Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Dyt es den voetual van die van Ghendt, alsoot hier naer volcht.

MAer der handt die voorseyde van onser Stede van Ghendt hebben ons ghebeden, ende aen ons versocht, dat wi ons willen vinden by der Stede van Ghendt vp eene halue mijle naer ter sulcker plaetse als ons goet duncken soude, omme te ontfanghene vander stede obediencie ende onderdanichede, ende daer toe heerlicke beterijnghe, alsoot begrepen ende verclaert staet in een vanden voorseyde artijculen vander seluer presentacie, twelcke wi hemlieden accoordeirden te doene, ordinerende den voorseyde ghedeputeirden, dat die van onser Stede, die voor ons commen souden, om dat te doene vp den dach van heden den.xx.sten dach van deser maent vp die none vanden seluen daghe, twelcke sy ghedaen hebben aen ons roupende ende begheerende ghenade, ende ons ouerbringhende hare bannieren, alsoot verclaert es in dye voorseyde articulen. Ende dit ghedaen sijnde, wy hebben hem lieden gheseyt ende ghedaen segghen bi onsen lieuen gheminde ende onsen ghetrauwen Cancellier ende Ruddere mer Nyclaeus Roelin heere van

[fol. C.xxiij.r]

Antoengnen, behouden dat si vulcommen tinhouden vanden voorseyde articulen, wy hem lieden gheuen onse brieuen van gracien, ende van remissien, ende dat wi sullen doen openbaren ouer al in onsen lande van Vlaendren ende elders, goeden ende vasten paeys, ende alle versekerthede van onse inwonende van Ghendt. Ende omme die ghene dye hem lieden in wapenen ghedient hebben, ende oorloghen ghedaen, houdende ter tijt van nv huwe partye. Ende achteruolghende den vulcommene vanden inhoudene vanden voorseyde articulen alle die ghene dye hem droughen, als schepenen ende hooftmannen, die groote Dekenen, ende die cleene, ende andere in groter menichte presenterende haer lichame Ende al die ghemeente van onser stede van ghendt van weerden houdende ende louende al tghene dat by huerlieder ghedeputeirde ghedaen ende ghepresenteirt hadde gheweest, hebben beloeft dat te vulcommene, van pointe te pointe, ende ons daer of opene letteren ghegheuen in goeden vorme, gheseghelt met den seghele van onser stede van Ghendt. Wi doen te wetene dat wi alle dese saken ouer ghemerct hebben, ende omme redenen voren verhaelt, ende principalic omme die eere ende reuerencie van onsen ghebenedijden heere ende scheppere den almoghende god, hebbende ooc compassie ende deernesse vp onse voorseyde stede van Ghendt, ende ons volck daer inne verkeerende van onser seker wijshede, auctoriteyt, ende vulcommen moghentheyt, den voorseyde inwonende van onser stede van Ghendt, also wel den hooftmannen, Raetslieden als andere, van wat condicien of state dat si sijn die hemlieden in wapeninghe ghedient hebben, ende oorloghe met hem lieden gheleet, ende hare partye ghesustineirt hebben ter tijt van nv, alsoot voorseyde es yeghen ons ende onse onderdaneghe ondersaten hebben vergheuen ende quijt ghescholden, ende of ghedweghen. Ende bi deser yegenwoordegher lettere vergheuen, quijte schelden, of dwaen, nv ende teeweghen dagen alle die mesdaden, faeyten, ende ouerhooricheden die si of eeneghe van hem lieden hebben of moghen ghedaen hebben ter cause van oorloghe, gheschillen ende rebellicheden bi hem lieden ghedaen yeghens ons ende onse landen, ende ondersaten, in wat manieren dattet sy, sonder datter cause van dien hemlieden nemmermeer eeneghen heesch of vermaen ghedaen worde, cryminele ofte ciuile. Ende te dien eynden dattet goeden vasten paeys sy in onsen lande van Vlaendren, ende dat omme het faeyt vander oorloghe hier naermaels nyeten rijse of gheschiede eenich ghekijf, ghedinghe, of gheschil tusschen den voorseyde van onser stede van Ghendt, ende andere van onsen ondersaten. Van onser wijsheyt, auctoriteyt ende mach hebbende, hebben gheordineirt ende ordineren, dat elckerlijc, also wel vander eender sijde als vander andere, sal wederkeeren met vulcommen rechten in sine huysen, renten, pachten, ende leenen, erue, ende onroerende goeden, also sijse yeghenwoordelijc vinden sullen, sonder die andersins te moghen calengieren te begheerene te hebbene of te heessche. Ende worden eeneghe catheylen gheuonden in die voorseyde huysen, die daer in waren voor die vooorseyde orloghe, ende toebehoorende den voorseyde huysen, dye voorseyde cattheylen die sullen hem blijuen. Ende als van andere cattheylen gheuonden in die voorseyde huysen die daer inne waren voor die voorseyde oorloghe, schulden, achterstellen, huyshueren, ende vruchten ontfanghen, ghenomen, ende vergadert voor die date van deser yeghenwoordegher lettere, daer en sal men nemmermeer of moghen maken eeneghen heesch of veruolch, nyet te meer aen deen side dan aen dander side. Ende dyer ghelijcke willen wy ende belieft ons also ghelijcke willen wy ende belieft ons also ghedaen te sijne. Aengaende die vruchten ende profijten vanden beneficien vanden persoonen vander kercken, ghegheuen ende vercreghen binnen der seluer oorloghe ende rebellichede gheduerende, van welcken vruchten ende profijten ontfaen vanden beneficien, ne sal oock gheen veruolch ghedaen sijn aen deen side noch aen dandere siede. Ende voort so hebben wy gheordonneirt ende ordonneren van onser voorseyde wijsheden, auctoriteyt, ende vulcommen macht dat alle die bannen, verclaersinghe van allen ordonnancien ende statuten ghemaect binnen onser stede van Ghendt, den tijt vander voorseyder oorloghe gheduerende, en sullen omme dye voorseyde rebellichede van gheender

