Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Dyt gheschiede sdonderdaechs ten steicspese, ende tsauens ten banckette.

[fol. C.xliij.r]

ITem dincomste van den Graue van Zwolmen, Hy was ontfanghen als vooren, ende hadde bi hem vijf schoon Rudders die welcke alte samen ghecleedt waren met Iorneyen van laken van Damast, peersch, ende swardt. Ende sijn peerdt was verchiert van costelicken gulden lakene peersch, ende sinen schilt was verchiert met peerschen fluwele, met twee schoone letteren van sijnder deuijse, Ende hy hadde vp sinen helm, een vrauwen hooftcleedt seer lanc, ende hi hadde een paedge verchiert van purpere, behanghen met grooten selueren bellen, ende brack.vij.glauyen.

¶ Item die gheuanghen Ruddere was verchiert met sattijn, cramosijn, behanghen met gorgerijnen van seluere, ende hy brack als doe vijf glauyen.

¶ Item dincomste van mijn Here Boudewijn, dye hadde voor hem eeneghe van sinen dienaers, vercleedt met lakene, ende met fluweele, ende sijn peerdt was ouerdect van ghelijcken fluwele, ende daer vp behanghen met selueren bellen, Ende dye mannen waren ghecleedt met blaeuwen fluweele, ghebordt van vooren met houpen, vp tfaetsoen van plumaedgen, Ende achtere, met twee W ghecoppelt te gadere, houdende met stocken onder ende bouen, deene van goude, ende dandere van seluere ende was verchiert met blaeuwen fluweele met groten plumaedgen, ende vp sijn hooft hadde hy eene groote balsane ghefringet met witte, ende hy hadde drye paedgen, Deerste was verchiert met blaeuwen fluweele gheborduert met grooten gouden letteren van sijnder deuijse. Dye tweeste paedge was ghecleedt met gulden laken cramosijn, gheboordt met blaeuwen fluweele, Dye derde paedge was ghecleedt met peerschen fluweele besaeyt met bellen van seluere, ende hi brack drie lancyen seere clouckelic met blijder herten.

¶ Item dincomste van mijn here van Renthy, hi was ontfanghen als dandere, ende hi was gheacompaengiert van vijf Rudders ghelijck met mantelkins van witten sattijne. Ende sijn peerdt was verchiert met swarten fluweele, binnen gheuoerdt met witten sattijne, ende het fluweel duer hauwen met groten letteren, vp tfatsoen van griecxse Y, ende synen schilt vanden seluen, ende vp sijn hooft hadde hi een rijckelicke plumaedge Ende deerste van sinen vijf Rudders was verchiert met blaeuwen, gheborduert met diuersche letteren van sijnder deuijse, ende hadde borduere van groen gouden laken, Dander waren verchiert met gulden laken cramosijn. Ende hi brack vijf glauyen, ende een groot bardoen.

¶ Den gheuanghen man quam doe verchiert met ghelewen sattijne, ende dat besaeyt met hoofden van lupaerden van seluere, hebbende een tonge inde mule van selfs.ende brac.v.glauien

¶ Item vp dien seluen dach was Hertoghe Kaerle ghecleedt met eenen corten keerle van gouden orfeuerye, ende sijn paedgen ende voetloopers keerels van tanneyt fluweel.

¶ Item vp den seluen dach sauents waren gherecht int bancket.xviij.schuetelen spijse, costelic ghestoffeirt, met paeuwen verpluymt ende verwapent, ende swanen ooc verwapent metten wapenen van sinen voorseyde landen ende steden, ende elcke schuetel spijse hadde eenen thorre, met eenen hert daer bouen staende, daer inne dat waren Araenie appelen, ende Garnaet appelen, seer schoone om sien.

¶ Item daer waren oock ten voorseyde banckette Kemels ende Olyfanten, gheladen met tregie, ende andere diueersche speceryen, daer sy ouer tafele mildelick of ghedient waren. Ende dese beesten waren verwapent metten wapenen vanden landen vanden Prinche in diueersche manieren.

¶ In dit voorseyde bancket waren ghetoocht viere pointen vander vromicheden van Hercules. Teerste hoe hi vacht yeghen den viant, ende verloste sijn vrienden huyter helle Tweeste hoe hi street yeghens vele heren ende vrauwen. Tderde hoe dat hi verwan een groot serpent, ende slouch hem thooft of, ende wan sijn.vij.ionghen. Tvierde hoe hi verwan ende dootslouch.vi.grote dieren, ende hoe die vander stede hem vp gauen, ende crooneirden hem. Ende daer naer soe wasser een sot dye mede commen was huyt Inghelandt,

[fol. C.xliij.v]

die'vele lichticheden dede, ende vele goede troenien bedreef, daer ouer tafele, daer heren ende Vrauwen in verblijden.