Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier beghint die Oorloghe van Ghendt, int iaer ons heeren.M.CCCC.ende.Li.

¶ Dat.xli.Capittel.

ITem corts daer naer, die Prinche quam seluen te Rijssele, ende hi ontboodt die van Ghendt bi hem, dye welcke daer trocken ende yeghens hem spraken. Ende die prinche bleef altijt sprekende vander calioote vanden soute als voren, ende die van ghendt seyden dat si daer of gheen last en hadden. Doen seyde die prinche hy en soude nemmermeer in ghendt commen die kalioote vanden soute en soude hem gheconsenteirt sijn, ende also schieden si. Ende die van ghendt thuys commende gauent te

[fol. C.xviij.v]

kennen hoe dat sy vanden Prinche verstaen hadden dat hy ommer eene kelioote wylde stellen vp tsout. Die van Ghendt dit horende, si verstonden wel dat hem die prinche ouer den hals wilde, ende al bi quaden rade. Ende si droughen ouer een dat si eene wapeninghe maken wilden, also si ooc deden. Ende sy coren vier capiteynen. Te wetene meester Lieuen boone, Ian willay, Iacob meeus, ende een mesmaker gheseyt brillekin, ende si dysenierden hare stede van Ghendt contrarie hueren prinche. Ende sy sloughen te velde vp den Coutre binnen Ghendt, ende si vinghen mer Boudin die vos, ende deden hem grote scoffierichede, ende si wildene onthoofden vp een scauot, maer hi was verbeden ende gheleyt langhen tijt in die vanghenesse. Ende si ontboden alle haerlieder Casselryen ende vinghen dien goeden here van Praet, ende besaten selue sijn huys ter woestijne. Ende si dede een ghebodt dat nyement binnen Ghendt Ambochten doen en soude, ende maecten alsoe eene grote beroerte binnen der stede. Dit ghebuerde int iaer.M.iiij^c.ende.lij.

¶ Corts daer naer so trocken si huyte met groter menichte van volcke, ende quamen ter moerbrugghe, tot vp eene mijle naer brugghe. Ende si sonden hare ghedeputeirde te Brugghe waerts, omme troost, bystandt ende sercours te hebbene van die van Brugghe. Ende dit vernemende die here vanden Gruuthuyse, ende die hofmeester Pietere bladelijn gheseyt leestmakere, si deden terstont alle die poorten van Brugghe toe sluyten, so datter niement huyt noch in en mochte, want menich quaet mensche wasser in brugghe hadden si huyt ghemoghen sy souden metten ghentenaers ghealigiert hebben. Aenghesien dat aen alle Dekenen brieuen ghesonden waren van die van ghendt, het welke groot quaet in soude gebrocht hebben, maer ons heere gaf die gracie, dat alle die poorten van der stede in tijdts ghesloten waren. Ende die vander wet ghinghen selue ter poorte vraghende, ghi heren van ghendt, wat es hu lieder gheliefte. Ende sy gauen andtwoorde dat sy gheerne binnen brugghe commen wilden, etende, drinckende, ende wel betalende, daer vp dat die heren vander stede antwoorde gauen in deser manieren, gheminde vrienden, weit dat wi niement in onse stede van brugge laten en willen, ende specialijc volc van wapenen maer wi willen hu gheerne broot ende bier senden, in die plecke daer ghi neder ghesleghen sijt. Ende dat ontfanghen hebbende, wi raden hu te vertreckene, of ghi sult sien, dat men hu lieden van daer helpen sal.

¶ Item die van Ghendt dit hoorende, dat si gheen sercours van die van Brugghe ghecrijghen en consten, si braken vppe ende trocken seer verstoort weder te Ghendtwaert. Ende als si vertrocken waren, so deden die van brugghe eerst haer lieder poorten opene, ende dit ghebuerde vp eenen Sincxen auendt.

