Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volcht hoe dye Hertoghe van Orliens wart ontsleghen, ende ghedeliuereirt huyten handen vanden Coninc van Inghelant.

ITem ontrent den seluen tijt hadden diueersche Ambassaduers also wel vanden Coninck van vranckerijcke, als van des hertoghen van Borgoengien weghe ten diueerschen stonden ghesonden geweest byden lieden vanden coninc van Inghelant, vp meeninghe van te tracteirene van paeyse tusschen den tween conincrijcken, ende oock mede om die ontslaynge van Kaerle den Hertoghe van Orliens, die welcke Ambassaduers seer luttel hadden ghebesongiert, want men van

[fol. C.iij.v]

dien niet en conste ghecrijghen eenege antwoorde, vander welcker men mochte hebben eeneghe hope, omme te commene teenen tractiete van paeyse ofte ontslaynghe vanden voornoemden Hertoghe van Orliens, ten hadde gheweest grotelic ter preiudicie vanden coninck van Vranckerijcke ende sijnder heerlicheden. Ende die Inghelschen en wilden niet commen noch verstaen te gheenen apointemente, ten ware dat alle die questien die si hadden ghehadt in Vranckerijcke, ende sonderlinghe in thertochdom van guyenne ende van Normandyen hem lieden bleue vry ende vranck, sonder die te houdene van den coninc van Vranckerijcke. Ende hier of was die coninc van Vranckerijcke wel beraden, ende sinen raet ooc daer of gheinformeirt, of andersins en souden si nyet hebben gheaccoordeirt. Ende als aengaende het stic vanden Hertoghe van Orliens, so en waren die Inghelschen nyet seere gheneghen omme dat te expedierene, ende dat omme die grote profijten die si hadden voor sijn costen, want sy seer wel betaelt waren, ende dat was eens deels die cause dat si hem so langhe hilden prysoenier, also wel eeneghe Inghelschen openbaerden dye wel wat vanden secrete wisten. Ende voorwaer die coninc van Vranckerijcke ende oock die ghene die tgouuernement hadden vander heerlichede van Orliens si hadden ghedacht van langhe tijt hier te voren den Hertoghe van Orlyens niet te seyndene die voornoemde penninghen, want het es wel te bemoedene, haddet soe ghebuert dat hi vele te eer ontslegen soude hebben gheweist dan hi was, want die Ingelschen sijn van dier maniere, dat wanneer si moeten sijn in een groot verlech van daer ducht of vreese in sy, dat weder te vercrijghene, si doen dat seer noode, of niet. Maer niet te min ic ghelooue al twelcke datmen dede, het was al tot eender goeder meeninghe, omme te onderhoudene die heeren aen beeden siden.

¶ Item gheduerende dit tractiet, ende inden seluen tijt die Hertoghe van Borgoengien altijt hebbende grote begheerte omme te helpen verlossen den Hertoge van Orliens, also vele om die maechschip vanden bloede dat si malcanderen bestonden, als tot dier causen, want bi also dat hi weder quame in Vranckerijcke, dat si souden moghen blijuen goede ende getrauwe warachteghe vrienden deene metten anderen. Ende dat alle die oorloghe ende die wreethede die gheweist hadde in voorledenen tijden, ter cause van huerlieder beeder vaders begrauen sijnde, soude blijuen tondere en vergheten, sonder daer teenegher tijt meer of te vermanene.

¶ Item dit dede die Hertoge van Borgoengien ten vele stonden blijcken, ende dese materie voor oghen legghen sommeghe heren van Orliens, ende ooc sommeghe andere personen, die welcke wel moghende waren den voorseyde hertoghe van Orlyens te helpene omme te commene huyter vanghenesse daer hi inne was biden coninck van Inghelant.

¶ Item die Hertoghe Phelips van Borgoengien dede vernemen aen sommeghe personen die den voorseyde hertoghe hadden te bewarene, dat hy mochte weten hoe ende in was manieren dat dese saken souden moghen commen tot eenen goeden eynde. Ende dede ooc vertooghen voor den Hertoghe van Orlyens oft hi soude willen nemen te huwelicke, een sijn nichte, dochtere van sijnder sustere die Hertoghinne van Cleuen, die welcke hy hadde binnen sijnen huyse. Ende ooc oft soe ware datmen conste tracteren van sijnder ontslaynghe vander vanghenesse ende dat hi ontquame, of hi dan soude willen content ende te vreden sijn hem te accoordeirene ende te alligeirene van als mettten voorseyde Hertoghe Phelips van Borgoengien, sonder te eeneger stont te maken of te doen makene eenich verhael tegens den Hertoghe Phelips van Borgoengien of den sijnen in eenegher manieren, omme die questien bouen verhaelt, van tijden voor leden, bewarende in al die eere vanden coninck van Vranckerijcke, ende sinen sone den Dolphijn.

