ontrent tusschen den.v.ende den.vi.hueren, so ariueirde voor mer vrauwe voorseyde een Naenkin, verselschipt met twee officiers van wapenen, deene ghenaemt la Roche, ende dander den gulden boom, leedende eene Ruese by eender selueren ketene. Ende si daer commende, presenteirden der vrauwen eenege articulen, in manieren van faeyten van wapenen, waer of tinhouden hier volcht.
¶ Item dit ghedaen sijne, tselue naenkin leede den seluen Ruese recht tot den gulden boome, by den welcken was een pyeroen, alst voorseyde es, daer dat voorseyde Naenkin vp ghestelt was in eenen setele, ende voor hem een rijckelick laken, vp twelcke stont een quadraen, in vorme van eender orloodge van der zee, alleenlijc loopende een half huere. Ende seer corts daer naer dit voorseyde naenkin metsgaders die twee officiers van wapenen leden den voorseyde Ruese totter poorte vanden gouden boome, ende daer vonden si eenen seer edelen Rudder in een osbare, ghenaemt mijn here van Rauesteyn, den welcken osbaer verchiert was van schilderye van sijnder deuijse verdect met een rijckelic vergulden laken, ende twee swarte peerden die den osbare droughen, ende was verselschipt met vier Rudders, houdende die hant aen den seluen osbare, ende waren alle viere ghecleet met blaeuwen fluweele. Ende achter den voorseyde osbare, so quam een graeu Sommier, dragende.ij.coruen verdeckt met swarten fluweele, behanghen met groten selueren bellen, ende met meer andere stucken van seluere vander deuijse vanden voorseyde heere van Rauesteyn. Ende daer was ghepresenteirt aen die voorseyde officiers van wapenen eenen schilt verwapent met sijnder wapene, omme die ghedreghen ende ghestelt te wordene aen den gulden boom, in teekene omme te willen ghenoughen den Ruddere metten gulden boome, in die wapeninghe bi hem aenghenomen byder vrauwe vanden verborghenen Eylande tinhouden vanden seluen capitele. Ende alsoe was by den voorseyde Ruese ende Naenkin, gheleet die voorseyde here van Rauesteyn tot voor die vrauwen, hem lieden reuerentie doende, ende van daer hem presenterende voor die Iuge, ende doe keerde hy weder, ende vertrac tot buyten der Reke. Ende corts daer naer quam hi weder, ende met hem die voorseyde Sommier, ende.v.Rudders, ende ioncheren met hem te peerde in sijn gheselschap, ende si hadden die ghetughen blaeu van sijnder deuijse, behanghen met selueren bellen, ende ghecleet met habijten van blaeuwe met orfauerye van fluweele
¶ Item die voorseyde gheuanghen Rudder by der vrauwe vanden verborghene Eylande, hi was in een pauwelioen van witter side ende ghelewe, ende daer was hi vp gheseten ghewapent ende al bereedt om dye glauie in te leggene, ende was verselschipt met vij.Rudders ende ioncheeren, met rocxkins van wit laken van damast, gheseten vp peerden, verchiert met peerschen fluweele, ende dat gestoffeirt met grote gouden doppen, ende vp die doppen grote selueren bellen. Ende die voorseyde gheuanghen ruddere hadde vp sijn peert een seere rijckelicke verdecsel van peerschen fluweele, ende.vi.paedgen die die hant hilden aen tpawelioen. Ende dit ghedaen sijnde, si reden metter glauien deen yeghens den anderen, die voorseyde half huere gheduerende. Ende die voorseyde gheuanghen Rudder brack vijf glauien. Ende die voorseyde here van Rauesteyn brac maer twee glauien. Ende daer naer tvoorseyde Naenkin blies den hoorne, ende dye voorseyde Rudders trocken achterwaerts, ende dit gheschiede vp den voorseyde dach. Ende elck reedt noch eens vp den anderen, een ionste doende ter eeren vanden vrauwen, waer of datter nyement gherocht en was.
¶ Item vp desen seluen dach was Kaerle de Valoys graue van Vlaendren.etc. ghecleet met eenen langhen keerle, een elle of meer slepende vp deerde met grote wijde openen mauwen van ghelijcker lancte, ende was een root gulden laken vlu vp vlu, ende gout vp gout, keerle ende mauwen gheuoert met sabels, ende sijn paedgien, ende sijn voetloopers waren ghecleet met blaeu fluweel van orfauerye gouden ende selueren. Ende doe ghinck die voorseyde Prinche ligghen by sijnder bruyt, in thuis van Cranenburch die welcke bruyt doe ten voorseyde huyse ghecommen was met rijckelicke gulden waghens, metter Ducesse van Noordtuelt, ende met der iongher princhersse van Borgoengien, dochter vanden Hertoghe Kaerle
Auteursrechtvrij