Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Dyt naervolgende es dye derde vaerdt, in Tlandt van Luycke.

[In tselue iaer.M.iiij^c.ende.lxvij]

ITem tes te wetene dat in tselue iaer.M.iiij^c.ende.lxvij.die van Luycke weder begonsten te rebelleirene yeghens den hertoge Kaerle, ende en hilden hem trauwe noch belofte, maer lieten haer goede mannen huyten lande wesen die si selue ghegheuen hadden als borghen van warachteghen paeyse in groter tribulacie ende in vreesen van haren lijue. Ende sy trocken doe met eenen groten heyrcrachte huyter stede van Luycke, ende quamen binnen der stede van Hoye,

[fol. C.xxxi.v]

Ende verdreuen den Bisschop van Ludeke Lodewijck van Borbon, ende ooc Hertoghe Karels volck van ghelijcken, maer si en sloughen nyement doot. Ende dit ghedaen sijnde trocken noch die Lukenaers in Hertoghe Karels landen, ende stichteden Roof ende brant, in tlant van Lutcenburch, ende van Lymburch ende in meer andere plecken, grote confusye ende vyleyneghe woorden ontbiedende den Hertoghe Kaerle, omme twelcke dye voorseyde Hertoghe weder vergramde, ende versaemde een groot heyrcracht van volcke, specialicke van edele mannen, ende track also weder naer tlandt van Luycke. Ende ter begheerde vanden Prinche so waren hem huyt Vlaendren ghesonden een ghedeel voetganghers Te wetene huyt der stede van Ghendt twee hondert, huyter stede van Brugghe twee hondert, ende huyter stede van Ypre een hondert, ende huyt tlandt vanden vryen, hondert ende vijftich. Ende huyt vier Ambochten Cassele, Cortrijcke, en meer ander plaetsen sonden daer ooc voetghanghers, van ghelijcken, waer of die voetganghers van Brugghe hadden elck een pijcke, ende hadden elck een nyeuwe Iorneye, wit, Roodt, ende blaeu ende voren ende achtere gheborduert een ghecroonde.B. Ende haer lieder Capiteyn was Pieter metten eye.f.Pieters, ende doe waren Burchmeesters te Brugge Phelips metten eye, ende Martin lem.