Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe dye Hertoghe Kaerle begonste te houdene sijn oordene vanden gulden Vlyeze.

¶ Dat.liij.Capittel.

ITem int iaer.M.iiij^c.ende.lxviij.den.vij.sten dach van Meye doe begonste die Hertoghe Kaerle sijn oordene te houdene vanden gulden Vlyeze, ende was vp eenen saterdach versamende in deser naeruolghender manier alle sijn edelen. Eerst so ghinghen sijn edelen processye wijs, twee ende twee te samen totter kercken van onser vrauwen.

¶ Item daer naer quamen.xxij.Heraulten ooc te voet, verwapent met diueersche wapenrocken huyt diueersche landen. Te wetene, huyt Cecilyen huyt Bertaengien, huyt Normandyen, huyten lande van Cleue, ende huyten lande van Gheldre.

¶ Item daer naer so quam te peerde ghereden den Secretaris vanden Toysoene, ghecleet met eenen rooden langhen keerle, ende met een roode mutse vp sijn hooft ende eenen rooden capproen vanden seluen, die welcke hiet meester Martin van steenburch

¶ Item ter luchter hant vanden voorseyde Secretaris, so reedt die Heraut vanden Toysoene hebbende eenen rooden keerle aen, ende een roode mutse vp sijn hooft, aen sijnen hals een costelicke coliere van goude, daer alle die wapenen vanden heeren vanden Toysoene in gheamaelgiert stonden.

¶ Item daer naer quam mijn here die bisschop van Doornicke te peerde, als Cancelier vanden Toysoene. Ende ter luchter sijde reedt die Hofmeester mer Pieter bladekin, als Tresorier vanden Toysoene, ende was ooc ghecleet met eenen rooden keerle, ende eenen rooden capproen vp sijn hooft.

¶ Item daer naer so quamen dese naeruolghende heren vander oordene vanden Toysoene, ende die hadden aen roode clocken, die gheuoert waren ende costelick gheborduert met gouden metten vierslaghe, ende ooc gheuoert met witten fineirde, ende elck hadde vp sijn hooft eenen rooden sijden capproen, ende reden processye wijs in deser manieren, ende eerst alleene.

Mijn Heere vanden Gruuthuyse

Philippe Pot

Thybault Neufcasteel

Anthonis de Bastaerdt

Adolf van Cleuen

Ian Heere van Auxsy

Ryenoudt van Breeroode

Ian du Neufcasteel

Hendrick van Borsele

Iacob Heere van Cricky

Symoen de la Lain

Pieter van Beffremont

Begghe de Lannoy

Kaerle Hertoghe van Bourgoengien. etc.

¶ Item in deser rijckelicker manieren soe reden dese voorseyde.xiiij.heren tsanderdaechs te Vespere, ende tsondaechs ter hoochmesse Ende es te wetene dat dese voorscreuen heeren vp den seluen sondach sauonts reden ten.vij.hueren vanden auende ter Vigelie, al met swarte clocken ende swarte capproenen. Ende des maendaechs ter sielmesse van ghelijcken

[fol. C.xxxv.v]

elck metter ordene.

¶ Item ontrent den seluen tijt, mijn heere Anthonis van Croy, Graue van Persen, ende van Remy, ende mijn Heere Ian van Croy, ende Ian heere van Lannoy souden gheweist hebben te deser feeste, maer si vertrocken alle drye, Ende en quamen in Brugghe nyet sdaechs te vooren.

¶ Item vp den sondach so was die wapene verdeckt met swarten Lakene, vanden Graue van nyueers, ende daer was gheuest een papier, daer in gheschreuen stont, dese naer uolghende sin, Die Graue van Nyueers ghedachuaert by sekere bekende letteren vanden seer hooghen ende excellenten Prince den Hertoghe van Bourgoengien, beseghelt metten seghele vander oordene van den gulden Tooysoene, omme te compareirene int capijtele, ende te antwoordene vp die confusie diemen hem aenseggende was, ende hi en heeft niet ghecompareert noch gheantwoordt, omme tproces te schuwen, heeft weder ghesonden sijn coliere vander ordene, ende wt dier causen, en is hi niet gheroupen gheweist ter offerhande.