Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe die edele Hertoghe Phelips sieck lach te Brugghe, ende hoe hi daer sterf.

¶ Dat.xlix.Capittel.

[fol. C.xxx.r]

ITem vp den.xv.dach van Wedemaent. Anno.lxvij.doe ouerleet die hertoge Phelips in die stede van Brugge, ende hi lach.iij.daghen lanc metten blooten aensichte, dattene alle die werelt sien mochte die wilde. Ene tsanderdaechs daer naer so drouchmen processie generael te sinte Donaes, omme te biddene ouer die siele vanden Hertoghe Phelips voorseyde, waer of dat dese twee naeruolghende reghelen bewijsen Tincarnacioen.

Juni sesthiene men bitterlijck noot sach
Doe hertoge phelips te brugge doot lach.

Vp den.xxij.dach in Wedemaent

¶ Vp den.xxij.dach in Wedemaent. Anno lxvij.so drouchmen den lichame vanden Hertoghe Phelips tsinte Donaes in die kercke. Ende alle die collegien, ende vele grote prelaten ghinghen voren in schoonder ordonnancien. Ende daer ghinghen vele mannen al gheslooft elc met een barnende tortse in die hant, ende hadden aen elcke toortse, ende ooc voor haerlieder borst eene wapene van schilderye vanden prinche, ende van dien wassere eene groote menichte, ende tlijck was ghedreghen van.iiij.notabele heren, ende daer ghinghen vele herauten voor tlijck, ende bouen tlijck so drouchmen een gulden cleet ghespannen, ende vp tlijck lach een gulden laken met een gulden sweert daer vp liggende. Ende daer naer so quam die graue van Chaerlois gheslooft inden rauwe, ende noch.vij.heren naer hem, deen naer den anderen alle verslooft. Ende daer naer volchden noch vele heren ende ioncheren vanden houe al in nieuwe swarte keerels, ende met caproenen vp die schoudere, die welcke waren in groten ghetale. Ende van mijns heren hof tot der kercke van sinte Donaes stonden in ordonnancie die poorterye ende di ambochten al met barnende tortsen in dye hant aen beeden siden vander strate. Ende die toortsen waren al verwapent metten wapenen vanden voorseyde ambochten ende neeringhen. Ende tlijc in die kercke sijnde, so wast begrauen voor den hooghen outaer te sinte Donaes in Brugghe. Ende daer was grote droufheyt bedreuen, als wel redene was, want hy een vroom ende eerlic prinche gheweist hadde, ende langhe gheregneirt hadde.

[Vp den.xxiiij.sten dach van Wedemaent

¶ Item vp den.xxiiij.sten dach van Wedemaent, dat was des anderen daechs, soe

was die huytuaert ghedaen, ende dit was vp eenen saterdach. Ende dus was den staet, als dye ionghe Prinche was inden choor, soe stonden alle die toortsen vander poorterye ende vanden ambochten lancx die kercke van sint Donaes totter westduere toe, elc met sijn wapene voorseyde, ende ware alle int swarte ghecleet, ende stonden daer tot die hoochmesse ghedaen was, ende inden choor stont ghemaect een huyseken, daer vp dat vele barnende keersen stonden, ende den choor was al behanghen met swarten lakene, ende dye voorkercke met bocrane. Ende daer waren al die kercke duere recken ghemaect daer toortsen vp stonden al barnende, ende bouen vele keersen, ende aen elc die wapene vanden Prinche. Ende men dede binnen dier weke in alle kercken ende cloosters binnen Brugge vele schoone huytuaerden ouer dye siele voorseyde, ende vp sijn Tombe was gheleyt een gulden laken gheduerende tot dat die hertoghe Kaerle tlichaem dede verroeren van Brugghe te Dygioen in Borgoengien.