Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Den voetual die Tatrecht gedaen was.

VP den.xvij.sten dach van Sporcle deden.xxxviij.persoonen van Brugghe Tatrecht den voetual voor den Prinche, te wetene.iiij.prelaten, den Abdt van oudenburch, den Abdt van sinte Andries, den Abdt vanden doest, ende den Abdt vanden eechoute. Ende voordt die xiiij.ghedeputeirde van Brugghe die omme tselue daer ghecommen waren, ende.xx.personen notabele mannen vanden ghenen die huyt Brugghe gheuloden waren. Ende die Prinche die vergaeft vp tghene dat daer naer gheschien soude, ende van daer vertrocken die selue persoonen, ende deden alle sghelijcx voor die Princesse, ende voor den Ionghen Prinche

[fol. xcviij.v]

Kaerle ende die Ioncheere van Cleuen, ende si vergauent oock. Ende als dat ghedaen was doe ghinghen die Princesse, den ionghen Prinche, ende den ioncheere van Cleuen alle drye te samen, ende vyelen ouer hare knyen voor den Hertoghe Phelips, ende baden hem ouer sine goede stede van Brugghe, dat hijse wilde ontfaen in sine gracie, ende ghenadichede. Ende hi steldet int segghen vander Princesse, ende van dye van sinen Rade. Vp den seluen dach naer dye noene, so quamen noch voor den Prinche dye Clergye vander stede van Atrecht, ende die notabele vander poorterye vander seluer stede, ende diuersche cooplieden ende vyelen ouer haer knyen biddende hem ootmoedelick ouer sine goede stede van Brugghe dat hijse wilde ontfanghen in sijnder gracie ende ghenade, ende hy vergaft hem lieden, midts twee hondert duysent Rijders, dye si hem gheuen souden in emenden. Ende vele van haren preuilegien ende costumen souden si moeten verliesen endete buyten gaen. Ende die stede vander Sluys soude voordt aen een stede blijuen vp haer seluen. Ende dye.xl. persoonen die in tbrieuekin staen, die souden buyten den paeyse blijuen. Ende men soudese alomme vanghen ende arresteren, al so varre als si crijghelic waren, om sinen wille daer mede te doene. Ende die voorseyde xiiij.ghedeputeirde van Brugghe consenteirden voor hem allen die pointen, want si hadden last dat te doene vander Wet van Brugghe vanden.xxiiij.notabele, ende vanden ghemeenen volcke vander stede. Ende die Prinche gaf dye van Brugghe Iacob scaeck te haren Schouteetene te sine. Ende de voorseyde Iacob scaeck trac metten ghedeputeirden te Brugghewaert.

[Vp den derden dach van Maerte en vp den xx.sten dach in Sporcle]

¶ Item vp den derden dach van Maerte, so soude den paeys in commen. Ende het soude sijn eenen generalen paeys al Vlaendren duere. Vp den xx.sten dach in Sporcle quamen sommeghe Spaengiaerden in Brugghe, die Tatrecht gheweist hadden ten voetvalle, die welcke seyden ouerwaer dat die van Brugghe sekeren paeys hadden, ende dat den drayboom ter Sluys opene gaen soude, ende dat den coopman vry varen ende keeren soude, also hi hadde gheploghen te doen, daer omme dat hem menich mensche seere verblijde. Ende vp dien seluen dach waren te Brugghe drie vrome ghesellen onthooft van rooue. Tsanderdaechs quamen die.xiiij.ghedeputeirde in Brugghe, die welcke te kennene gauen, hoe dat die voetual ghedaen was, ende dattet al paeys was, ende dat den paeys incommen soude vp den derden dach in Maerte so voorseyde is, aldoe was gheordonneirt bider wet, ende bi den.xxiiij.notabele van Brugghe, datmen den visch, ende twaermoes, ende tfruyt, ende alle sulcke dinghen vercoopen souden vp die Maerckt, ende tcoorne inden braemberch. alsomen plach te doene.

[Vp den saterdach den.xxij.sten in Sporcle]

¶ Item vp den saterdach den.xxij.sten in Sporcle was huyt gheroupen dye voorseyde ordonnanchye ende die beuolen tonderhoudene. Ende men gaf daer doe openbaerlic te kennene, hoe dat die Prinche hadde ghenomen die stede van Brugghe van alle haren mesdaden in gracien ende in ghenaden. Altijdt huyt ghenomen die.xl.persoonen die int brieuekijn staen. ende als dat ghebodt ghedaen was, so ghinghen die hooftmannen in, ende ontrent Brugghe omme die voorghenomde.xl. personen te pooghen te vanghene. Ende si vijnghender tot.xv.van diere ghevloon waren, ende daer te voren in den aduent, so warer.iiij.onthooft te brugghe.

[Vp den xxiiij.sten dach in Sporcle]

¶ Item Iacob scaeck dede sinen eedt, als Schoutheeten van Brugghe, vp den xxiiij.sten dach in Sporcle voor die vander wet, ende die.xxiiij.notable des auents, ten vi.hueren. Ende des anderen daechs dede hy een ghebodt doen ter hallen huyt, dat alle mannyere van schiplieden vry varen ende keeren mochten tusschen Brugghe ende den swijne vander Sluys. Ende hy beual van Sprinchen weghe dat neyement eeneghe schimpege woorden gheuen en soude, noch eenich verwijt doen in gheender manyeren, ter cause vanden gheschille datter gheweist hadde

¶ Item vp den seluen dach, track dye voorseyde Scoutheetene ten Damme met meester Anthonis michiels sectretaris vanden Prinche, ende van daer voordt ter Sluys, ende dede daer tselue gebodt. Ende tsauens quamen in brugghe vele poorters en poorterssen, die huyt Brugghe geuloon waren. Ende elck trac weder in sijn huys ende woonste.

[fol. xcix.r]