¶ Dat xliij.Capittel.
PHelips byder gracien gods hertoghe van Bourgoengien. etc. Aen alle yeghenwoordeghe ende naercommende, also naer die victorie die wy byder gracien gods ghehadt hebben inden strijt te Gauere, yeghens die van onser stede van Ghendt, ende haren medepleghers laetstleden.xxiij.in deser maent. Die selue van onser stede van Ghendt sonden in ons heyr voor gauere hare ghedeputeirde in groten ghetale, den.xxvi.dach vander seluer maent, ons ootmoedelic biddende ende begheerende dat wi compassie ende deernesse wilden vp hem lieden ende vp dat aerme volc, ende omme te schuwene die grote bloetsturtinghe vanden menschen, ende die verderuenesse van onser voorseyde stede van Ghendt, ons ghelieuen wilden hem lieden te deelene van onser gracie ende ontfermichede, ende hem lieden te willen vergheuen hare ghebreken ende mesdaden, ende grote verbuerten, ende mesgrijpen die si ghehadt hadden yeghen ons ende onser eerlycker hoocheyt, segghende ende bekennende dat si gheene macht noch vromichede en hadden ons daer of alsulcke moghelijcke beteringhe te doene, noch weerdich wesen omme te beterene hare groote mesdaden, den ware dat bi onser gracie hem lieden mildelic ende lyberalic vergheuen ware. Ende ooc te vulcommene sekere pointen, byden welcken dese oorloghe begonnen heift gheweest, waer vp wi beroert met compassien ende deernesse, ende sonder te willen letten vp huerlieder ghebreken ende groote mesdaden, ende sonderlinghe dat in maendaghe nu laetstleden, alle die raetslieden, schepenen, ende andere van onser voorseyde stede van ghendt met alle haer lieder medepleghers trocken huys onser voorseyde stede ghewapent, ende quamen in battaelgien yeghen ons, hebben ontfanghen haerlieder presentacie, alsomen hier naer hooren sal in diueerschen stonden.
Auteursrechtvrij