Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hier beghint doorloghe van die van Luycke]

Hier beghint doorloghe van die van Luycke, contrarie den Hertoghe Phelips van Borgoengien, ende den graue van Chaerloys, ende den Bisschop van Luycke, haer lieder here, ghenaemt [Lodewijck] van Borbon, sone vanden [Hertoghe] van Borbon, ghedescendeirt vanden [bloede] van sinte Lodewijck, coninck van [Vranckerijcke].

¶ Dat.xlvij.Capittel.

[fol. C.xxviij.r]

[Vp den.xxvi.dach in Wedemaent]

HEt is waer dat int iaer.M.iiij^c.ende.lxv.vp den.xxvi.dach in Wedemaent dat vp resen in die stede van Luydeke die Burchmeesters, ende ander ghesworen vander stede van Luydeke aen hem lieden treckende al tghemeene volc vander stede, ende swoeren hulde ende trauwe eenen here, diemen hiet mart van Baden, omme hem te houden ouer haren mombre, ende Regent te blijuene vanden Hertochschepe van Balion, ende vanden lande van Loon, ende van Espergauwen, ende dit al yeghens den hertoghe Phelips, ende contrarie den graue van Chaerlois, ende den here Lodewijc van Borbon ghecoren bisscop ende gheconfirmeirt van onsen heleghen vader den paeus van Roome. Ende dyt aldus onder hem lieden verbonden sijnde, accoordeirden bouen dien met grooter cracht te treckene in dye landen vanden voorscreuen hertoghe phelips van Borgoengien, als in Brabant, ende int lant van Namen, omme haerlieder quaetheyt te openbarene, twelc si doe haestelijc begonsten, want si trocken int lant van Lymburch, barnende ende roouende al dat si ghecrijghen consten, niet yeghenstaende dat dye voorseyde edele Hertoghe Phelips hem lieden noeyt nyet mesdaen en hadde, noch oock den lande.

¶ Item dye Hertoghe Phelips aenmerckende haerlieder quaetheyt ende afgrijselijc propoost, hy sandt terstont sijne ghetrauwe capiteynen in diueersche steden vp die frontieren van sijnen landen, omme die te bewarene. Eerst te wetene mijn here den hertoghe van Cleuen lach binnen der stede van Thienen, mijn here die Drossaet van Brabant lach binnen der stede van Leeuwen, mijn here van Gasebeke die lach te Namen, ende de markijs van Farret die lach int landt van sint Truden. Ende het ghebuerde dat om sekere nootsake die hertoghe van Cleuen vertrack

[fol. C.xxviij.v]

vander stede van Thienen, ende doe quam daer die edele capiteyn mijn here vanden gruythuyse, ende hi trac selue daer ligghen om die stadt van Thienen te bewarene met sinen edelen. Ende in desen tijt sonden die van Luycke huyt elcken amboacht.x.mannen te peerde, ende sommeghe te voet omme te sercoursene een sterck dorp, gheheeten Montenac. Ende alle die luyckenaers binnen Montenac wesende, si vernamen dat mijn here Lodewijc vanden Gruythuyse daer ontrent rijdende was, maer hi van hemlieden niet wetende, si meenden den voorseyde here te belegghene ende te scoffierene, maer alsoot'god gheliefde, een vanden trompetten vp thooghelant rijdende, hi sach die luyckenaers beneden in die strate commen met grooter menichte, het welcke hy soubijt den here vanden Gruythuyse te kennen gaf. Ende met groter voorsienicheyt trocken si den luyckenaers teghen. Te wetene mijn here vanden gruythuyse, die Drossaet van Brabant, ende mijn here van Gasebeke, ende si beuochten die luyckenaers afgrijselicken seere, ende waren hem so naer inne ghegaen, so dat dye engienen vanden luyckenaers lettel yement quaets daden, maer si bi.ij.of.iij.hondert te gadere vloden in merschen ende andere plaetsen, ende cropen alle aen malcandere, ende boden gheen weere dat yette segghene was, maer lieten hem lieden dootslaen ghelijcke beesten, datter bleuen vp dat pas versleghen wel.xx^c.luyckenaers. Ende dyt was vp den dach vanden.xi.duysent maechden Anno lxv. Hier volcht Tincarnacioen van dien.

Vrsula was gruythuys here vul seeghen
Montenac verbrant, groot volc versleghen