Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Dit was oock teerste dat thelich Sacrament ghedreghen was in processie generale.

[Vp den.iiij.dach van Septembre Anno.lxv]

ITem vp den.iiij.dach van Septembre Anno.lxv.so quam nyeu mare, vanden graue van Chaerlois, dat hi in goeder ghesonde ende state was gode lof. Ende omme den almoghenden god te danckene van sijnder gracie so was gheordonneirt eene deuote processie generale, in die welcke men drouch dat heleghe sacrament, ende deis processie drouchmen in tcloostere van sinte Clare, om hem te danckene vander goeder mare.

[Int eynde vander maent van Octobre]

¶ Item binnen der tijt dat die Coninc was in Normandyen, so keerde die graue van chaerloys metten hertoghen ende heren die met hem gheseghelt hadden weder te Parijs waert, ende hi quam weder ligghen voor parijs in sijn huys, ghenaemt Conflans, besloten met waghenen ende met vele volcx van wapenen. Ende die Hertoghe van Berry was met sinen volcke van wapenen te sinte Moors, ende die graue van Simpol was met sinen volcke te pont flancon, ende die Hertoghe van Bertaengien die lach te sinte Denijs twee mijlen van Parijs, met den Hertoghe van Calaberen, ende die Hertoghe van Borbon lach in een cleen stedekin daer by. Ende si laghen aldus ontrent Parijs.x.weken, ende binnen desen tijt so sprac men van paeyse. Dit nyet yeghenstaende, deden nochtans daghelicx sprincreysen yeghens malcanderen, te wetene tvolck vanden Graue van Chaerloys. Ende den paeys was ghemaect tusschen den coninck ende den graue van chaerlois, midts den anderen heeren die vander oordene waren, int eynde vander maent van Octobre. Anno.lxv.

¶ Item daer naer als den paeys ghemaect was so quam die coninc buyten parijs, in die kercke van sinte Anthonis, ende daer quam ooc die coninck ende dye heere van chaerloys, ende groetteden malcanderen seere minlic, ende spraken seere vriendelicken met malcanderen, in teekene van eenen vriendelicken paeyse.

[Den.xv.dach van Nouembre]

¶ Item tes te wetene dat als alle dinghen gheappointiert was tusschen den coninc ende den graue van chaerlois aengaende die reyse van Montherry. Ende vp dyen tijt, den.xv.dach van Nouembre, in tvoorseyde iaer, soe schieden alle die Hertoghen [ende] andere heren, dye waren vander aliancie van den Graue van chaerloys, ende elck track tot sijnen lande waert ende die Graue van Simpol bleef byden Coninck van Vranckerijcke, omme dat hi was byden voorseyde paeyse ghemaect conincstabele van Vranckerijcke.      Nota.