Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[fol. lxxx.r]

[Int iaer.xiiij^c.ende.xx en Anno domini.xiiij^c.ende.xxi]

[¶ Item sygismundus die coninc van hongeryen was ghecoren coninck van Roome ende keyser van Almaengien]

¶ Item sygismundus die coninc van hongeryen was ghecoren coninck van Roome ende keyser van Almaengien, ende sandt al kerstenheyt duere eerlicke Ambassaduers aen allen kersten coninghen ende princhen, ende tot alle grote gheestelicke prelaten datse commen wilden, ofte eerlicke boden seynden binnen der stede van pysen, om te maken een eendrachticheyt in dye helege kercke, ende dat Scisma te nyeuten te doene vanden ij.Paeusen, twelc wel.xxx.iaer hadde gheduert. Alle die heren van kerstenrijcke vanden ij.staten gheestelic ende weerlic van allen conincrijcken, ende andere landtschepen versaemden daer in groter menichte. Ende daer wort ghetracteirt dat die.ij.paeusen of gaen souden, ende men verlietse van hare prelatuere. Int iaer.xiiij^c.ende.xx.Ende die cardenalen die daer te pysen waren coren voor eenen paeus eenen meester Pieter van Candien van.s.Franciscus oerdene, ende was een groot doctuer ende een meester in Theologien vander vniuersiteyt van Parijs. Ende in sijne consecratie was hi geheeten Alexander dye.v. Anno domini.xiiij^c.ende.xxi.als Alexander een iaer paeus gheweest hadde of daer ontrent, so wart hi vergheuen, ende starf te bolloengien. Corts naer den Asscencioens dach. Ende vp den Sinxen dach daer naer, die cardenalen dye daer te Bolloengien waren in conclaue besloten, coren den cardenael van Bolloengien voor eeenen paeus, ende hiet balthasar de la chansse, gheboren van Napels, ende in sine consecracie wort hi gheheeten Iohannes dye.xxiij. Anno domini xiiij^c.ende.xxiiij.Sygismundus die keysere clachte horende vanden paeus Ian, hi dede vergaderen die prelaten van allen landen, ende hy dede houden een generael consilie te Constans vp den Rijn, ende daer was vele ghetracteirt van des paeus Ians leuene, ende van sinen quaden gouuernemente, ende hi wart verlaten ende of ghestelt van sinen paeuschepe, ende was te staffenhuyse int casteel in vangenesse gheleyt Ende die cardenalen die in tvoorseyde consilie waren, die coren eenen Romeyn dye cardenael was, ende hiet Odo de calumpna. ende in sine consecracie wort hi gheheeten Martinus die.v.hi was ghecoren int iaer.xiiij^c.ende.xxvij.