Dits die Excellente Chronijcke van Vlaenderen
(1531)–Anoniem Dits die excellente cronike van Vlaenderen–
AuteursrechtvrijBeghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]
[Folio C.xl.v]
| |
voorseyde, omme te siene die ghenouchte. ¶ Item vp den seluen dach sauvents ten banckette, die Hertoghe Kaerle als doe brudegom sijnde, sadt inden middele vander tafele voorseyde, ende in Toosteynde vanden sale te sijnder rechter hant sadt die bruyt Margriete van Ioorc, ende die wedewe vanden Hertoghe Phelips, wyens siele god ghenadich sy, moedere vanden voorseyde brudegomme, ende haer volchde me ioncfrauwe Marie van Borgoengien, die dochtere van den voorseyde Hertoghe Kaerle, dye bisschop van Vendune.
Die legaet van Roome ♥ Die bvisschop van mets Die bisschop van Camerijcke Een edel rudder huyt Borgoengien. Ende aen die slincker sijde vanden Hertoghe Kaerle sadt die wedewe vanden Hertoghe van Noordtwijck Die bisschop van Salsbry. ♣ Me vrauwe van Arguwe Ende die bisschop van Hutrecht
¶ Item voort alle die tafelen die inde voornoemde sale waren, die waren alle ghestoffeirt van sittende persoonen, van Rudders vrauwen, ende ioncfrauwen. Ten welcken banckette, ofte auentmael waren ghedient xxx.schuetelen spijsen van rooste, waer toe dat gheordonneirt waren.xvij.schepen, te wetene huyter name vanden.xvij.landen, daer die voorseyde bruydegomme here of was, welcke schepen waren ghemaect van houte, als craken, hulcken, crauweelen. Ende dese voorseyde schepen waren alle vergout met fijnen goude, so costelick datter hem elc in verblijden mochte diet sach, met meersen, ghetau ende taclen al van goude, den mast ende Ra al vander ghelijcken, ende elc schip was verchiert met diueersche wapenen van alle den landen, ende elc schip was gheuult van alle manier van rooste, datmen conste ghepeynsen, so dat die spijse so hooghe lach in die voorseyde schepen totter haluer lanckte vanden maste, welcke schepen waren oock ghestoffiert met mannen van wapenen, ende van bussen ende serpentijnen elck gheschict tsijnder behoorlicker stede, so den schepen toebehoort. Item die saussen dienende ter voorseyde spijsen die waren ghedient in hespinghen ende in booten vanden voorseyde schepen, oock alle ghemaect van ghelijcker stoffe ende costelicheyt als dandere voorseyde schepen. Ende ten sijne datter noch memorie sy langhe tijt vander voorseyde triumphe, so staet in sommeghe coronijcken een schip ghemaeckt, inder manieren also dat toe ghinck. Ende noch vintmen seluen schepen in wesene, want ic Andries die smet die dit screef, hebben een sien staen voor die langhe moeder Gods, in sinte Saluators kercke in die stede van Brugghe. ¶ Item noch soe warender ghedient.xxx.pasteyen, ende bouen elck so stont eenen rijckelicken torre ghestoffeirt van goude ende van anderen diueerschen colueren, welcke torren costelic behangen waren metten wapenen vanden landen ende steden vanden voorseyde Hertoghe Kaerle, twelc seere schone was om sien. Ende binnen der voorseyde maeltijt quam in die sale eenen groten Eenhoorne, ende hi hadde vp sinen rugghe eenen gulden Lupaert, houden inden claue een banniere metter wapene van Inghelant, ende eene schoone Margriete, die leedede den voorseyde Eenhoorne lancx der sale van tafele ter tafele. Ende daer naer soe quam daer eenen groten leeu, daer vp dat sadt eenen schonen Cheraphin, houdende in die hant eene costelicke banniere metter gheheelder wapene vanden voorseyde Hertoghe van Borgoengien, ende ghinc in sghelijcx van tafele te tafele, twelc seere vreimt was om sien.
¶ Item daer naer so quammer eenen groten Kemele, gheladen met twee koruen, ende daer vp sadt een mooriaen, die in sghelijcx van tafele te tafele ghinc, verghiftende die ioncfrauwen van dat hi huyt sinen paenderen haelde. Eerst een ghecrooneirde duuinne, ende veel partrijssen, ende deelde oock elcken costelicke Tregye.
¶ Item tes te wetene dat in die voorseyde sale stont ghetemmert een Tresoor.vi.trappen hooghe, daer vele costelicke yuweelen vp stonden van gouden ende selueren flasschen ende cannen, ende costelicke nappen sonder ghetal, onder welcke waren.iij.costelicke potten fijn cristallijn gestoffeirt met goude, so datmen | |
[Folio C.xli.r]
| |
die costelicheyt vanden yuweelen nauwe souden connen ghescrijuen. |
|