AChteruolghende die fellichede vanden coninc van Vranckerijcke, int selue iaer van.M.iiijc.ende lxx. so wort hi den hertoghe karele so seere hatende, ende hy dede liedekens singhen ende speilkins spelen contrarie den Hertoghe Kaerle, ende hi maecte grote ghereeschepe van wapeninghe, omme vp den hertoghe Kaerle te commene, ende al die heerlicheden die Hertoghe Kaerle van hem hilt, dye leyde hi al te sijnder tafele. Ende bouen dien sandt hi eenen eerbaren Aduocaet met eenen huchier de Roy aen den hertoghe kaerle te Hesdijn waert, het welcke den voorseyde Aduocaet seere noode dede, want sine bootschap was fel ende wreet, nochtans die voorseyde Aduocaet Thesdijn commende, ende sprekende yeghens den voorseyde Hertoghe Kaerle, mont yeghen mont, so vriendelic dat hem die Hertoghe Kaerle antwoorde, so dat den Aduocaet daer groote ghenouchte in hadde, want hertoghe Kaerle verghiftede seer hooghelic den voorseyde aduocaet, ende hi dede hem gheleede doen van sinen aertchiers viij.mijlen varre. Ende dese Aduocaet te Parijs commende, hy soude sijn legacie verhalen voor den coninc, maer doe hi began te segghene die edelhede vanden Hertoge van Bourgoengien voorseyde, so stont dye coninc vppe, ende en mochtes niet ghehooren, maer de graue van Dammartijn die vulhoordet, maer ooc met eenen quaden gronde, seggende van desen Aduocaet dat hi beter Bourgoengioens was dan hi conincx was, omme twelcke dye voorseyde Aduocaet ghebannen was huyt alle die croone van Vranckerijcke. Eere ende weluaert, goet, ende sijn schoon wijf verliesende, in groter keytiuicheden.
¶ Item die Coninck sandt eenen brief aen die wet van Ghendt, maer die van ghendt en wilden den brief niet vp breken. Maer si namen den bode met den brieue, ende trocken met hem byden Hertoghe kaerle ontfinc den bode blijdelick ende verghiftene hooghelic, so deden ooc die van Ghendt van ghelijcken, niet yeghenstaende dat sy nochtans nyet en wisten wat inden brief stont ghescreuen.
¶ Item desen bode commende byden coninc, hi seyde so vele duechden ende eerbaerheden vanden Hertoghe Kaerle, dattene die coninck in eenen sach dede schieten, ende dedene verdrincken in die Cheyne.
¶ Item in desen tijt maecte dye Hertoghe Kaerle grote ghereeschepe van volcke van wapenen om hem te verweerene yegens sine vianden, alsoe dat hi al sijne leenhouders bi hem ontboot, vp die verbuerte van lijue ende van goede. Nv so waren wonachtich eeneghe van sinen leenhouders binnen der stede van Doornicke, omme twelcke dye Hertoghe kaerle beuel gaf datmen alle die van Doornicke vanghen soude, waer mense ghecrijghen mochte, dies sloten dye van Doornicke hare poorten toe, ende en lietender nyement huyt gaen, ende die van Doornicke quamen in grooten dangiere midts desen.
Auteursrechtvrij
