Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe dye Hertoghe Kaerle van Charlois]

Hoe dye Hertoghe Kaerle van Charlois, Graue van Vlaendren Reedt naer sijn stede van Brugghe, om sinen behoorlicken eedt te doene, daer hem groote Eere ende triumphe bewesen wardt.

[INt selue iaer van.lxvij.den.ix.sten dach in April]

INt selue iaer van.lxvij.den.ix.sten dach in April, dwelcke was vp den Palm auent, doe quam Hertoghe Kaerle te Brugghe, daer hem grote eere ende weerdicheyt gedaen was van te tooghene schoone personaedgien, vander cruyspoorte, tot sinen houe toe, dwelc hem seere bequame was, ende alle die trempetten ende claeroenen van seluere stonden vp die cruyspoorte, ende vp tschepen huys.

¶ Item als hi quam tusschen der calommen ende sint Obrechts cappelle, daer quam dye Bisschop van Doornicke eyghens hem, ende noch een bisschop huyt Inghelant een predecaer seer rijckelic, yeghens welcke twee prelaten hi beetede van sinen peerde, ende knyelde ter eerden, ende cussende dat heylich euangelie, ende wijwater ontfaen hebbende, sadt weder vp sijn peert, ende reedt ter stede waert inne.

¶ Item als hy quam aen dye Oostburch poorte, daer beete hi weder van sinen peerde, tot welcker plaetse lach een gulden laken, ende een cussen daer vp ooc van gouden lakene. Ende daer quamen yeghens hem meester Anthonis aeuroen, als proost van sinte Donaes, ende meester Roelant die scrijuere

[fol. C.xxxiiij.r]

als dekene van.s.Donaes, ende ontfinghen hem seer weerdelicken, daer hem die voorseyde proost brochte een cruyce dat hi cussede, ende die Dekene gaf hem speerswatere, ende also leedden si den Prinche met processyen tot inden choor van sinte Donaes kercke. Ende daer sijn bedinghe ghesproken hebbende, stont vp ende ghinc tot den hooghen outaer, daer hem ghelesen was trecht vander helegher kercke, twelcke recht hi beswoer. Want alsmen hem vraechde, so gaf hi antwoorde in latijne segghende. Ita iuro. Ende van daer so ghinc hy vp tschepenhuys daer hem meester Ian van Huerne sijnen eedt staefde ter veynsteren huyte, ende in teeken van ootmoedicheden soe ontdeckte dye Hertoghe sijn hooft, ende custe tcruyce. Ende dit ghedaen sijnde, meester Ian van Huerne pensionaris vander stede van Brugghe, sprack nederwaert totten volcke daer een viercant parc ghemaeckt was van houten baelgien, in welcke parc nyement en stont, dan die hooftmannen ende die Dekenen met haren eeden, sonder meer. Ende dye voorseyde Pensionaris dede den hooftmannen ende Dekens hueren eedt doen in deser maniere. Graue van Vlaenderen ghetrauwich te sijne, ende gheene anderen here te kiesene, ende sijn palen van Vlaendren te helpen houdene, sijn onrecht te helpen wrekene met lijue ende met goede, ende al te doene dat goede ondersaten schuldich sijn van doene. Daer dat dye voorseyde hooftmannen ende Dekenen riepen met luyder stemme ende met blijden voyse. Iae wy, iae wy. Ende die Hertoghe Kaerle dat horende riep selue. Noweil noweil. ende dit gheschiede vp den seluen dach ontrent den.vi.hueren van den auende met groter blijschepe.

¶ Item die halle van Brugghe was voren behangen met wit, root, ende blaeu, van schonen wulle lakene. Ende alle die nacien waren eerlic ende rijckelic ghecleet, ende alle die huysen waren behangen lancx der straten, ende ghestoffeirt met meer andere costelicheden

¶ Item die prinche byden blenden ezele duer dye hudeuetters plaetse ouer die groote eeckhoutbrugge duer die wulle strate ouer die marct voor bi sinte Christoffels kercke, tot in sijn hof, want vp den steen waren ghestoruen eenghe lieden vander pestelencie, daer omme en reedt die prinche duer die breyelstrate niet. Ende es te wetene dat die.ix.leden elc te sijnder plaetse gheordonneirt, deden tooghen schoone figueren van stommen personaedgien, seere rijckelic, dienende ten propooste vanden ontfanck vanden prinche, die met victorien in quam als doe.

¶ Item die stede van Brugge presenteirde den Hertoge Kaerle.ij.schone selueren beilden vergult, seer costelic toeghemaect, elc beilde weghende.xl.marc troys gewichte, waer of teene was tbeilde van sint Ioris, ende tandere van sinte Barbele. Dyt gheschiede int iaer van.lxviij.

[Den.xix.dach in April]

¶ Item sdysendaechs in die paesschedaghen, dwelcke was den.xix.dach in April. Anno lxviij.dede die prinche sinen eedt in slandtshuys vanden vryen, ende sy presenteirden den prinche.xl.marc seluers vlaems, raeu ende onghewrocht, daer mochty of doen maken dat hem gheliefde.

[Den.xxi.dach in April]

¶ Item den.xxi.dach in April. Anno.lxviij.dede hertoghe Kaerle sinen eedt ten Damme ende daer dede hi sijn noenmael. Ende van daer track hi metten ghetijde ter sluys, daer hi sghelijcx ooc sinen eedt dede, ende twas beede vp eenen dach. Ende buyten Brugghe laghen vele ballinghen, die welcke den prinche baden neerstelicke om sine gracie. Ende die prinche gaf die meeste menichte haer stede, also wel die ghebannen waren metter duergaende waerhede al metten eerlicken dijnghedaghen, maer die ghebannen waren van tweedracht ende twist te makene, dye en hadden gheene gracie.

[Vp den.xxij.sten dach vander seluer maent]

¶ Item vp den.xxij.sten dach vander seluer maent trac die prinche te Zeelant waert, daer dat mijn here Lodewijc vanden gruythuyse voren ghesonden was, met een deel ghewapender mannen, ende die Prinche track corts daer naer achtere.