¶ Item die eersame Hertoghe van Orlyens ouermerckende ende ouerpeysende dye groote seruitude daer in dat hy so langhe tijt gheweest hadde, ende oock dat groote dangier dat hi hadde ghehadt, ende oock noch wel mochte hebben, so wort hi ghe-

[fol. C.iiij.r]

neghen daer toe, ende daer beloefde hi terstont bi sprake vanden prinche, in dien dat so gheschiede, ende dat hem die Hertoghe Phelips mochte ende wilde helpen dat hi ghedeliuereirt ware huyt dier seruitude ende vanghenisse daer hi in was, dat hi te wijue nemen ende trauwen soude teenen wijue die voornoemde nichte vanden hertoghe Phelips voorseyde, ende vanden anderen questien also te doene met den hertoghe phelips dat in als te vreden soude sijn.

¶ Item naer dese voorseyde belofte so begonstemen weder van nyeus te tracteirene neerstelijcke metten coninck van Inghelant ende met eeneghe van sinen rade, so dat si doe al ghesaemder hant te vreden waren aen beeden siden, ende accoordeerden bi middele ende in deser manieren, dat die Hertoghe Phelips van Borgoengien gaf sinen seghele den coninc van Inghelant voor de somme van       Ende die traytieten ghemaect ende gheaccoordeirt inder manieren als bouen int lange verhaelt. Ende die hertoge van Orlyens was ghestelt in sine lyberteyt ende vp sine vrye voeten ontsleghen van alle vangenessen. Ende daer naer midts dat hi hem hadde hooghelicken beloeft te voughene in also vele als hi vermochte inden paeys fynael, tusschen beede die coninghen ende haerlieder conincrijcke. Ende also aen den coninc oorlof nemende vertrac vander stadt van Lonnen totter stede van Calis, wel voorsien van goeden ende sekeren saufconduyte. Ende van daer was hy gheconuoyeert tot Greuelinghen. Ende daer waren omme hem te gheleedene die Hertoghe van cornewaelge, ende mijn heer Robert du Ros, ende meer andere edelen huyt Inghelant. Ende onder weghe Greuelinghe soe quam yeghens hem die hertoge Phelips van Borgoengien met seer schonen state. Daer maecten si grote blijschap ende toochden malcanderen grote minne ende vrientscap als si daer versaemt waren, ende die hertoghe van Orlyens was seer blijde dat hy verlost was huyter vanghenesse, ende die hertoghinne van Borgoengien was ooc seer verblijt van sijnder comste, ende toochde hem ooc blijde chiere. Ende daer was so seere ghewillecomt van vrauwen ende ioncfrauwen ende van alle den edelen, so dat si som van blijschepen nauwe ghespreken en consten binnen een langhe wijle.

Svrydaechs voor alder heleghen dach Anno.M.CCCC.ende.xv.tot in die maent van Nouembre Anno.M.CCCC ende.xl.]

¶ Item corts daer naer die hertoghe van Orlyens seyde te menegher stont, schoon broeder, schoon neue ick behoore hu te beminnen bouen alle ander princhen van desen Conincrijcke, ende mijnder schoonder nichte huwe gheselnede, want ten ware ghi ende si, ic ware ghebleuen tallen daghen in die vanghenesse ende in die seruitude van mijne vyanden ende wederpartyen, ende aldus ick en hebbe gheen meedere vrienden in dye weerelt dan hu beeden. Vp twelcke die hertoghe van Borgoengien antwoorde dattet hem seere leet was dat hi hem niet eer en hadde connen ghehelpen, want hy ouer langhe tijt grote begheerte ghehadt hadde omme hem te verlossene, sulcke ende vele ghelijcke redenen waren dicwijle verhaelt vanden voorseyde princhen, waer omme tvolck seer blijde was, ende specialic om die comste vanden Hertoghe van Orlyens die so langhe tijt prysoenier gheweest hadde vanden Inghelschen. Ende es te wetene dat die voorseydede Hertoghe van Orlyens prysoenier gheweist hadde van svrydaechs voor alder heleghen dach Anno.M.CCCC.ende.xv.tot in die maent van Nouembre Anno.M.CCCC ende.xl. Ende aldaer so waren voor oghen dye ambassaduers vanden coninck van Vranckerijcke. Ende waren eerst dye eertsbisscop van Ryemen groot Cancellier van Vranckerijcke, die eerdtsbisschop van Verbone, die graue van Dunoys, ende meer andere edelen, die welcke personaegien elc naer sijnder hoocheit ende bi ghebuerte den voorseyde Hertoghe daer vijndende ghekeert van sijnder vanghenesse, daden hem alle daer seer blijden ontfanck, ende sonderlinghe die bastaert van Orlyens sijnen broedere Ende van danen quamen sy sint Omaers te watere, ende waren ghelogiert in die Abdye van sinte Bertins. Dye Hertoghe van Orlyens ende die Inghelsche heeren dye met hem quamen, elck nae sinen staet seer eerlicken. Ende naer dien was hi noch van den Hertoghe van Borgoengien ende van sijnen lieden in dye voorseyde stede weder eerlick ontfaen, ende hem waren ghedaen van die vander stede vele schoone presentacien Ende alle daghe soe quamen daer vele di

[fol. C.iiij.v]

ueersche persoonen, also wel huyt Vranckerijcke als huyt den lande van Pycaerdyen, omme hem te siene, ende oock vele lieden van sijnder heerschepye, die welcke seer verblijt waren van sijnder comste ende wederkeerene.