Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volcht een gheschil tusschen den paedgen.

VP den seluen tijt waren vele paedgen versaemt inden Haghe voorseyde ende begonsten te roupene diueersche roupen, als Bourgoengien dandere Rauesteyn, ende andere diueersche roupen. Also dat die paedgen die eerst riepen Bourgoengie, die worden ghesteken ouer doot. Ende alle dandere paedgen dye staken ende smeten malcandere, so datter groot gheruchte int hof quam. Ende die prinche alle die waerheyt verstaen hebbende, hy dede alle die paedgen vanghen wel tot.xxvi.toe, ende hi deidse alle bringhen in eene besloten camere, daer hy sommeghe heren bi hem nam. Daer dede hijse alle naeckt ontcleeden, vanden gordrieme vpwaert, ende si twee en twee te gadere, gafmen elck een goede stercke roede in dye hant, ende moesten daer mede malcanderen wel duerslaen, so langhe dat dye Prinche seyde, het ware ghenouch. Ende doen quammer twee varsche paedgen, ende also voort tot dattet al vulcommen was. Ende dit sadt al en sach die gequetste paedge dye eerst den roup maecte, want hy en was niet sterck ghenouch om mede met roeden te slane, alst wel bleec, want hi vander quetsuere starf. Dese paedgen dus wel duersleghen sijnde, so gruwelic dat deerlick om sien was, wanttet som edele iongelinghen waren, som ghebroeders, som rechtsweers, ende som lieue ghesellen. Doen dede die prinche een lanc relaes, hemlieden seere versprekende, dat sy sulcke eene beroerte maecten, ende seyde ten ware sijn grote ontfaermichede, hi hadse alle doen hanghen, maer met dier punijcien, hy vergaft hem lieden alle te samen, ende hi steldese weder elc in sijn officie als te voren. Te wetene wyen sulcx messuus meer ghebuerde, hy soudse doen hanghen. Hier in es wel te merckene dat hi een wijs voorsienich here was in iusticien. Ende dit gheschiede vp sinte Symoen ende Iudas dach, int iaer van.lxix.

¶ Item int selue iaer was den eersten steen gheleyt vanden cloostere van Sinay, staende te Brugghe by sinte Kathelijnen poorte, twelcmen heet een suster colleten. Ende vrau Marie van Bourgoengien Hertoghe Karels dochter, die leyde den eersten steen.

[Den.xvij.dach in Sporcle]

¶ Item in tselue iaer den.xvij.dach in Sporcle was te Brugghe in thof vanden Prinche die brulocht ghehouden vanden ioncheere van Culenburch, ende vander dochtere van mijn heere Anthonius dye bastaert van Bourgoengien.

¶ Item vp den seluen tijt was te Brugge groote vruecht van faeyte van wapenen ende van tornoyen, waer of dat dye beroupere was die sone van mijn heere Symoen de la layn, ende verantwoorde al dat yeghens hem quam, te wetene met scherpen glauyen vp elc drie steken, ende voort met scherpen sweerden hauwende deen vp den anderen, so dat si malcanderen dye sweerden huyter hant sloughen, ende waren so verhit vp malcanderen, datse die heraulten dye daer toe gheordonneirt waren moesten scheeden. Ende daer toe was ghemaect een staedge daer die heraulten vp saten, ende dye heeren diere tornoyden, quamen alle om tcostelicst huyte, ende daer quamen alle daghe ter bane diueersche heeren die dye voorseyde berouper alle moeste antwoorden. Ende die berouper hilt sijn logijst achter sinte christoffels kercke, ende quam also duer een grote poorte in die bane, alsser eenege partyen commen waren, seer chierlic ende rijckelic ghewapent. Ende

[fol. C.xlix.v]

die bane was rondt omme al met staedgen betemmert, daer tvolc vp sadt om te siene die ghenouchte ende tryumphe vanden voorseyde tornoye. Ende die bane was of ghesloten met diueerschen poorten om huyt ende in te rijdene

¶ Vp den seluen tijdt quam Hertoghe Kaerle te Brugghe vp sinte Pieters dach, ten.vij.hueren vanden auende. Ende.ij.daghen daer naer quam margriete zijn geselnede ooc te brugge.

[Den.xxv.sten dach vander maent van Sporcle]

¶ Item die stadt van Brugghe gaf den hertoghe Kaerle een costelic bancket, vp Tscepenhuys, daer die princersse sijn gheselnede yeghenwoordich was. Ende die ionghe princersse Marye van Bourgoengien, ende me Vrauwe van Argue, ende die Bisscop van Luycke.ende dit was den.xxv.sten dach vander maent van Sporcle.Anno.lxix.

¶ Item daer quamen als doe te Brugghe by den Prinche twee groote ambassaden, Deene van oostenrijcke, ende dander van Venegien, beede met schoonen state.

¶ Item inden seluen tijt, alle die Leenhouders vanden Prinche saten vppe ter oorloge waert want men seyde dat die coninc van Vranckerijcke hadde bereedt een armeye van.C.L.duysent mannen van wapenen Emmer altijt onpaeys begheerende yeghens den hertoge Kaerle, sonder cause ofte eenege redene.

[Tsinte Donaes.xxx.in Maerte]

¶ Item in tselue iaer ons conincx van Scotlants sustere ghelach te Brugghe van eenen cnapelicken kijnde, het welcke kint hief me vrauwe van Bourgoengien, ende mijn here van Rauestein, ende was kerstin gedaen tsinte Donaes.xxx.in Maerte int voorseyde iaer.

[Den.vij.sten April]

¶ Item die Prinche vertrac van sijnder stede van Brugghe te Rijssele waert, ende van daer te Kennoyt. Ende die Princersse track naer Eeclo, ende van daer te Ghendt, ende voordt te Bruessele, den.vij.sten April.Anno.lxix.

[Den.xiij.sten van April]

¶ In dit selue iaer.lxix.so wast eenen swaren couden wintere, het vroos biden.v.maenden lanc, waeyende, sneeuwende, stormende vander maent van Decembre, tot den.xiij.sten van April.Anno.lxix.

[Den.xv.sten dach van April]

¶ Item die schotsche coopman hadde een wijle tijdts vervreimt gheweist van Brugghe ende si quamen weder te brugghe vp den palmsondach, den.xv.sten dach van April seer eerlic ghehabitueirt met peerschen sijden habijten, ende som camelot ende andere peersch wulle laken. Ende waren eerlicken ontfanghen wantter vele eerbaer poorters yeghen reden, ende met hem lieden weder in quamen, int selue iaer van.M.CCCC.ende.lxix.