Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volcht die feeste vanden Hertoghe van Orliens, ende vander ioncfrauwen van Cleue.

DIe Hertoghe Phelips van Borgoengien sandt bi sinen lieden alle maniere van prouisie om te fornierene dye feeste vander brulocht. Ende dye prinche voorseyde betaelde alle dye costen vanden heere van Orlyens ende van sinen lieden. Ende daer naer tsaterdaechs voor sinte Andries dach, soe trauwede dye Hertoghe van Orliens die voorseyde ioncfrauwe van Cleuen. Ende des ander daechs, twelcke was sondach, soe was ghehouden dye feeste, ende dye weerdicheyt vander kercke, seer solempnelijc ende chierlic, twelcke was seer schoone om sien. Ende die Hertoghe phelips selue in persone leede die bruyt, huer houdende aenden slinckeren arme. Ende aen dye rechter syde, soe leedese mijn heer Ian die bastaert van Simpol here van haubourdijn, die welcke hilt die mauwe vander bruyt, ende een groote vrauwe drouch den steert vanden tabbaert vander bruyt van achtere. Ende daer naer quam die Hertoghe van Orliens, die welcke leede die hertoghinne van Borgoengien. Ende daer naer so volchden vele edele heren ende vrauwen, ende daer was seer grote triumphe ghemaect wel. viij.daghen lanck van houeringhe, ende van danssen, ende steicspelen, ende alderhande ghenouchten, soe in sulcke feeste betaemt.

[fol. C.v.v]

¶ Men moet weten dat als doe een ghetal van notabele persoonen ghedeputeerde van der Stede van Brugghe quamen te sinte Omaers binnen der stede, Ende versochten aen den Hertoghe haer lieder Prinche, mitds dat sy noch nyet wel in gracien met hem en waren, hem ootmoedelicke biddende dat hem soude ghelieuen te commene in sine stede van Brugghe, niet yeghenstaende, dat si waren gheaccordeert met hem, nochtan had hi gheseyt dat hi nemmermeer inde voorseyde stede commen en soude, ten ware dat een meerdere heere dan hi, hem daer in soude leeden. Ende dit aensiende dat die notable van Brugghe versochten aen den hooghen ende moghende Prinche den Hertoghe van Orliens, dat hem soude ghelieuen te doene dese begheerte aen die hertoghe Phelips, dat hi te Brugghe in sine stede soude willen commen, so was hy te vreden inde voorseyde begheerte ter bede vanden voornomden Hertoghe van Orlyens, vanden welcken die van Brugghe hem grotelic bedancten van sijnder diligencie, die hy voor hemlieden ghedaen hadde aenden hertoghe Phelips voorseyde, Ende ghinghen corts daer naer ordonneren haer lieder staet, ende quamen binnen corten daghen te Brugghe, daer sy blijdelic ontfanghen waren. Ende die van brugghe die toochden grote eere ende reuerencie den Hertoghe van orlyens ende sijnder Hertoghinne met alle hueren geselschepe, ende sulcke chierheyt dat noeyt nyet vele Prinche sulcke chierheyt gedaen en was noch ghetoocht, also men hyer naer noch int lange verclaren sal, aengaende den schoonen personagien, ende spelen, ende hystorien, die elck ambocht ende neeringhe dede ter blijder incomste vanden hertoghe Phelips met den Hertoghe van Orlyens, binnen der stede van Brugghe.