Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volcht die Coronijcke vanden edelen Hertoghe Kaerle van Borgoengien.

¶ Dat.li.Capittel.

[fol. C.xxxi.r]

KAerle van Valoys Graue van Chaerlois Hertoghe Phelips sone, hi was de.xxxi.ste Graue van Vlaendren, hi was Hertoghe van Borgoengien, van Lotterijcke, van Brabant, van Limburch, ende van Lutcenburch Graue van Vlaendren, ende van Artoys, Pallatin, van Hollandt, ende van Zeelandt, ende van Namen, Marck Graue des heylichs Rijcx, Heere van Vrieslandt, van Salijnes, ende van Mechelen, Hi trauwede in sine ionc heyt een dochtere van Borbon, Waer of dat hem bleef eene dochtere ghenaemt Marye, Aldus naer tbegrauen vanden edelen Hertoghe Phelips als voorseyde es, soe track dye Hertoghe Kaerle binnen sijnder stede van Ghendt, omme al daer sinen Eedt te doene, als Graue van Vlaendren, het welcke hi vulquam vp den.xxviij.dach in wedemaent Anno.lxvij. Ende vp dien tijdt ghinghen die van Ghendt inde wapene, ende sy wierpen omme een kelioote huys, ende bedreuen sommeghe stucken onder dat decsel van haren sinte Lieuen omme te draghene naer costumen.

¶ Item dye Hertoghe Kaerle siende haer lieder Rudicheyt worde gram, ende met eenen verstoorden sinne trac hi van daer, als waer bi dat die Baliu, ende die Wet van Ghendt daden onthoofden drie vanden principaelsten vpsetters vander voorseyde beroerte.

Tvolck scoot int harnasch tbedreef remoer
In ghendt, als Karel daer tlandt beswoer

¶ Item van daer so trac die Hertoghe Kaerle te Mechelen, daer hi seer blijdelick was ontfanghen met grooter weerdicheyt. Ende die van Mechelen schoncken hem eenen schoonen selueren vergulden cop, die rijckelick ende chierlick was van fatsoene, weghende.xxij.maerck. Ende van daer track hi te Lueuene, te Brussele, ende Tantwerpen daer hi in elcke stede weerdelic ontfanghen was, ende hoogelijc beschoncken. Maer eeneghe van Mechelen resen vppe. Ende ghinghen inde wapene in die absencie vanden Graue Kaerle, ende si braken drie schoone huysen, ende wierpense ter nedere, Die Prinche dit horende wordt seere vergramt, Ende hi wilde drie Ambachten haer lieder vrijhede nemen, ende te nyeten doen, maer die wijse ende notabele mannen vander stede van Mechelen, die pijnden den paeys te maken, ende stellen den Prinche te vreden, ende sy gauen wel dertich duysent Rijnsche guldenen, binnen vier iaren betaelt, in beterijnghe van harer mesdaet Ende daer wasser vele ghebannen huyt alle mijns heeren Landen.

¶ Item vp desen tijdt was eenen grooten brandt by Hontschote.