Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe dye Coninck Kaerle van Vranckerijcke sandt Vrau Kathelijne sine dochtere, by den Hertoghe Phelips van Bourgoengien, om te vulcommen thuwelic van huer, ende van Kaerle sinen sone, heere van Charloys.

[Inde maent van Wedemaent]

ITem int iaer.xxxviij.hier te voren so es te weten, hoe die Coninc Kaerle van Vranckerijcke sandt Vrau Kathelijne sine dochtere naer sine belofte, bi den Hertoghe Phelips van Bourgoengien, omme te vulcommene thuwelic van huer ende van Kaerle sinen sone here van charloys, ende dit gheschiede inde maent van Wedemaent. Ende die Coninc voorseyde sandt sine dochtere Vrau Kathelijne met seer hooghe mogende ende edele gheselscepe gheacompaingiert, Te wetene dye eerdtsbisscop van Ryemen, die graue van vendomme ende die ionghelinck vanden hertoghe van Borbon, ende meer andere groote edele heren die huer conuoyeerden, ende met mer vrauwe van Rutsefoort, ende vele meer andere vrauwen ende ionckfrauwen, ende quamen binnen der stede van Camerijcke daer si eerlicke ghefesteirt ende ontfanghen waren van den notable vander seluer stede.

Ende es te wetene dat ghesonden waren van den Hertoghe van Borgoengien om haer tontfane sekere menichte van groten perso-

[fol. C.ij.v]

naegien, te wetene die graue van Niueers ende van stampes, ende die Cancellier van Borgoengien, ende meer andere groote heeren ende vrauwen, dye graue van Namen, me vrauwe van Cryeuecuer, me vrauwe van Hauboudijn, ende meer andere edele vrauwen. Ende dese twee gheselschepen van edelen ende ioncfrauwen deden malcanderen grote touf ende groote eere int ontfanghen van deen den anderen. Ende principalicken omme vrauwe Kathelijnen wille sconincx dochtere van Vranckerijcke, daer omme dattet al was ghedaen, die welcke als doe out was ontrent.x.iaren, ende was ghebrocht in eenen osbare seere rijckelic verchiert ende vercleet, als sulck eens Conincx dochtere ooc wel betaemde. Ende in wat steden datse quam, soe beetteden.x.of.xij.edele mannen altoos in tincommen vander poorte, van huer lieder peerden, ende hilden huerlieder handen aen den osbare daer si in sadt, ende alsoe daer aen gaende tot dat si of ghebeet was voor huer logijs.