Dits die Excellente Chronijcke van Vlaenderen
(1531)–Anoniem Dits die excellente cronike van Vlaenderen–Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]
¶ Dat.lij.Capittel. | |
[Folio C.xxxiiij.v]
| |
ALs nv ouerleden was Elizabeth van Borbon hertoghe Karels wijf, ende die mare van dien quam in Inghelant aen den coninck Edewaert, doe seyde die coninc tot sijnder sustere Margriete. O mijn sustere ende mijn liefste yuweel, naer dat die Hertoghe van Borgoengien wewaer es, so wildick wel dat hi hu ghebueren mochte tot eenen man, waer vp dat die schone maecht Margriete antwoorde gaf. Dat god aen mi ghehouden heift dat sal mi wel gheworden. Doe sprac die coninck, o mijn yuweel het ware goet visch diene wel ghevanghen conste. Ende van dyer tijt voorwaert, worde dye maecht voorsede ontsteken met liefden totten voorseyde hertoge Kaerle, ende hem wort ontdect van huerer duecht, huyten welcken hi haer al temet seyndende was ghiften van vriendelicheden, waer bi si noch veel meer liefden them waerts ghecreech.
¶ Item vp eenen saterdach auent, soe quam die voorseyde Margriete byden coninc haren broeder, die welcke si vant alleene staende met eenen Ruddere aen een Tresoor. Ende die Coninck willecommende sijn sustere, vraechde wat haer begheerte ware. Ende si sprack, here ic vaste alle saterdaghen, ende so doet ghi ooc, daer omme comme ick tauent met v collacie houden. Ende in tbeste vander collacie so stont dye voorseyde maecht Margrieten vp, ende viel voor den coninc hueren broeder vp huere knyen, ende seyde. Mijn alder liefste here, ghi seyt eens tot mi vanden hertoghe kaerle van Borgoengien dat hy een goed visch ware, diene wel gheuanghen conste. Weit weerde heere dat ick byder gracien gods dien visch wel vanghen soude, in dien ghi mi daer inne ghehulpich wesen wilt, want hi mi hopick in goeder weerden heift. Ende daer vp so gaf antwoorde die voorseyde coninc aldus. Mijn sustere aen my en sal van dien nemmermeer ghebrec sijn, want ic ben gode lof gemmen tot mijnder vaderlicker erue, ende ick sal nu ooc helpen met lijue ende met goede. Aldus so rees die liefde tusschen hem beeden, ende heymelijck waren hier tusschen vrienden wandelende. Ende ooc mede die coninck sandt den bisschop van salsbry byden Hertoghe Kaerle, die in tvoorseyde huwelick neerstich laboreirde, so dat thuwelick ghenouch secretelick ghesloten was, alsomen hier naer wel hooren sal.
¶ Item huyt Vranckerijcke quam een groot Ambassade aen den coninc van Ingelant, doende een groot relaes ende makende dye maniere, al of si niet en wisten datter eeneghe handelinghe was tusschen den hertoghe van Borgoengien, ende der maecht voorseyde. Ende versochten of die coninck Edewaert soude willen gheuen sijn sustere in huwelicke den Hertoghe van Berry, die coninc van Vranckerijcke soude met hem gheuen in huwelicke, het Hertochschip van Guyenne, ende het hertochschip van Gasscoungien. Ende waert dat die voorseyde coninc dat niet en geliefde, ende hi dan sijne suster wilde gheuen in huwelicke den hertoghe van Calaberen, die coninck van Vranckerijcke soude selue also vele gheuen metten voorseyde hertoghe in huwelicke, als die Coninck Edewaert van Inghelant soude gheuen met sijnder sustere.
¶ Item die coninc van Inghelant dit horende ende wel verstaende dat die fransoysen huyt waren omme te belettene het huwelijc tusschen den hertoghe Kaerle ende der voorseyde Margriete, hi gaf antwoorde die ambassaden van Vranckerijcke, als dat hy noch niet beraden en was sijn sustere te huwene.
¶ Item die voorseyde ambassaduers hadden altoos gheerne ghesproken noch breedere metten Coninck van hueren saken, maer die coninck Edewaert absenteirde hem altoos van hem lieden daer hy mochte. Ende als si dat ouermercten, so trocken si te Vranckerijcke waert met eenen drouuen sinne. Ende het voorseyde huwelick vanden Hertoghe Kaerle ghinc vaste voort, metsgaders dat mer tusschen beeden neerstelic laboreirde. Ende tes te wetene dat Hertoghe kaerle maecte grote ghereetschepe yeghens dye bruylocht, want vp dien seluen tijt so verwrochten die goutsmeden te Brugghe.ij.duysentich marc seluers om platteelen te makene, ende om te dienen in die brulocht vanden Hertoghe Kaerle van Borgoengien. Ende vp dien seluen tijt so verwrochten die tinnepotghieters te Brugge.xxiiij duysent pont tins, om oock te orborene in die voorseyde brulocht. | |
[Folio C.xxxv.r]
| |
¶ Item in die selue tijt was te Brugge in sprinchen hof ghemaect ende ghetemmert een seere groote sale, ende dat bi werclieden van Bruessele, welcke sale wel.C.voeten lanck was, ende wel tachtentich voeten wijt, huyt ghedaen dye vertrec cameren aen beede den sijden, die welcke sale van binnen al behanghen was met wullen laken, blaeu ende wit, ende die verhemelthede also wel als die eynden, ende die sijden. Ende in die selue sale, so hinc beneden den lakene costelicke tapijtserye vander hystorie van Gedeon seere ghenouchlic.
¶ Item aen die noort sijde vander sale stont een costelic tresoor ghetemmert, ende vp thooft eynde hinc een gulden laken, ende daer stont een hooghe tafele daer die voorseyde Prinche met sinen edelen vander oordene sine maeltijt aen doende was. Ende in die voorseyde sale stonden groote veynsteren vul van witten glasen, ende ooc eeneghe veynsteren sonder glasen, omme te meerder lucht te ontfane. Ende den oostgheuel ende den westgheuele waren al vul glasen veynsteren, ende den vloer beneden was al verplanct van houte. Men moet weten dat die vrauwe Ysabeele van Poortegale des Hertoghe Karels moedere in dyt werck seere neerstich was omme alle dinghen ten chierlicsten te helpen beschickene. |
|