Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Dit es teerste dat Kaerle here van Chaerloys aen nam om te treckene int lant van Luycke.

¶ Dat.xlviij.Capittel.

ITem tes de wetene also gheringhe als die Graue van Chaerloys quam huyt Vranckerijcke, ende den paeys ghemaeckt was tusschen den coninck ende hem, ende ooc die voorseyde heren ghescheeden waren elc int sijne, so track die Graue van Chaerloys met al sijnder armeye int landt van Luycke, omme die luyckenaers te beuechtene. Ende in dye selue tijt vp den.xix.sten dach in Decembre, soe quam die heere van Chaerloys voor die stede van sint Truden, ende si lieten hem binnen commen sonder eeneghe moeyte, ende hi bleef daer wel.iij.weken lanc, ende mijn heere van Rauesteyn die trac binnen Burchloon sonder slach of stoot. Ende doe trac mijn here van Chaerloys voor tcasteel van heepe, toe behoorende mer Rache van Huerne, twelcke hi wan ende te nieten dede met sinen volcke.

¶ Item binnen deser tijt, so laghen in een dorp, twelcke hiet Welle, wel.v.duysent groene tenten van Luycke, die altoos beletten dat gheenen wijn noch ander vytaelie te Brabandt waert commen en mochte. Ende si waren eens huyte ghetrocken omme te verraden des princhens sone van Oraengien, ende den Marscalc van Loreyne, die welcke heren langhen met cleender menichte van volcke in een dorpkin, tusschen Burchloon ende sint Truden, maer die voornoemde capiteynen vernament, ende si trocker vromelicke yeghens, ende mijn here van Rauesteyn quam huyt Burchloon, ende hielp beuechten dye voorseyde groene tenten, so datter vanden gheselschepe vander groene tente wel.viij^c.versleghen waren, ende dander vloden in eenen busch daermense niet begaen en mocht.

¶ Item daer naer track mijn heere van Rauesteyn onder Tongheren, ende mijn here vanden Gruythuyse lach in een schoon groot cloostere, ende mijn heere van Chaerloys lach bet voort aen dander side, so varre dat dye van Tongheren huyt quamen tot haren huyterste bollewercken. Ende die heeren wordens gheware, ende specialick mijn heere Adolf van Cleuen, die slouch hem lieden of ontrent.lx.mannen eer si in die stede gherochten, ende dander vloden binnen der stede, maer lieten achtere alle hare badaedgen.

¶ Item vp dien seluen tijt so sandt mijn here vanden Gruythuyse sijn trompet aen mijn heere van Rauesteyn claerlijck segghende dattet paeys was tusschen onsen gheduchten heere ende die van Luycke. Ende binnen den seluen auende so ontboodt mijn gheduchtich heere alle sijne Capiteynen

[fol. C.xxix.r]

by hem te commene vp eenen berch tusschen Burchloo ende Ludeke, omme den voetual van die van Ludeke te ontfanghen, daer dat die Lukenaers beloofden een groot somme van penninghen die sy alte met betaelden, ende si gauen goede mannen van huer stede in ostaedgen. Ende mijn voorseyde gheduchte heere beloofde alle sine gaernisoenen huyten lande te leedene, daer hi groote eere aen beghinc want si waren des anderen daechs snoens al huyt, den voorseyde lande van Ludeke.

[Den.xxvi.sten dach van Sporcle]

¶ Vp den groten Vastenauent, twelck was den.xxvi.sten dach van Sporcle Anno.lxv.so quam die Graue van Chaerlois te Brugghe, huyter reyse van Vranckerijcke, ende van Ludeke. Ende hem was grote eere ende tryumphe ghedaen, als van die huysen te behangene, ende waslicht daer voren te stellene vander Cruyspoorte tot sinen houe toe. Ende vppe de nyeuwe Halle, so was een man met eenen peerdekin inde voeye, ende reedt metten seluen peerdekin vp ende of, ende corts hier naer so rees eenen twist, daer omme dat Dynant ghedestrueert was.

¶ Item niet yeghenstaende, dat die van Ludeke gracie ontfanghen hadde van onsen gheduchten heere ende Prinche, die hertoghe Phelips van Bourgoengien, nochtan so resen sy bouen dien in grooter quaethede, principalic tvolc van der stede van Dynant. Ende wonderlicke iniurie aenseggende mijn heere van Chaerlois, als dat hi wesen soude een bastaerdt van Heynsberghe, ende si hijnghen een schu verwapent metter wapene van mijn heere den Graue van Chaerloys bouen haer lieder poorte aen een galghe, te sinen groten lachtere ende scoffierichede, den voorseyde heren ontseggende, ende al sijn mogenthede, vp twelcke die heere van Chaerloys raedt nam, ende voorsienichede met den Hertoghe Phelips sinen vadere dye welcke hem seyde, dat van ghebraden eyeren quamen gheerne kyekenen ghebroet met quaden becken.