¶ Dit gheschiede svrydaechs ten steicspeele maer daer en was gheen bancket,
ITem die incomste van mijn here Anthonis de Riuieres, here van Schales, broedere vander Coninghinne van Inghelandt, hy was verchiert met gulden cramosijn, peersch ende sijn eerste paedge was verchiert met swarten fluweele, voor die borst ghestrijpt met selueren bellen, vp tfatsoen van Akeleyen Die tweeste paedge was verchiert, met gulden laken Carmosijn, gheboordt met swarten Fluweele, ende dye voorseyde boorden waren gheborduert. Dye derde was verchiert met fluwele, coluer van asschen, verdeckt met gulden laken, duerhauwen vp tfatsoen van borduere, ende met gulden letteren, ende bouen dien met selueren bellen. Dye vierde met purpere, met eender borduere getandeirt met selueren laken, ende beneden met swarten fluweele ghefrijnget, ende met doppen van fijnen goude, ende vp tvoorseyde purpere was een borduere van Akeleyen, die vijfste van selueren laken, fluweel, cramosijn ghetandeirt, met goude, ende met groote selueren bellen. Die seste met blaeuwen fluweele ghedeelt met ermynen, behanghen met selueren bellen, in fatsoene van peeren, ende gheborduert met Akelleyen. Ende alle dese ses paedgen hadden aende mantelkins van groenen sattijne ghefigureirt. Ende dese voorseyde here brac twaelf lancien.
¶ Item om dat die voorseyde gheuanghen ruddere hadde ghequetst gheweist aen sijn hant so quam in sine stede mijn heere van Rauesteyn, verchiert met eenen decksele van orfauerye van goude ende van seluere, inder mannieren van fluweel, cramosijn, ende hy brack xvij.glauyen.
¶ Item dincomste van mijn heere van Lutcenburch heere van Rouchy, hi quam huyt eenen Rijckelicken casteele, sijn peerdt verchiert met witten sattijne gheboordt met gouden draen, met diuersche letteren van sijnder deuijse. Ende hi sandt bi eenen Naen een ghescrifte inhoudende die cause, ende waer omme dat hy was binnen den casteele, waer of dat tinhouden hier naer volcht.
¶ Excellente hooghe ende edele Princersse Vrauwen ende Ioncvrauwen.die Rudder gheuanghen van sijnder vrauwe, ghebiedt hu lieden ootmoedeghe reuerencie, sijn stick es al sulck dat dangier houdt, die slotele vander vanghenesse, ende heift hem gheleydt inden handen van cleender hope sijn dienare. Ende ne sal nemmermeer huyt ghetrocken worden, noch ontsleghen, het en si bider duecht ende compassye van hu, omme twelcke die gheuanghen Ruddere voorseyde supplieert aen hu lieden seere excellente hooghe ende moghende princersse Vrauwen ende ioncfrauwen, dat hu ghelieue by huwer gracie te doen versamen huwe edele ende duechdelicke vrauwelijcke college, want onder andere men soude daer moghen vijnden den voys vanden ghenen in welcken dat dangier, soude moghen of willen doen eenich ontsegghen van my naer ontlastijnghe, te dien hende datmen beuel gaue tot eender hope, dat hi mijn bede ontsluyte, ende my ontslaen van desen druckelicken torre ende vanghenesse, want andersins ten ware dat ic ontsleghen ware, ick en mochte niet commen tot den edelen sticke als voren noch vulcommen ter auentuere vanden gulden boome, twelc ic begheere met alle mijnder herte, ende te blijuene een onderdanich dyenare van hu, ende van allen edelen vrauwen. Ende die tweeste verchiertheyt was van swarten fluweele geboort met fluweel cramosijn behanghen met peerkins van seluere. Dye derde was van sattijn cramosijn, met groote looueren van goude, ende moppen van ghelijcken, die bloemen van seluere ghefrijnget met sabels. Die vierde verchiertheyt was ghemaect al van borduere, met eender vuerst, ende met veynsteren als een huys, daer ioncfrauwen in laghen, ende was die voorseyde verchiertheyt gheuoert met sabels, ende daer vp besaeyt met kauen van seluere. Ende noch stonden daer vp ghemaect potten van borduere, met bloemen ende met vyolieren root ende wit. Ende tusschen elcke twee potten stonden groote letreren van sijnder deuijse, gheuest vp die selue couuertuere. Die seste al van borduere groote looueren van gouden draden ghe-
Auteursrechtvrij