Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Een schoon myracle vanden heleghen bloede Christi, dat te Brugghe rust.

VP den.xi.sten dach van Nouembre, dwelcke was sinte Maertins dach, so was te Brugghe in dye balcstrate gheboren een kint, twelcke onghedoopt begrauen was ende lach drie daghen onder die eerde, maer die moeder riep altijt vp tweerde heleghe bloet van Brugghe, segghende certeyn ic hoore mijn kint leuen. Ende men ghinck tkint ontgrauen, ende men sacht claerlic leuen, ende het wort ghedoopt met haesten ende wort ghedreghen ten heleghen bloede, daer men noch sach sijn aderkins spelen in een becken met laeuwen watere. Ende

[fol. C.lviij.r]

wordt van daer weder omme thuys ghedreghen.

¶ Item in desen tijt so was in thuys van Bourgoengien een here gheheeten Boudewijn de Lyle, bastaert sone vanden hooghe ende moghende prinche den Hertoghe Phelips van Bourgoengien. Ende dese selue Boudewijn was ghegheuen die heerlichede van Somerghen ende van Louerghem, maer die Haeldijnghers van mer Boudin de vos, die wonnen die heerlickhede weder bi naerheden. Ende dese Boudewijn de lyle was soe vul pitsen ende ouerdaets dat hem die Hertoghe Kaerle nyet wel gheluchten en mochte, want hi en dede niet dat hem dye Hertoghe Kaerle sijn broeder beual, maer murmereirde altijt yeghens die heren die tregement in thof hadden.

¶ Item int hof van Vranckerijcke daer diende doe ter tijt een man, die welcke hiet Colinet, ende hi was een parmentier. Ende dese scheppere ende noch twee mannen met hem, dye quamen huyt Vranckerijcke te Hesdijn waert, daer die Hertoghe Kaerle van Bourgoengien was, ende sy brochten eenen brief aen Boudewijn de Lyle die voor seyde bastaert, maer si en dorsten hem nyet ghetroosten den brief te Hesdijn te gheuene, dies bleuen si twee mijlen van daer. Ende si huerden eenen landtsman om eenen penninck dat hi desen brief draghen soude, den bastaert van Bourgoengien. Aldus die bode te Hesdijn commende, hi vraechde naer den bastaert van Bourgoengien. Ende het ghelucte dat mijn here Anthonis die bastaert van Bourgoengien daer was, ende oock mijn heere van Beueren sijn sone bi hem Ende dese bode was aen hem ghewesen metten brieue. Ende mijn here Anthonis die bastaert van Bourgoengien dese brief siende, hi seyde hi en comt aen mi niet, maer aen Boudewijn de lyle. Doe was dye bode ghedaen eten ende drincken, ende hem was beulen te beydene. Doe sandt mijn heere Anthonis dye bastaert van Bourgoengien sinen sone mijn here van Beueren om Boudewijn de Lyle dye bastaert, seggende dat hi quame bi sinen broedere, ende hi hadde ontfanghen eenen brief huyt Vranckerijcke, die aen hem quam. Ende Boudewijn die bastaert dit hoorende, seyde dat hi terstont commen soude, twelck hy nyet en dede, maer dede sadelen drie peerden, ende reedt terstont te Vranckerijcke waert, want hi seere daer in beladen was Mijn here Anthonis die bastaert langhe beydende, ende vernemende dat Boudwijn de lyle die bastaert sijn broeder wech was, hi ghinck metten brieue byden Hertoghe kaerle van Bourgoengien sinen broedere, ende den voorseyden brief vp doende, vonden daer wonder inne, omme twelcke men den bode vraechde dye den brief brochte, waer hi aen den brief gheraect was. Ende die voorseyde bode seggende hoet ghebuert was, so waren een deel aertchiers huyt ghesonden, die den voorseyden scheppere ende sijne twee ghesellen vinghen, ende brochten in den handen vanden hooghen ende moghenden Prinche den Hertoghe kaerle van Bourgoengien. Ende sy waren corts daer naer huytnemende seer ghepijnt, ende sy leden wonderlicke dinghen, omme twelcke sy ghedoot worden, ende waren gherecht. Maer het was een seer langhe poose daer naer.

