Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Van Phelips van Chaerlois des hertoghen Ians sone, die.xxix.Graue van Vlaendren.

Dat.xxxv.capittel.

PHelips van Chaerlois des hertoghen Ians sone, hi hadde alle dye signorien ende heerlicheden van sinen vadere, te weten. Eerst dat theroochdom van Borgoengien, tgraefschip van Vlaendren, Borgoengien, Artoys, here van Mechelen ende van Antwerpen, hi hadde te wijue des conincx karels van gonnesse dochtere coninck van Vranckerijcke gheheeten vrauwe michiele. Dese phelips quam in Vraendren vp den.xx.dach in Septembre Ende hi swoer te ypre, daer naer te ghendt, ende doen quam hy te Brugge waert, maer als hi in Brugghe commen soude, hi wilde den Burchmeestere vanden vryen Robrechts.f.Boudins. Ende.vi.schepenen vanden sietseelschen die te Brugghe met rechte ghebannen waren in die stede bringhen, ende badt seere daer voren, ende bleef lange te Male verbeydende antwoorde van die van die van Brugge, maer hi en conste dat niet vercrijghen, ende men stont buyten der cruyspoorte bouen den.iij.conin-

[fol. lxxx.v]

ghen met alle die collegien vander stede bet dan.iiij.hueren lanc ende een halue. Ende hi quam van Male te Brugghe, daer hi eerlicken ontfanghen was, maer dye ballinghen vanden vryen bleuen buyten. Ende hi swoer te brugghe haere rechten, wetten, preuilegien te houdene ende te doen houdene, ende oock te beschermene.