Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe die Hertoghe Phelips track met eender grooter heyrcrachte te Muylijn vp die Cheyne, ende wan die stede.

ITem int iaer.xiiij^c.ende.xx.Dye hertoghe Phelips voer met eenen grooten heyrcrachte te Muylijn vp die Cheyne, ende wan die stede. Ende hi vandt daer inne vele edele die te sijns vaders doot gheweest hadden, die welcke som daer versleghen waren, ende sommeghe vloden. Ende daer was heer Robrecht van Massemijne Rudder ghemaect.

[Vp den.xxx.dach in Ougstmaent]

¶ Int iaer M.CCCC.ende xxi.vp den.xxx.dach in Ougstmaent, soe was eenen groten strijt bi sinte Rykiers in Pontieu, ende daer was die Hertoghe Phelips een wijle tijts gheuanghen vanden Hermaniacx, maer haestelic so was hi vanden Vlaminghen weder omme verlost ende ghecregen. Daer bleuen bouen maten vele hermaniacx doot, ende vele vlamingen waren daer Rudders ghemaect van mer Ian van Lutcenborch. Eerst ende al te voren ons prinche Phelips van chaerloys hertoghe van Borgoengien Graue van Vlaendren, Ian here van steenhuyse, Adriaen van Vylain, ende veel meer andere. Ende daer behilt onse prinche die victorie ende dat velt byden groten bystand vanden heere van Comeneenn vanden vlaminghen. Daer vloon doe vele walen te Pykengy.

¶ In dit selue iaer al kerstenhede was in roere, omme die van Praghen wille, die welcke hilden ende sustineerden vele quade ende valsche opinien die contrarie waren onse kerstenen ghelooue, ende menich mensche track dar waert ghewapent, ende wel voorsien omme hem lieden te beuechtene ende te nyeuten te doene, maer het was alte vergheifs, want dye keyser sygismundus belettet al. Dir veers vanden Soutere, dat maect tincarnacioen vander pragheuaert. Nouacula acuta fecit dolum.

[Vp den achtsten dach van Hoymaent]

¶ Int iaer.M.CCCC.ende.xxij.vp den achtsten dach van Hoymaent, soe starf die vrauwe Michiele van Vranckerijcke dye Hertoghinne van Borgoengien,

[fol. lxxxi.r]

ende graefnede van Vlaendren des conincx Karels dochtere van Vranckerijcke binnen der stede van Ghendt ter posterne, ende si was begrauen in sinte Baefs cloostere. In tselue iaer starf haer vader die coninc Kaerle van Vranckerijcke, die welcke coninc van Vranckerijcke gheweest hadde.xlij.iaer, hi was drieweruen in Vlaendren ghewapender hant, ende hi was die ghene die den strijt wan te Roozebeke vp die vlaminghen. Anno domini.xiij^c.ende.lxxxij.vp den.xvij.dach in Nouembre.

[Int iaer.xiij^c.lxxxiiij]

¶ Item hi ghecreech den Dam int iaer.xiij^c.lxxxiiij. Hy was ter sluys om te varene in Inghelant, ende doe deden dye walen veil quaets in Brugge, maer daer wasser vele in haerlieder herbergen al heymelijc doot ghesleghen.

in die maent van Octobre

¶ Int iaer.xiiij^c ende xxiij.in die maent van Octobre wasser groot water in Vlaendren, ende dede grote schade, want men en mochte in vele plaetsen nyet saeyen, ende daer verdroncken vele beesten. Dit es tincarnacioen van dien. Schoonen dike dranck den wijn coel, doe twater had de meneghen poel.M.CCCC.ende.xxiij.