Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volcht vij.Toyson ghehouden te Berghen in Henegauwe.

Dit waren die heeren die die oordene doe hilden. Eerst.

Phelips Hertoghe van Borgoengien. etc.

Alfonce coninc van aragon ende van Cecilien.

Guyliebeert de lannoy here van wijkeuael.

Hughe de lannoy, heere van Santes

Kaerle Hertoghe van Orliens.

Anthonis heere van Croy

Pieter van Betfremont, here van Charin.

Ian van Croy, heere van Torres.

Anthonis van Mylon, here van Antoingne

[fol. C.xviij.r]

Ian van Vergy heere van Foys

Boudin de Noyere heere van Casteel

Kaerle van Borgoengien. G. van Chaerlois

Andrieu, heere van Humeres

Boudin de Lannoy, here van Molenbays

Phelips heere van ternant

Iacob heere van cricquy

Symoen de la lain heere van houte

Tibault heere van neuf casteel

Ian bastaerdt van simpol. h. van houbordim.

Mattheeus van foys, heere van comines.

Fransoys van borsele, heere van oosteruant

Reynauldt, heere van breederoode.

Hendric van borsele, heer vander vere

Ian heere van anchij.

      ¶ Dit gheschiede int iaer.xiiij^c.li.

¶ Int tvoorseyde iaer so stelde die Paeus Nicolaus sine gracien ende aflaten, binnen der stede van Mechelen, ghelijc als ofmen te Roome ghegaen hadde, ende daer trac veel volcx huyt Vlaendren, ende huyt andere landen daer ontrent gheleghen, twelcke seere deuoot was om sien.

¶ In dit selue iaer waren vele grote boomen huyter eerde ghewayt. Ende in Vlaendren gheschiede als doe grote scade vanden wijnde, ende vanden haghelsteenen voornomt

[Vp den Sacramentsdach]

¶ Item in die selue iaer so quam sint Ians dach midtsomers, vp den Sacramentsdach, twelcke noyt niet vele gesien en was

¶ Vp den seluen tijdt, so hadde dye Hertoghe Phelips van Bourgoengien langhe in duytsche landen gheweist, volghende altijdt den Keyser Frederic, om hem te sprekene als voren gheseyt is, Ende was hem dickwijle wel vp een mijle naer of twee, twelck die Keyser wel wiste, maer die Keyser trac altijt so lanc so hooghere, het welcke hem die Cancelier seer schaemde, omme twelcke die voorseyde Cancelier quam totten Hertoghe Phelips, hem biddende, dat hi hem niet belghen en wilde, want hi en conste die fortune niet beletten. Ende hi badt den Hertoghe, dat hy niet meer volghen en soude, want hi hadde verstaen, dat hem die Keyser vanghen soude, ende houden als hi hem hadde daer hi hem hebben wilde. Die hertoge dit verstaende, bedancte hertelic den voorseyde Cancelier, ende corts daer naer met vele soete ende vriendelicke worden namen si oorlof deen aen den anderen, ende elck trac sijns sins, Aldus vertrac dye Prinche also heymelic als hi conste ende mochte, ende quam naer sine landen als hier naer blijcken sal, want men wiste niet wie hi was.

¶ Item die hertoge Phelips aldus weder keerende, ne gaf te gheender stede te kennen wie hi was, maer ghelogiert hebbende, hy dede al omme wel betalen, ende track voort, so varre dat hy meneghe duytsche stede wel besien hadde. Ende hi quam te kuelene, ende van daer reedt hi naer Bourgoengien, also dat hi wel.vi.iaer.lanck huyt Vlaendren was, waer inne dat die hertoghe Phelips doot was, ende van dier opynie waren tmeeste deel van die van Ghendt, ende seyden noch andere woorden den prinche aengaende, Ende dit nam die prinche grotelick te sijnder cleenicheyt, ende hi claechdet secretelic eeneghe van sinen heren die welcke hem rieden dat hi een Kelioote vp stellen soude in tlant van vlaendren. Ende hi sandt aen sine vier leden van Vlaendren sine opene letteren van mandemente, aengaende den soute, datmen daer vp eene kelioote stellen soude vp het welcke dye viere leden versaemden te Ghendt, Ende die van gendt seyden dat si noch om leuen noch om steruen, en wilden datte consenteren te gheenen fijne. Ende seyden waert dat yement vanden anderen drie leden daer inne consenteirden, si soudense houden voor haer lieder vyanden, ende aldus so verschiet die versaminghe vp dien tijdt.