Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Consilia lathomi deflent ghendt de corde perfecto.

¶ Dit es ghetranslateirt huyten walschen in Vlaemsche, den brief dye mijn gheduchte here sandt aen die van Ghendt, tsanderdaechs naer dat hy die victorie vp hem lieden ghehadt hadde.

¶ Dat.xlij.Capittel.

AEn hu onse ondersaten, inwonende binnen onser stede van Ghendt, die hu ghewillichlijc ghemaeckt hebt onse vianden, rebel ende onghehoorich, doende opene oorloghe yeghen ons ende onse ondersaten, ende ghemeenen lande, sonder te hebbende redene of cause omme dat te doene, aenghesien ende ouerghemerckt dat vander tijt dat wy ghecommen sijn aen dye heerlichede van Vlaendren, wi ghehadt hebben onse stede in sonderlinghe recommandacien bouen alle andere steden, van wat lande of heerlicheden dat si sijn, gheuende mildelicken onse stede van Ghendt vele vryheden ende rechten. Ende voort bouen dyen hu onderhoudende in huwe preuilegien, hu ghegheuen by ons ende onse voorsaten, Grauen ende graefneden van Vlaendren, ende hu bewijsende goede redenen ende iusticien. Wy beteekenen hu al eest so dat byder hulpe van onsen ghebenedyden schepper, die bi sijnder gracien ons victorieus ghemaect heift yeghens hu lieden, in schade ende in dachuaerde begrepen ende bestaen van huwer sijde, ende die wi ghehadt hebben yeghens hu lieden. Ende namelijcke ter dachuaert van ghisteren voor Gauere, also elckerlic weet, daer of wi onsen voorseyde scheppere gheuen ende segghen lof, gracie, ende danc. Niet te min wi die schuwen willen dye menschelicke bloetsturtinghe, begheeren hu onse ondersaten die ontweicht sijn, qaulic beleet ende bedroghen, weder te bringhene ten weghe van onderdanicheden van ons hu Prinche ende natuerlicke heere, in dien dat wi commen moghen tot eenen goeden paeyse ende eendrachtichede, also ghi ghedaen hebt, als wi sijn ghecommen aen die voorseyde heerlichede van Vlaendren. Ende sonder aensien te hebbene vp huwe voortstellinghe, ende in tghene daer ghy punicie in verdient hebt van lijue ende van goede, wi hebben ons gheuoucht ende gheneghen geweist tot alle

[fol. C.xx.r]

