Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe dye Hertoghe Kaerle ghinc siedge legghen, voor dye Stadt van sint Truden, met allen sijnder macht van sinen edelen heeren Ionck ende Houdt.

[Vp den.xxvij.sten dach van Octobre]

ITem inden eersten als hertoghe Kaerle al sijn volck vergadert hadde, so ghinck hy siedge legghen voor die stadt van sint Truden. Ende daer quamen die van Luycke met groter macht omme die stede van sint Truden ontset te doene, daer dat sprinchen volc stoutelic yeghen ghinc, gruwelicken dootslaende ende veriaghende, also dat die van Luycke daer moesten dye vlucht nemen, ende lieten der al haerlieder artijlgerye, ende hare waghens met hueren vitaelien. Ende desen slach gheschiede vp den.xxvij.sten dach van Octobre. Anno.M.iiij^c.ende.lxvij.

¶ Item die van Ludeke lieten in dien slach bedt dan duysent mannen. Ende daer bleef versleghen heer Enstaes van strael, haer lieder standaert draghere, ende die here Barrado

[fol. C.xxxij.r]

Rudders, ende al dander liepen daer wech inde schermutsinghe vanden auende.

¶ Item daer waren van onsen Prinche ghemaect vele nyeuwe Rudders huyt diuerschen landen, omme dat sy hem lieden daer so vromelic ghehadt hadden in de battaelgie, Ende eerst,

Ian van Crunijnghen
Aelbrecht van Schauen
Willem van Schauen	Broeders
Ian van Schauen
Floreyns van Zaemslachte
Zweer Monfoort	♣
Ian Roycroocs kijnderen	♣
Kaerle van Huytkercke
Ioos van ghistele

¶ Item daer naer ghinc die Hertoghe Kaerle vromelick stormen vp dye stede van sint Truden, dye welcke hem vp gauen, hem lieden kennende verwonnen, ende dit was vp alder sielen dach. Ende die Hertoghe Kaerle bedwanck die lieden van sint Truyden, dat sy selue haer poorten ende mueren moesten vellen, ende raseren, ende nemmermeer Anecx te sine den lande van Luycke.

[Vp sinte Maertins dach]

¶ Item vele vanden Capiteynen trocken voor Burchloon, dat si wonnen, ende ooc wonnen si tcasteel van Hoyre, ende dadent verbarnen, ende was ghepijlgiert, voordt wonnen si ooc die stede van Hasselt, hooftstede vanden Lande van Loon. Ende noch wel.x.of.xij.schoone dorpen waren alle ghepilgiert ende verbarrent. Ende ooc wonnen si Hiercke, ende Bilsen, Bree, Masel, Barijnghen, Heyentongheren, Halen, Hooyen, ende Tuwijn, alle dese steden waren bedwonghen dat si selue hare poorten ende mueren vellen moesten. Ende dit aldus ghedaen sijnde, so track die Prinche met eenen groten heyrcrachte voor die stede van Luydic en sloucher siedge vooren. Ende hi dede der stede grote foortse met assaulte, so dat si hem vp gauen inde ghenadicheyt vanden Prinche Ende dit gheschiede den.xi.sten dach van Nouembre. anno.M.CCCC.ende.lxvij.vp sinte Maertins dach. dits tincarnacioen van dien

      Elue in nouember creech Kaerle ludic.