende sine heerschapye besittende ghelijc een Hertoghe schuldich es van doene, den welcken raedt dye voorseyde Hertoghe Aernoudt danckelic nam vanden Hertoghe Kaerle, ende hi vertrack met hoofschen oorloue van hem te sinen lande waert, maer hi thuys commende, sy ne wilden hem niet obedieren noch ontfanghen als here, maer si wilden sijnen sone hebben Adolf ende nyement anders, aldus was hy gheandtwoordt in Ghelderlandt in sommeghe steden, maer niet in al.

¶ Item die voorseyde Hertoghe Aernoudt merckende dat hy sijne heerschepie van Thertochdomme van Gheldre niet besitten en mochte, met vriendtschepen ende met paeyse, met sinen steden, ende ghemeenen landen so quam hi weder by den Hertoghe Kaerle van Bourgoengien in Vlaendren binnen sijnre steden van Brugghe. Ende al daer sijnde, bi den hertoghe Kaerle voorseyde, so vercochte hi hem al trecht ende iurisdictie dat hi hadde aen Thertochschip van Gheldre ende aen Tgraefschip van Zutphen. Ende hy ghinc dies te buten, in also vele als hijs machtich was, den welcken coop den hertoghe Kaerle hilt voor goedt ende ghestade. Ende hi bewees den Hertoghe Aernoudt van Gheldre betalijnghe van dien, in sulcker manieren dat sijs beede wel te vreden waren. Ende dit aldus gheschiet sijnde, die Hertoghe Aernoudt van Gheldre die vertrack, ende ghinck woonen in een clooster leedende een goet leuen, daer hi sieck worde, ende corts daer naer verschiet hy van deser werelt, ende sijn sone Adolf dye wordt veruoert, ende gheuanghen ghebrocht in tcasteel te Cortrijcke.

¶ Item in tvoorseyde iaer, die van Doornicke waren iammerlicke bedwongen, ende hadden vele aermoeden binnen haer lieder stede, want sy nyeuwers thooft huyt steken en mochten, so dat si ten eynde obedieerden den Hertoghe Kaerle van Bourgoengien, ende si composeirden met hem bi rechter noodt, so varre dat hy met hem lieden content ende te vreden was.

[Vp den derden dach van Septembre]

¶ Item int voorseyde iaer so wast den schoonsten somere, die men sach binnen hondert iaren, ende ouervloedich van alle vruchten Ende vp den derden dach van Septembre, was binnen der stede van Brugghe nyeuwen Rijnschen most in Dynant, om.vi.groten.den stoop.

¶ Item naer dat die Paeuspaulus gestoruen was, so was een freminuer die Franciscus hiet, gheboren huyt Sauoyen bi Geneueren die welcke was ghecoren Paeus te Roome te sine, Ende in sine consecracie soe was hy gheheeten Sixtus die vierde.