dachuaerden die ghehouden gheweist hebben ter handelinghe van paeyse. Ende sijn altoos ghewillig hu gracie te doene, ende hu ontfaermichede te bewijsen voor righuer van iusticien. Ende omme te commene teenen goeden accoorde van deser oorloghe bi hu lieden ghestelt ende begonnen. Ende specialicken ter laetster dachuaerdt ghehouden te Rijssele, ter presencie van onsen lieue ende gheminden gheselschepe, ende gheselnede der Hertoghinne. Ende onsen lieuen ende al der gheminsten sone Kaerle de Graue van Charloys, ende onsen lieuen ende gheminden neue die Graue van Stampes, ende eeneghe andere van onsen rade, Ter welcker dachuaert, metsgaders huwe ghedeputeirde, hebben gheaduyseirt gheweist sekere artijculen, omme te commene ter perfectie van deser yeghenwoordigher oorloghe, by den welcken artijculen hu ghedeelt waren onse gracien sonder yet te nopene aen huwe voorseyde preuilegien hu ghegeuen alsoot voorseyde es. Maer was gheauyseirt, dat de wet van onser Stede van Ghendt voordtaen vermaect soude wesen binnen der seluer onser stede, naer tinhouden van huwen preuilegien voorseyde. Ende te dien hende dat iusticie ghetoocht sy, also wel den aermen als den rijcken, sonder te aensiene dye persoonen. ende also was gheordineirt ende ghesloten dat die statuten ende ordonnancien ende bannen voordtaen ooc ghedaen souden sijn, ter presencie van onsen Baliu, ende daer consenteiren naer der voorme vanden voorseyde preuilegien. Ende aengaende van huwen poorters, ende van den ghenen die yeghen hem mochten mesdoen, soude oock al sghelijcx ghedaen worden als voorseyde is, ende voren verclaert in die selue artijculen achteruolghende tinhouden vanden seluen preuilegien. Ende alleenlick aengaende den haghe poorters, also wel omme te vercrijghene al sghelijcx voorseyde es in sekere preuilegien van salegher ghedachten, die Graue Guy van Vlaendren. Ende voort al eest soo dat wy by den seluen artijculen daer ghi in meent ende bemoet sekere Steden wesende van huwer casselrye, dye welcke nochtan naer reden ende rechts weghen of ghetrocken behoren te sine, huwe mesdaet aensiende ten eeweghen daghen van huwer Casselrye, Doe heeft gheseyt geweist, dat sonder yet anders te ordineirne die questie van dyen soude blijuen in state staende, een half iaer gheduerende, ende dat ten hende vanden seluen termyne, daer of gheapointiert soude worden by vriendelicken weghe, of bi weghen van iusticien, bi consente van hu ende van ons. Ende al eest dat bouen dien by den seluen artijculen niet gheaduyseirt en heeft gheweist, niet dan eeneghe pointen dienende ende aengaende huwer weluaert ende regemente, ende ghemeenen oorboore van onser voorseyde stede van Ghendt. Ende ooc eens deels aengaende die eerlicke ende profijtelicke beteringhe omme der remissie ende verbuerte van huwen lijue ende goede, die hu vergheuen sijn souden. Niet te min also wi ooc wel verstaen hebben dat onder tdecsel als ghi vertroct van onser stede van Rijssele, datmen hu hadde ghedaen te verstane dat byden voorseyde articulen wi huyt waren om huwe preuilegien te weerene ende te nyeuten te doene, ende ghi hebt ter cause van dien onse gracie wederseyt, daer wi ons grootelick in verwonderen. Dit al niet yeghenstaende, wy omme die eere van onsen ghebenediden sceppere, die die werckere es van paeyse, begheerende te tracteirene, ende alle onsen ondersaten seynde vriendelicken bi hu desen yeghenwoordeghen officier van wapenen, bringhere van deser yeghenwoordigher lettere, byden welcken wi hu sommeren ende manen dat ghi yeghenwoordilic comt, ende hu bekeert tot onser ghenadicheyt, ende ons doet als goede ghetrauwe ondersaten schuldich sijn van doene haren Prinche, ende natuerlicken heere, wy sijn bereet om hu te ontfanghene in gracie ende in ghenade, ende hu te vergheuene huwe ghebreken, mesdaden ende groote verbuerten tonswaert ghedaen, ende yeghen onse hoocheyt ende heerlichede. Behoudelic ende midts dien dat van huwen weghe vulcommen sy tinhouden vanden pointen ende articulen begrepen ende ghesloten ter voorseyder dachuaert ghehouden in onse voorseyde stede van Rijssele, van al welcken articulen dye copye heift ghegheuen gheweist huwe voorseyde ghecommitteerde ende

[fol. C.xx.v]

ghedeputeirde. Ende noch bouen dien wi presenteren hu dat ghy die copye daer of sien wilt omme te bewijsene tinhouden vanden articulen, ende andere saken den paeyse aengaende, daer in willen wi so doen dattet god ende alle die werelt gheware worden sal, ende dattet aen ons niet houden en sal, ten sal goeden paeys ende een goet eynde hier of ghemaeckt ende ghestelt sijn van deser yegenwoordegher oorloghe, die welcke ons verdriet omme die saken ende redenen voorseyde. In teekene van dien wi hebben doen drucken onsen seghele van secrete aen dese yegenwoordeghe ende ander ghelijcke letteren ghehanghen te velde in ons heyr, vp den dysendach.xxiij.in Iulet, in tvoorseyde iaer van.liij.