Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Messiue ghesonden vanden Coninck Edewaerdt aen dye stede van Brugghe, ghetranslateirt huyten Walsche, in schoonen ende platten Vlaemsche.

¶ Dat.lviij.Capittel.

[fol. C.liiij.r]

EDewaert byder gracien gods coninck van Inghelant ende van Vranckerijcke heere van Hierlant aen hu lieden eerweerdeghe ende speciale vrienden, die edele mannen, scouteeten, Burchmeesters, schepenen, Raden der stede van Brugghe aen elcken van hulieden sonderlinghe saluyt. Eerweerdeghe ende speciale vrienden wi bedachten hu so hooghelic ende hertelic als wi connen ende moghen vander goeder chierde ende vander groter hooschede ende van huwer goetwillegher affectien, die hu ons ghelieft heift te doene, ende te betooghene, also gracieuselic ende mildelic in duechden ende ter vertroostinghe van ons ende huwen volcke, bedanckende ghedurende den tijt dat wy waren in huwe voorseyde stede, ende wy kennen ons grootelic ghehouden in hu lieden, bi welcken dat ghy bekennen muecht, vp dat eeneghe saeken sijn dye wy duer hu emmermeer souden moghen doen, ter weluaert van hulieden ende vander voorseyde stede, kent ons daer toe bereet, beteekenende hu lieden dattet ghelieft heift onsen behoudere by sijnder gracie ons ghegheuen, sichtent dat wy schieden van huwer stede, ende arriueirden aen onsen Coninckrijcke met alsoe gracieuser fortune, dat wy behouden hebben die victorie van alle onsen vianden ende rebellen van herwaerts ouere, ende sijn paeysiuelicke gheseten, ende ghepossesseirt in ons Conincrijcke, ende ooc Coninck ghecroont, ende wel duechdelic gheobegiert, ghelijck dat ghy oock byden brijnghere van desen te vullen sult gheaduerteirt worden, vanden welcken wy gheuen gracie ende lof onsen behoudere ende onser alder salich makere. Eerweerdeghe ende speciale vrienden wy bidden hu lieden te hebbene altijt in sine heleghe gracie ende ghenade. Ghegheuen onder onsen Signet in onser stede van Cantelberghe, aldus gheteekent. Edewaerdt.