Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Dit es die reyse van Montherry.

[fol. C.xxvi.v]

[In dit selue iaer en den.xvi.dach van Hoymaent Anno.lxv]

ITem in dit selue iaer die coninc Lodewijc van Vranckerijcke vergheten hebbende die grote vrientschap ende eere die hem dye Hertoghe Phelips ghedaen hadde hi sochte warringhe yeghen den voorseyde Hertoghe Phelips. Ende hi ontboodt hem als ghenoot van der croone bi hem te commene, maer midts der outheyt ende siechede die hi hadde, soe sandt hi daer Kaerle van Valoys sinen sone, den welcken hi wel voorsien dede van vrome capiteynen ende veil volcx van wapenen. Die Graue van Charloys aldus commende in Vranckerijcke met sinen edelen ende groot volc van wapenen, daer dat dye graue van saintpol was capiteyn generael. Si slou-

[fol. C.xxvij.r]

ghen nedere in een schoon velt byden berch van Montherry, ende hebben hem lieden daer besloten met haren carrijnen yegens den vploop vanden coninck van Vranckerijcke. Ende es te wetene dat die meeste heren van der croone beloeft hadden bystant te doene, te wetene die Hertoghe van Berry des conincx broedere, die Hertoghe van Bertaengien, ende dye hertoge van Calaberen, ende die Hertoge van Borbon. Maer eer dat dese voorseyde heren quamen byden graue van chaerloys te velde, so quam die.coninc.van vranckerijcke met groter macht, te wetene drye mannen yegens een, ende quam ouer den berch van Montherry, ende hi ouerviel onuerhoets den voorseyde graue van chaerlois, also dat daer eenen groten ende swaren strijt gheuiel. Ende dye graue van Chaerlois was een stick tijts in groter vreese, want voor sijne oghen sach hy doot slaen sijn lieue Rudders ende dienaren, als mijn here Phelips de la lain, ende mijn here Phelips dongijs, ende noch meer andere edele mannen, alsoe datter quam een fransoys ende hi greep den.G.van Chaerlois seggende Rende vous, rende vous, ende hy quetste hem ontrent sijn kele, maer doe quam van besiden in ghesleghen met sinen volcke die graue van simpol, ende daer worden so vele fransoysen versleghen, als dat die.coninc.met een cleene menichte vloot in een stedekin, ghenaemt Corbeaux, staende.vij.mijlen van Parijs, ende daer was die coninc.iij.daghen, ende van daer quam hi te parijs. Ende aldus so hadde die G.van chaerlois die victorie, ende behilt het velt met sinen edelen. Ende dit waren die princepaelste heren die metten graue van chaerlois die battaelgie wonnen. Te wetene die graue van simpol met sinen drie sonen, mijn here van Rauesteyn, mijn heere Anthonis dye bastaert, ende si laghen daer noch.iij.daghen int velt voorseyde, om te verantwoordene haerlieder partye. Ende dese strijt gheuiel den.xvi.dach van Hoymaent Anno.lxv.alst blijct in dit Carnacion.

[...]Chaerles verdreef den coninck net

[...]Te mont le herrij sestiene iulet.

¶ [...]tem corts daer naer dat desen strijt ghe[...]t was, so bleuen die voorseyde hertoghen ende [...] met groter macht byden here van [...] Ende als die.coninc.dat vernam, so liet hi een bestant maken, midts der bede van sinen heren tusschen hem ende den.G.van chaerlois. Ende alsoe quam die voorseyde.G.van chaerlois. weder bi sinen vader den Hertoghe Phelips van Borgoengien met groter eeren ende victorie Ende aldus weder omme commende tot in Brabant, so vant hi ouerleden sijnde Elizabeth van Borbon sijn ghetraude gheselnede, ende was begrauen Tantwerpen in sinte Michiels clooster, van welcker doot hi seer bedroeft was, maer byder gracie gods hy behilt van haer eene dochtere ghenaemt Marie, die welcke was vp ghehouden binnen der stede van ghendt.

¶ Item naer dat die.G.van chaerlois hadde ghehouden het velt.iij.daghen, als voren gheseyt es, so trac hi te stampes, ende hi daer sijnde so quamen bi hem die hertoge van berry broedere vanden.coninc.van Vranckerijcke, die hertoge van Bertaengien, die hertoghe van Borbon, die hertoge van callabre, die graue ermeniac, die.G.van soys, die.G.van duverijn, die G. van Dammartijn, ende noch vele meer ander heren ende princhen, die welcke voornoemde heren hadden beloeft ende beseghelt te gadere met malcanderen, bystant te doen den.G.van Chaerlois yeghens den. coninc.van Vranckerijcke, maer si en quamen den.G.van chaerlois niet te hulpe, maer seyden dat si niet commen en mochten om die grote weere die des conincx volc gestelt hadden vp den wech daer dye voorseyde Hertoghen ende grauen met haer liedermacht passeren moesten.¶ Nota.

¶ Item doe die Coninc commen was te parijs, so ontboot hy van allen plaetsen sijn volc van wapenen datse commen souden ende vergaderen met hem te Parijs. Ende te parijs sijnde, hy visenteirde alle die kercken, ende gaf vele offerhanden, biddende om victorie, ende hi dede tot allen poorten huyt steken sijn bannieren, om datmen weten soude dat hi ware te Parijs, dat si hem goed ende ghetrauwe wesen souden. Ende dat ghedaen sijnde, die.coninc.trac te Normandyen waert, ende daer was hy drie weken met vele volcx van wapenen dat hi daer vergadert hadde