Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ [Het.vi.Toyson ghehouden te Ghendt]

¶ Het.vi.Toyson ghehouden te Ghendt, ende dit waren die here dye doordene hilden met groter eeren int selue iaer. Ten eersten.

Die hertoge Phelips van Borgoengien. etc.

Ian die here van Robais ende van Arsele

Hughe de lannoy heere van Santes

Kaerle Hertoghe van Orlyens.

Ian de latremoelge heere van Iuuelis

Anthonis van Croy Graue van Porsieu

Iacob van Bremeulx here van Reghu

Pieter van Beffermont here van Carny

Ian van Croy heere van Tours

Frederick Graue van Muers

Anthonis van meluin here van Antoinge.

Ian van Vergy heere van Forrettes

Boudin van Noyere heere van Casteel

Kaerle van Bourgoengien. G. van chaerlois

David van Bremeulx heere van Camplice.

Guylibert de lannoy here van wilkeuael

Lodewijck Hertoghe van Alenchon

Boudin de lannoy here van Mouleubays

Phelips heere van Ternant.

Iacob heere van Crichy, ende van Ranaples

Symon de la lain here van Houte

Thibault heere de Neufcasteel

Ian bastaert van simpol, here van houbordijn

Mattheus van Foys Graue van Couegis.

Dit gheschiede int iaer.xiiij^c.ende.xlv.

¶ Item in dit selue iaer die Keyser Frederick die derde van diere name, hadde eenen Cancellier die welcke ghenaemt was Iaspar, ende hi hadde den Hertoghe phelips van Borgoengien in groter weerde, so dede hem die Hertoghe ooc van ghelijcken, ende ghemeenlicke screuen si aen malcanderen grote groetenesse. Ende die cause was dat die Hertoge van Borgoengien gheerne conuersacie ghehadt hadde met den voornoemden keyser so varre dat die Cancelier screef aen den hertoghe phelips, dat hi den Keyser soude commen volghen, alsomen noch hier naer horen sal, hy soude hem ghehulpich wesen om hem den Keyser te doen spreken. Ende by dusdanighe woorden so maeckte dye Hertoghe Phelips sijne ghereedtschepe, ende hi liet sijn wijf Ysabeele met sinen kinderen sijn landen regieren ende bewaren, ende hi trac naer dat duytsche landt ontrent met.xl.peerden, om byden Keyser te commene.

[Int iaer.xiiij^c.ende.xlvi]

¶ Item hier laet ic den hertoghe rijden ende sijn vooyaegie doen secretelic, ende ick wil voort scrijuen wat gheschiede der tijt dat hi wech was, ende eer dat hi vertrac. Dit gheschiede int iaer.xiiij^c.ende.xlvi.

Item int voorseyde iaer dye voorseyde Hertoge

[fol. C.xvij.v]

Phelips en besoengierde binnen dyer iaer schare niet, aengaende der oorloghe of andere sware saken ofte materien, als voren blijct, maer hi triumpheerde met sinen edelen eerlic in allen genouchten, ende vrolijcke chiere makende ende vele ghenouchten hantierende.

[Den.xxij.dach van Sporcle int selue iaer]

¶ Item voort omme te sprekene vanden keyser Fredricus, es te wetene dat die paeus Eugenius verschiet vander werelt den.xxij.dach van Sporcle int selue iaer, die welcke.xv.iaren gheseten hadde, ende van Tconsilium van Basele seere verulucht was. Ende doe wart die voorseyde Nycolaus binnen der stadt van Roomen paeus ghemaect in sine stede, ende dese paeus Nycolaus was gheboren van Geneueren, ende hi sadt.viij.iaer paeus, ende hy dede cesseren den twist van Eugenius, ende Tcisma der helegher kercke, twelc lange gheduert hadde, als voren gheroert es, eens deels. Dese Nycolaus ghecreech groote ghehoorsaemheyt ouer al, dattet alle man verwonderde dat alsulc een simpel man van gheborten, also mochte die ouerhant hebben, ende houden yeghens den Hertoghe van Sauoyen, die wel naer maech was of swaghere met allen Princhen ende heren van kerstenrijck in dien tijden.

[Vp den.vi.dach in Maerte, vp den.xxi.dach in Maerte en int iaer.xiiij^c.ende.xlviij]

¶ Item corts daer naer van Nycolaus es eendrachticheyt ghecommen want Felix heift gheweken, ende sijn recht ouer ghegeuen, want het heeft gode van hemelrijcke alsoe ghelieft. Dese Nycolaus was doctuer inder godheyt, ende in allen dinghen gheleert, gheestelick ende weerlic, en seer subtijl. Dese paeus Nicolaus was binnen eenen iare ghemaect bisschop van Bonemen, cardenael ende paeus des maendaechs vp den.vi.dach in Maerte. Ende vp den.xxi.dach in Maerte wort hi ghecroont, ende hi dede maken eene nyeuwe munte, ende hy slouch goet payment, ende swaer van ghewichte, hy dede vermaken vele vervallen edeficien, ende dede maken eenen groten muer ront omme tpallaeys, ende hy dede seer verbeteren die mueren vander stede van Roome, omme die vreese vanden turcken. Ende hi verschiet vander werelt int iaer van.lv.alsomen hier naer noch wel hooren sal, ende in wat plecke ende stede. Dit gheschiede int iaer.xiiij^c.ende.xlviij.

[Int iaer.xiiij^c.ende.xlix]

¶ Binnen desen iare en besoengierde dye Hertoghe Phelips niet vele, mer bleef ende hilt hem lange tijt in die duytsche landen, also ghi hier naer wel verstaen sult, by diueerschen redenen. Dyt was int iaer.xiiij^c.ende.xlix.

[Vp den.xxiij.dach van April en int iaer.M.iiij^c.ende.l]

¶ Vp den.xxiij.dach van April int voorseyde iaer vp sint Ioris dach smorghens tusschen.iij.ende.iiij.hueren, so wast een grote eertbeuinghe in Vlaendren, ende meest ontrent Brugghe, ten.iij.reysen, dat die huysen seer schudden ende roerden. Ende die schepen die int water lagen die spronghen vp ende nedere, omme twelcke menich mensche wonderlicken seer veruaert was, alst wel redene was. Dit gheschiede int iaer.M.iiij^c.ende.l.

¶ Item in dit selue iaer was gheordonneirt dat gulden iaer, twelc men heet tiaer van gracien, ende wort met groter deuocie ghehouden ouer al kerstenheyt.

¶ Item dese paeus Nycolaus hadde een Roose die hi ghebenedide vp den sondach voor halfvastene, dye men den Roosdach heet. Ende dit gulden iaer was int vierde iaer vanden paeus Nycolaus bouen ghenoemt.

¶ Item corts daer naer ontrent den.iiij.hueren naer die noene, so was te Brugge, ende daer ontrent een groot onghetempert wedere, so datter vielen haghelsteenen also groot als hokernoten, die welcke grote schade daden ende waren van diueerschen faetsoenen, som met aensichten ende som met lange eynden, ende tuyte wijs, twelc een groot wonder was om te siene, die welcke haghelsteenen braken vele glaesveynsteren in sticken, ende bedoruen vele vruchten. Ende dit weir gheduerde wel.ij.hueren lanc sonder vphouden.