Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Die Makelaers.

¶ Item vp den houck van sheergherwijns strate, tot aen thuys van sinte Martijn, daer stont een rijckelicke poorte, ende een schoon parck daer bouen datmen tooghde den ionghen Tobyas, trauwende dye dochtre van Raguel, ende Gabulon commende huyten Rages verblijdt sijnde vander salegher Brulocht, sprac int ghescrifte dese woorden.

Benedittio super vxorem tuem, et superparentes tuos, vt videatis filios vestros, et filiorum vestrorum, vsquis ad terciam et quartam generationem.      Nota.

¶ Item het es waer, dat alle dese figueren van deser hoogher brulocht gheordonneirt waren, ter goeder waer omme, als gode biddende, dat dese edele ende hooghe brulocht in salicheden vulhenden mochte. Ende dat sy mochten ghecrijghen saleghe generacie ter eeren gods, ende ten weluarene van allen Sprinchen Landen.

¶ Oock salmen weten dat op den meestendeel van desen poorten stonden maechdekins die welcke der bruyt stroyden, als si passeirde excellentelix coorne ende roose bladeren ende waren vp alle dese voornoomde poorten diuersche instrumenten van muysijcken. Ende in dese manniere was dese edele bruyt ontfanghen, twelck haer seere danckelic ende bequame was.

¶ Ende me Vrauwe die Bruydt aldus ontfanghen sijnde, so waren die vander wet van Brugghe al nyeuwe ghecleedt, met swarten lakene van Damast. Ende si trocken by me Vrauwe die bruydt, alst tijdt was ende pas gaf. Ende si presenteirde haer eene nyeuwe sinte Margriete van seluere vergoudt meesterlic ghewrocht, weghende.xl.marc troys ghewichte, die welc si in dancke nam.

¶ Item vp den sondach vander Brulocht Hertoghe Kaerle gaf elcken heere die vander oordene was vanden tooysoene, eenen Rooden gouden laken keerle tot eenen bruydt sticke, ende daer naer andere officieren vanden Houe, hadden swart laken van damast, ende andere die hadden camelot, elc naer hoocheyt van state ofte office, ende andere cleene hadden swart laken, ende die alder minste dienaers hadden al nyeuwe cleederen, claeu ende wit, ten fijne so datter nyement en was in thoft, ten bleec dat hi een bruydtstuck hadde, ende verblijde metter brulocht vander voorseyde Bruydt.

¶ Item bouen der poorte vanden houe daer stont een chierlic yuweel van hout ghesneden, ende was een tafereel met.ij.gulden leeuwen, die welcke hilden Hertoghe Kaerls wapene, vulmaectelic met sijnder oordene Ende daer ontrent hinghen alle dye wapenen van sinen landen, ende aen elc sijde vander poorte stont een schottere, deene was een Cranekinier, ende dander was een turcx Aertchier, huyt wiens pijlen goeden vloeyde, in twee schoon steenen vonten daer toe gheordonneirt, van welcken wijn dat elc drincken mochte diet gheliefde, ooc warender schone nappen toe ghemaect om huyt te drincken.

¶ Item binnen der seluen houe aen die westsijde daer die consierge woont aenden muer daer stont eenen ghulden boom ghewronghen, ende een nest daer vp, daer inne dat sadt eenen pellicaen, die sijn ionghen opende sijn borst, ende huyter borst liep meest alden dach goeden ypocras.

¶ Dit es die ordonnancie vander Sale.

¶ Item aen die oost sijde vander plaetse ende aen die suyt sijde vander cappelle lancx den ouden caetspele, was ghetemmert een sale, bi temmerlieden van Bruessele, alsoot voren verhaelt es, ende vanden Tritsoore westwaert, so waren die bancken trappewijs ghemaect, daer vp dat stonden ende saten die vrauwen dye daer quamen om die feeste te siene. Ende in twest eynde vander sale so was ghemaeckt

[fol. C.xxxix.r]

een staegde bycans also breedt als die sale wijdt was, ende daer waren vp ghespeilt battementen, ende was al behanghen met tapijtserye vander wapene vanden Hertoghe Kaerle, ende daer waren voren ghemaect scuuende gordijnen van groenen semyte. Ende als die vrauwen dansten ende houeerden, soe stonden dye speillieden daer vppe met grooter triumphe.

¶ Item in dye Sale voort waren ghemaect hanghende twee groote Casteelen van Schilderye, elck Casteel met acht aermen, ende vp elcken aerm een groote wassene keersse, ende aen elc casteel stonden.vij.groote spieghelen also rijckelick alsmense maken mochte. Ende huyt den eenen casteele neffens der tafele vander bruyt quam by tijden een drake, die vier schoot, twelcke seer wonderlic was om sien, ende draeyde tvoorseyde casteel nv eens nv anders, ooc waren inde voorseyde casteelen diueersche personaedgien van mannekins, dansende, ende andere vreimtheden bedrijuende.

¶ Item aen elcke sijde vanden casteelen lancx der salen hinghen vi.houten crucen gheschildert wit ende blaeu, ende vp elck cruce stonden vijf wassene keerssen, sonder dye toortsen, diemen achter die sale drouch, ende was so wonderlic ende vreimdt om sien, dat hem elck verwonderde. Ende voort vanden bancketten, ende maeltijden, ende ioostementen, die staen hier naer in tlanghe in tfayt van wapenen dat mijn here Anthonis die Bastaert dede ter weerdicheyt vander edelhede ende vanden hooghen ende excellente feeste, ende ooc ter eeren vanden vrauwen ende ioncvrauwen diere waren.