Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe dye van Gendt te velde quamen, yeghen den Hertoghe Phelips.

[fol. C.xix.v]

¶ Item die prinche met sinen volcke die quam daer yeghens, welc volc seere wel toe ghemaect was ende ghereet ter oorloghen. Daer rees eenen grooten strijt die vreeselick toe ghinc, want den Prinche wel voor ooghen stont hoe dat die van Ghendt doot sloughen sinen lieuen sone Cornelis die bastaert van Repelmonde, ende meer andere edele. Ditte al ouerdinckende, beual sijnen heyrcrachte vromelick vp die van ghendt te slane, het welcke so schoffierlicke ghedaen wort, soe datter nauwelijcke nyement en ontghinc vanden Ghentenaers, maer worden doot ghesleghen sonder ontfermen, ende menich hondert sprancker in die schelde, die verdroncken, ende vele wasser gheuanghen ende gherentsoeneirt, maer dat ghetal vanden doden was sonder ghetal, wyens sielen dalmoghende god ghenadich sy Amen.

¶ Ach wat rauwen was doe binnen ghendt alst wel redene was. Ende riepen alle die capiteyn van Gauere heift ons verraden, want hi dede ons te verstane dat die prinche gheen volck bi hem en hadde, daer hi valschelic aen gheloghen heift, alst daer wel bleeck.

¶ Item die van Ghendt siende dat si aldus gheuaren hadden, ende puer verwonnen ende tonder waren, hem lieden dochte goet dat si yeghens den prinche ootmoedelic gaen souden, ende hem die slotelen vander stede draghen. Maer eeneghe ontrieden datte, vreesende die hitte van sprinchens gramschap, maer voorwaer hadde die Prinche binnen ghendt ghetrocken, hi hadde die stede ghewonnen sonder eeneghe belettinge. Maer dese edele Prinche dye ghecreech alsulcke compassie int herte, vp al sijn doode volck dat hi daer sach versleghen, dat hem die tranen huyt den oghen braken van grooten iammere, want het was emmer al sijn volc, ende men seyde dat hy met claghelicke woorden seyde, ommer wie datter windt ick verliese. Ende desen bloedeghen strijt gheuiel int iaer ons heren.M.CCCC.ende.liij.vp eenen maendach, den.xxiij.in Hoymaent, waer of dit naeruolghende latijn het Incaernacioen maeckt.