Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[¶ Hoe dye Hertoghe Phelips van Bourgoengien track met allen sinen heren]

¶ Hoe dye Hertoghe Phelips van Bourgoengien track met allen sinen heren, wt den Haghe int vulle harnasch, nae die stadt van Vtrecht, om sinen sone Dauid daer Bisschop te maken, met ghewalt maer si ontfinghen hem met vrientschepe, ende weerdichede.

[fol. C.xxiiij.r]

[Vp sinte marien magdaleenen dach]

ITem int selue iaer vp sinte marien magdaleenen dach doen reedt dye Hertoghe van Borgoengien huyten Haghe, int vulle harnasch met vele volcx van wapenen omme voor Vtrecht te treckene, ende daer met machte in te commene. Ende het was een ghemeen heyruaert al Hollandt duere huyte gheroupen, ende hi bleef.viij.daghen of meer binnen der stede van Leye, ende daer was die Hertoghe van Cleuen, ende die ioncheere van Montfoort, Ian van Renesse die Dom dekene, ende Iacob pruys sijn broedere omme een goet middel te makene tusschen den hertoghe Phelips ende mijn here van Breederoode, daer so vele toe ghedaen was dattet vp een goede mate ghebrocht was. Ende van daer so track die Hertoghe van Borgoengien met eenen grooten heyrcachte te Woerden, ende van Worden te Ysselsteyn ende daer quam die Graue van Stampes, ende Anthonius die bastaert van Borgoengien met vele pycaerden, vlaminghen, ende brabanders. Ende daer was een tractiet ghemaeckt als dat die van Vtrecht den Hertoghe van Borgoengien ende die bisscop Dauid sinen sone met minnen ende met vrientschepen ontfanghen souden, het welcke also gheschiede. Ende die Hertoghe van Borgoengien met alle sijnen edelen quamen so costelic metten bisschop Dauid te Vtrecht binnen datter een wonder was om te siene Ende die wet van Vtrecht ende alle die Collegien deden den Hertoghe ende den bisscop groote weerdichede ende reuerencie. Ende here Ghyselbrecht van Breederoode soude

[fol. C.xxiiij.v]

weder wesen domproost, ende proost te Oudemonstere Tutrecht, ende ooc soude hi wesen Proost van sinte Donaes in Brugghe, voort so soude hi wesen Raet van Hollant, ende hebben dobbel wedden sonder wedersegghen tot sinen lijue. Ende daer en bouen soudemen hem gheuen voor die costen die hi ghedaen hadde duysentich gouden leeuwen, ende aldus so was den paeys ghemaect. Ende daer voren so bleef borghe dye Hertoghe van Cleuen.