Dits die Excellente Chronijcke van Vlaenderen
(1531)–Anoniem Dits die excellente cronike van Vlaenderen–Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]
¶ Dat.lv.Capittel.![]() | |
[Folio C.xxxix.v]
| |
DIe hooghe ende excellente Ruddere mijn heere Anthonius die bastaert van Bourgoengien, hem onlancx naer der middernacht een vreimt visioen gheschiet sijnde, byder gracie ende voorsienicheyt van Venus der goddinne, als dat hem dochte dat hi ghereden quam in vreimden landen, vele wonderlicke auentueren lijdende byder hulpe ende bystandichede van Venus voorseyde. Also hem dochte dat een vrauwe gheheeten vrau Eere, hem brochte in een verborghen Eylande terstont haer mueghende hant aen hem slouch, ende leedene als gheuanghen man in een besloten costelic casteel, daer hi vant vele gheuanghene Rudders, dye welcke voorseyde vrauwe hadde eenen Naen van sulcker subtijlheyt sijnde, dat hy eenen Ruese gheuanghen hilt met een selueren ketene. Ende dese Ruese sadt ghebonden aen eenen gouden boom, neffens welcken boom stont een pyroen vp drie pylaren, deen neffens den anderen, groen, peersch, ende ghelu, ende daer vp sadt desen voorseyde naen, wachtende wie den voorseyde Eylande nakende was Ende in dit voorseyde visioen openbaerde haer die voornoemde vrauwe vanden Eylande voorseyde, ende seyde dat hy nemmermeer huyt hueren handen gheraken en soude, of hi en moeste belouen te doene een faeyt van wapenen yeghens elcken Rudder dye van buyten commen soude. Ende so wie dat ter commen wilde, dye moeste cloppen met eenen gouden hamere voor die poorte daer toe gheordonneirt. Ende die Naen sijn cloppen hoorende, soude met den gheuanghen Ruddere gaen ter poorte, ende halen den rudder van buyten inne, dies soudemen sijn wapene hanghen aen den gulden boom voorseyt, in een ghedinckenesse van groter eere ende dit vulbringhende, soude hi hem seluen moghen verlossen. Ende mijn heere anthonis die bastaert voorseyde ontspronghen sijnde huyt desen vriendelicken visioene beloefde in hem seluen dit visioen te vulcommene in properen persoone openbaerlicke voor alle dye weerelt vp den seluen tijt, ter eeren van allen edelen, vrauwen, ende ioncfrauwen. Ter welcker cause mijn here Anthonis die bastaert voorseyde, dede stellen eenen gulden boom te Brugghe, vp dye marct, ende dede maken een driecante pyroen, met drie pylaren, groen, peersch, ende ghelu. Ende rontdomme den pyroen daer stont ghescreuen in gheluwe letteren aldus. De che pyron nulluy ne prent meruellie
Car cest vngenprise qui noble cueurs reuelie
Pour souuenir de la tant honnoree
Dame dhonneur et layssee, celer.
¶ Item mijn heere dye bastaert voorseyt, ghecreech eenen Naen ende eenen Ruese inder seluer manieren dat hem het visioen ghebuerde, ende was gherieuende al dat commen en gaen wilde. Ende es te wetene dat mijn heere dye bastaert hem dede heeten den gheuanghen Ruddere, ende daer was te winnen een peert met harnasch, ende verdecsele. Ende tes waer dat dese edele bastaert maken dede voor dye halle vp die marct eene costelicke poorte, met twee schone torrens, daer sijne trompetten vp waren. Ende huyt elcken torre stack eene witte sijden banniere, met eenen gulden boom. Ende aen die duere vander poorte stont eenen gulden boom, ende insghelijcx vp tnoorteynde vander poorte stont oock eene gulden poorte, verchiert met gulden boomen, ende daer hinc aen eenen gulden hamere om voor dye poorte mede te cloppene. Ende dit steicspel hiet tspel vanden gouden boome. |
|