¶ Item die edele ende de notable mannen van Brugghe, baden den ghemeente dat si gheen alyanchie met die van ghendt maken en souden. Ende sghelijcx die van Ypre, ende vanden Vryen, maer dat elck stille sitten soude, ende hem nyeuwers mede moeyen, catrarye des Princhens eere, ende weerdichede. Ende die hadden dye van Ghendt wel verdient yeghen die van Brugghe, want in dien tijden dat die van Brugghe in tribulacien waren, naer die Calis reyse so hier vooren wel verhaelt es doe lieten dye van ghendt die van brugghe ongheholpen, ende dit was noch in goeden onthoude ende memorie.

¶ Item die van Ghendt ghinghen hem fortifieren ende sterc maken, omme oorloghe te houdene, ende doluen eene grote nyeuwe gracht ontrent marykercke, ende sy maecten allomme draeyboomen ende bollewercken, daer si alle passaegien mede besloten, daermen naer Ghendt soude moghen commen.

¶ Item die van Ghendt trocken huyte ende si ghecreghen tcasteel van Gauere. Ende tcasteel van Scendebeke, ende tcasteel van poucke ende meer andere vaste huysen, daer si capiteynen ende volc vp stelden, omme hem lieden te verweerene yeghen den Prinche.

¶ Item doe ten tijden soe rees daer vp een gheselschap van vele quade bouuen, datmen hiet die groen Tente, ende huer lieder capiteyn was de bastaert Blanstroem, de vele quaets in Vlaendren dede. Ende aldus soe wordet een rijdende oorloghe binnen vlaendren, want die van Ghendt roofden ende pijlgierden al dat buten den sloten was, ende si roofden

[fol. C.xix.r]

die stede van Gheertsberghe, ende dye stede van Ardenburch, ende sy staken.xij.waeruen tvier daer inne, ende si roofden Oostburch, ende der Groe, ende die prochien daer omtrent, al so wel in huer lieder selfs casselrye als inde casselrye van brugghe, ende alle die ghene die si wisten die metten Prinche toe waren, die daden si persecutie ende verdriet.

¶ Item dit volc gheheeten dye groen tente quamen tot Brugghe voor die poorte, ende si verbarnde Zeuecote, ende die drie coninghen ende den drie brauwers, Ende si roofden die coeyen, schapen, peerden, ende alle tcatteylic goet, dat si ghecrijghen consten, ende liepender mede te Ghendtwaert.

¶ Item ten hende so stelden hem die edele ende dat van sprinchen wege vp ende ter weere, metsgaders die vanden vryen, ende hadden meneghe schermutsinghe yeghens die van Ghendt, ende vele van dien quaden rapaelgien die worden altemet gheuangen, ende aen boomen gehangen

¶ Item die van Ghendt hadden groot ghebrec van soute ende van wijne, want men cochter een wijle tijts eenen stoop rijnsch wijns.xxxvi.groten. ende die vraukens van Ghendt quamen scamelic te Brugghewaert, ende cochten soudt bi halue viertallen, som min, som meer, ende droughen dat te Ghendt, twelcke hem die heren dicwille deden nemen. Ende al het landsvolc vloodt met al sinen goeden binnen Brugghe, ende in andere besloten steden, ende dese oorloghe aldus langhe gheduerende, het verdroet seere den hertoghe Phelips. Ende hoe wel dat hijt noode dede, hi track in thende te velde met groten volcke, ende hy slouch neder bi tcasteel van Gauere. Ende die capiteyn van gauere was een maetsenaer van Ghendt ende hi hiet Arnoudt van speeten, hi wordt so secretelic toe gesproken dat hi vanden casteel ghinc, ende track binnen Ghendt, daer dede hy binnen Ghendt ghebieden met trompetten dat al dat stock draghen mochte, gaen soude te gauerewaert, seggende dye Prinche en es niet voorsien van volcke, het is nv tijdt hem te beuechtene, daer maecte hem alle manne ghereedt omme derwaerts te trecken met onsprekelicken volcke, ia de wijfs van gendt dye dwonghen haer lieder mans huyt te treckene, hoe oudt dat si waren ende quamen also te velde.