Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier beghint hoe die Hertoghe Phelips ontfinck Vrau Kathelijne, Sconincx dochtere van Vranckerijcke, omme te hebbene in huwelijcke den Graue Kaerle van Charloys sine sone.

Ende hoe hi een steecspel dede beroepen.

ITem die hertoghe phelips van Borgoengien hilt sinen staet als doe binnen der stede van Sint Omaers, ende trac met groten state van edelen heren ende rudders buyten der voorseyde stede van sint Omaers, ende ontfincse met groter eeren, huer also conuoyerende tot binnen der voorseyde stede tot hueren logijste, in welcke thuwelic fynabelijc ghesloten was van den here van Chaerloys sinen sone ende van mer vrauwe kathelijne svoorseyde conincx van Vranckerijcke dochtere. Ende daer was gro-

[fol. C.iij.r]

te ghenouchte ende triumphe bedreuen ter causen van danssinghen ende ooc van steicspelen, ten coste vanden Hertoghe Phelips. Ende waren beroupers vanden voorseyde steicspele huyter name vanden Hertoghe Phelips, die here van crichy yeghen alle dandere dye commen wilden ten voorseyde steicspele. Ende daer was me vrauwe Kathelijne mede present byden vrauwen ende ioncfrauwen dye den danc gauen.

¶ Item in dese selue tijt so sandt die coninc van Nauarre eerlicke ambassadeurs aen den Hertoghe Phelips van Borgoengien omme te hebbene in huwelicke die ioncfrauwe van Cleuen, vander welcker dat Hertoghe Phelips oom was, ende quamen vp den seluen tijt byden Hertoghe van Borgoengien in sine stede van Douway met schonen state, te wetene met wel.xxx.peerden heerlicke personaegien omme te tracteirene vanden voorseyde huwelicke van mijns heren nichte, ende den erfachteghen sone van Auernen welck tractiet was beleet, ende gheduerde een wijle tijts, ende wort int eynde gheexpedieert, ende quam teenen goeden effecte, want het huwelic wordt gheconsenteirt van den voorseyde Hertoghe Phelips.

¶ Ende corts daer naer was die ioncfrauwe van Cleuen ghesonden met schoonen staste ende eerlicken gheselschepe onder die bewaernesse van hueren broedere, daer si seer eerlicken ontfanghen was vanden voorseyde Coninck van Nauarre.