Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Dit was deerste reyse dat theylich bloet ghedreghen was te Brugghe in processie generale.

¶ Dat.xlvi.Capittel.

[fol. C.xxvij.v]

ITem binnen der tijt ende wijle dat die graue van Chaerloys was in dye reyse van Vranckerijcke, ende omme dat die stede niet en wiste noch en conste vernemen, hoe dat met hem was, so ordonneirden dye vander wet vander stede van Brugghe ter eeren van gode, ende om die prosperiteyt ende weluaert vanden heere van Chaerlois, eene seer deuote ende solempnele processye generale, in die welcke datmen drouch dat weerdeghe helege bloet, ende men drouch die processie ten wijngaerde, omme deuotelic te biddene voor den graue van Chaerloys voorseyde. Ende vele lieden seyden dat dat die eerste reyse was datmen thelich bloet drouch in processye generale, vp dat hem god gaue gracie, ende beschermen wilde van allen dangiere, alst wel blijct in dit dicht hier naer.

Urient thuwer weerdichheyt ic dyt scrijue
Om dat menschen qualic tonthouden pleghen
Int iaer.M.iiij^c. tsestich ende vijue.
Was thelich bloet ten wijngaerde ghedreghen
Om dat.K. van chaerloys was gheleghen
Ontrent montherry ghewapent te velde
Tbloet christi wil hem altijt beweghen
In Ougst men.xxij.telde.