[fol. C.xxiij.v]

weerden sijn. Ende die welcke wi wederroupen als niet sijnde, ende maken die van nyeten ende van gheender weerde met deser seluer yegenwoordegher lettere. Ende te dien eynde dat dit si eene sake vast ende ghestadeghe teeweghen daghen, hebben ghedaen hanghen onsen seghele aen dese yeghenwoordeghe lettere, ende ghelijcke letteren ghegeuen van ons, voor onse stede van Ghendt den laetsten dach van Iulet, int iaer van gracien.M.iiij^c.ende.liij. Ende gheteekent al dus mijnen here den Hertoghe Ian de Mabeuge. Ende desen paeys aldus gheschiet sijnde, so rees binnen Vlaendren eene groote blijschepe, alsoot wel redene was. Ende corts daer naer, soe stelden dye van Ghendt vp een seer schoon schietspel van den cruysboghe.

¶ Item die Hertoghe Phelips vul van wijsheden ende discretien, ende seer victorieux, hi en was niet verghetende sinen dode groot here, den Hertoghe Phelips le Hardy, die welcke begrauen was buyten Dygioen in Borgoengien, in tclooster vanden Saertruesen, welck clooster hi selue maken dede, maer ouer hem en was gheene chierlike tombe naer sijn princhelijcke weerdichede, dies dede nv die Hertoghe Phelips voorseyde een rijckelicke tombe maken van metale, ende was ghemaeckt te Bruessele by eenen meester gheheeten Iacob die coperslagher, ende wort ghestelt te Sartruesen buyten Dygioen seer weerdelick vp tgraf vanden Hertoghe Phelips sijnen groothere.

[Int iaer.M.iiij^c.ende.lv]

¶ Item int iaer.M.iiij^c.ende.lv.so starf die paeus Nycolaus ende in tselue iaer so starf die bisschop Roelof van Hutrecht. Ende doe wart vanden ghemeenen capittele ende rade vander stede ende vanden sticht van Vtrecht ghecoren heere Ghyselbrecht van Breederoode Domproost ende proost van houde monstre Tutrecht, ende hy hadde ghesonden te Roome omme die confirmacie. Ende binnen diere tijt so sijn ghecommen diueersche heeren huyt Hollandt byden Hertoghe Phelips voorseyde, ende si seyden ghenadich here, eest dat ghi Ghyselbrecht van Breederoode bisschop maeckt, soe es te duchtene dat ghi verliesen sult hu lant van Hollant, ende datment hu huyterhandt sal willen nemen, bi naerheden. Die Hertoghe phelips dese informacie horende, hi sandt rechteuoort om het bisschopdom van Vtrecht te Roomen waert by onsen alder helichsten vadere den Paeus van Roome, omme die confirmacie voor sinen bastaerden sone Dauid, die welcke als doe was bisscop van Theerenburch, die welcke confirmacie hi vercreech. Ende die Hertoghe Phelips die voorseyde confirmacie vercreghen hebbende, track vp alle der heleghen auent in Hollandt met sine sone dye Graue van Chaerloys, ende veel meer andere heeren, ende met sijnen sone den bisschop Dauid, ende met een groot ghedeel volcx van wapenen

[Int iaer.M.iiij^c.ende.lvi.ontrent xiiij.daghen naer paesschen]

¶ Item int iaer.M.iiij^c.ende.lvi.ontrent xiiij.daghen naer paesschen soe quam die Hertoghe Ian van Cleuen inden haghe omme een goet middel te makene tusschen den Hertoghe Phelips sinen oom ende den Elect ende der sticht van Vtrecht. Ende binnen deser tijt soe sijn ghecommen sommeghe van Amelfoort ende van Renen inden Haghe in Holland byden bisschop Dauid, ende si brochtent so varre dat die bisschop Dauid sandt mijn heere Adriaen van Borsele met meer andere tot Renen omme datte bewarene, ende die Casteleyn vander Horst compareirde met mer A a a a voorseyde, waert datmen die somme van.vij.duysent Rijnsche guldenen hem weder gheuen wilde, daer mede dat hy tvoorseyde Casteel beleent hadde, hi soude den bisschop Dauid dat slot ouer gheuen. Ende die voorseyde somme wordt hem betaelt, ende dye bisschop Dauid sandt sine Saudenieren in tvoorseyde slot, diet huyt sijnder name hilden ende bewaerden. ende niet langhe daer naer, so track dye bisschop Dauid met veel volcx van wapenen omme die stede van Ameluoorde in te nemene.