Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe die Hertoghe van Chaerlois track met sinen Edelen, ende met al sijnder macht, voor die stede van Dynant.

[fol. C.xxix.v]

[Den.xxv.sten dach in Ougst]

ITem die Graue van Chaerlois dit verstaende hy trac met sinen edelen, ende met al sijnder macht voor die stede van Dynant. Ende hi deidse bestormen met sulcker vromichede dat hy hare groote stercheyt, ende onsprekelicke vasticheyt verwan binnen.viij.daghen Ende hy destrueerde die stede, ende deidse verbarnen te puluere. Ende dit gheschiede int iaer.M.CCCC.ende.lxvi.den.xxv.sten dach in Ougst, niet yeghenstaende dat die Prinche ghenadicheyt den vrauwen, ende ooc eeneghe goede mannen dede, maer hi dede scherpe iusticie doen ouer dye ghene, die de vpstelders van desen waren. Ende hi dede alder hooghst hanghen eenen busschietere, een fel tyrant, alsoot blijct in dit incarnacioen.M CCCC.Lxvi.

Den.xxvsten ougst bleef dynant versmacht
Want doe verwan dedel borgoenge cracht.

¶ Als die van Luycke, ende al tlant van Luycke aensaghen dat die stercke ende machtege stadt van Dynant die noyt wijcken en wilde, aldus iammerlijcke ghedestrueert was, ende geheel gheschent, so quamen si anderwaruen den Hertoghe te ghenaden, ende sy versterckten haer lieder varbandt, belouende ende gheuende noch een grote somme van pennijnghen. Ende hier mede vertrack die Graue Kaerle te Vlaendre waert, want corts daer naer so worde die edel Hertoghe Phelips seer onlustich ende sieck, inde stede van Brugghe.

[In dit selue iaer]

¶ Item in dit selue iaer begonste men te werckene inde Reye te Brugghe, Eerst beghinnende tusschen sinte Gillis brugghe, ende het torrebruchskin te suuerene, ende huyt te draghene metten butten, ende met beryen alle dye vuyllichede, ende die was wech gheuoert met schepen, ende alsoe wast ghedaen, al die stede van Brugghe duere.