¶ Item in die selue iaer dye Coninck van Vranckerijcke verander sijn propoost ende sijn ghedochte, segghende tot sijnen heeren, hoe wel dat hy paeys ghemaect hadde te Pyrone metten hoghen ende moghenden Prinche den Hertoge kaerle van Bourgoengien, hi wasser toe verleet ende toe gheraden van eenen Cardenael, ende ooc andere groote heeren, die hem ouer thooft bliesen, byden welcken hy vanden paeyse nyet houden en wilde dye te Pyrone ghemaect was. Voort seyde dye coninck van Vranckerijcke al was hy mede te Luycke, het gheschiede bi smeeckaerdye ende verleedinghe, dye welcke woorden die coninc openbaer preken dede in generale processien al sijn rijcke duere, ende puer wederroupen den paeys die te Pyrone ghemaect was tusschen hem ende onsen moghenden Prinche den hertoghe kaerle, als voorseyde es. Ende aldus quam die mare in vlaendren dat die Coninck van Vranckerijcke emmer orloghen wilde vp den prinche den hertoghe

[fol. C.lviij.v]

Kaerle, of ten ware dat hi hem weder keerde alle die steden ende sloten, die den Hertoghe Phelips ghegheuen waren, inden paeys van Atrecht.anno.M.CCCC.ende.xxxv.by twee Cardinalen, te wetene, die Cardinael van Cypers, ende die Cardinael van sinte Cruys Ende die steden waren hem ghegheuen in soendijnghe van den Hertoghe Ian sijns vaders doot, ende dit waren die steden, Eerst het graefschip van Bolloengien, Machon, Hanseron, Mondedier, Pyrone, Roye, ende tgraefschip van Ponthieu, met den steden ende dorpen vander Somme tot Aryen toe, huyte gedaen die stede van Doornicke.

¶ Item die soude Hertoghe Phelips ghebruycken sijn leuen lanc, ende al tmaerle hoir dat van hem commen soude, of ten ware datment den coninc van vranckerijcke bi vriendelichede wilde laten lossen, om een somme van penninghen daer toe gheordonneirt. Voort weit dat desen seluen paeys weder vernyeut was te pyrone, tusschen den coninc van Vranckerijcke Lodewijc, ende den Hertoghe Karel van Bourgoengien voorseyde, die doe noch maer Graue van Charlois en was. Ende het gheschiede dat die coninc de somme vanden penninghen vp legghen wilde also hy dede. Ende dit was binnen den leuenden lijue vanden Hertoghe Phelips, ende eeneghe seyden, dat mijn heere van croy te Rijssele in tcasteel ghinc ten schatte vanden Hertoghe Phelips. Ende hy leende het ghelt daer huyt den coninc om sine lossinghe mede te doene, het welcke dye Graue van Chaerlois gheware worde aen tghelt, want hi die penninghen wel kende, Ende hi hilt die makinghe ende appointement al van onweerden alsoot bleec, want die heere van Croy ende meer andere met hem die vanden saken wisten quamen bi dien in groter onvriendtscepen yeghens den voorseyde Graue van chaerloys.

¶ Item also hier voren verhaelt es van Boudewijn de Lyle de bastaert, die schandelic ghevlucht was huyt den huyse van Bourgoengien, treckende by den coninc Lodewijc van vranckerijcke Ende hertoge Karel claerlic verstaen hebbende het verraetschip, dat vp hem gheordonneirt was, so sandt hi in sijn drie hooftsteden binnen Vlaendren brieuen van ghelooue om onsen heere te bedanckene, dat die verraderye huyt ghecommen was, ende te dier cause drouchmen processye generael in allen steden met groter deuocie.